ಜನವರಿ 1ರಿಂದ ಚೆಕ್‌ಗೆ ಹೊಸ ರೂಲ್ಸ್‌, ಏನಿದು ಪಾಸಿಟಿವ್‌ ಪೇ?

ಹೊಸದಿಲ್ಲಿ: ಚೆಕ್‌ ಪಾವತಿಗೆ ಸಂಬಂಧಿಸಿದಂತೆ ಹೊಸ-ವರ್ಷದ ಜನವರಿ 1ರಿಂದ ಹೊಸ ನಿಯಮ ಜಾರಿಗೆ ಬರಲಿದೆ. ಚೆಕ್‌ ವಿಷಯದಲ್ಲಿ ಗ್ರಾಹಕರ ಸುರಕ್ಷೆಗೆ ಒತ್ತು ನೀಡಲು ಮತ್ತು ವಂಚನೆ ತಪ್ಪಿಸಲು ಹೊಸ ವ್ಯವಸ್ಥೆಯಿಂದ ಸಾಧ್ಯವಾಗಲಿದೆ.

ಚೆಕ್‌ ಪಾವತಿ ಸಲುವಾಗಿ 'ಪಾಸಿಟಿವ್‌ ಪೇ' ಎನ್ನುವ ವ್ಯವಸ್ಥೆಯನ್ನು ಪರಿಚಯಿಸಲು ಪ್ರಸಕ್ತ ವರ್ಷದ ಆರಂಭದಲ್ಲಿಯೇ ರಿಸರ್ವ್ ಬ್ಯಾಂಕ್‌ ನಿರ್ಧರಿಸಿತ್ತು. ಅದರ ಜಾರಿಗೆ ಸಮಯ ಈಗ ನಿಗದಿಯಾಗಿದೆ. ಹೊಸ ವ್ಯವಸ್ಥೆಯನ್ವಯ ಚೆಕ್‌ಗಳನ್ನು ಮರು ದೃಢೀಕರಿಸಲಾಗುತ್ತದೆ. ಅಂದಹಾಗೇ, 50,000 ರೂಪಾಯಿ ಮೀರಿದ ಚೆಕ್‌ಗಳಿಗೆ ಇದು ಅನ್ವಯವಾಗುತ್ತದೆ.

ಏನಿದು ಪಾಸಿಟಿವ್‌ ಪೇ?: ಚೆಕ್‌ ವಂಚನೆಗಳು ಹೆಚ್ಚುತ್ತಿದ್ದು, ದುರ್ಬಳಕೆಯೂ ಆಗುತ್ತಿವೆ. ಚೆಕ್‌ ಪಾವತಿ ವ್ಯವಸ್ಥೆಯಲ್ಲಿ ಸುರಕ್ಷತಾ ಕ್ರಮಗಳನ್ನು ಜಾರಿಗೊಳಿಸುವುದು ಆರ್‌ಬಿಐನ ಪಾಸಿಟಿವ್‌ ಪೇ ಸಿಸ್ಟಮ್‌ನ ಉದ್ದೇಶ. ಹೆಚ್ಚಿನ ಪರಾಮರ್ಶೆ ಮತ್ತು ಸಂಸ್ಕರಣೆ ನಡೆಯುತ್ತದೆ. ಆಪ್ಟಿಕಲ್‌/ಇಮೇಜ್‌ ಕ್ಯಾರೆಕ್ಟರ್‌ ಅನ್ನು ಗುರುತಿಸುವ ತಂತ್ರಜ್ಞಾನವನ್ನು ಬಳಸಿ ಚೆಕ್‌ ಸುರಕ್ಷತೆ ಹೆಚ್ಚಿಸಲಾಗುತ್ತದೆ. ನ್ಯಾಷನಲ್‌ ಪೇಮೆಂಟ್ಸ್‌ ಕಾರ್ಪೊರೇಷನ್‌(ಎನ್‌ಪಿಸಿಐ) ಈ ವ್ಯವಸ್ಥೆಯನ್ನು ಅಭಿವೃದ್ಧಿ ಪಡಿಸಿದೆ.

ಚೆಕ್‌ ವಂಚನೆ ತಡೆಗೆ ಬರಲಿದೆ ಸುಭದ್ರ ವ್ಯವಸ್ಥೆ: ಜ.1ರಿಂದ ಜಾರಿ!

• 50,000 ರು.ಗಿಂತ ಹೆಚ್ಚಿನ ಮೊತ್ತಕ್ಕೆ ಚೆಕ್ ನೀಡುವಾಗ ಚೆಕ್ ನ ಎರಡೂ ಬದಿಗಳನ್ನು ಫೋಟೋ ತೆಗೆದುಕೊಳ್ಳಬೇಕು.
• ಚೆಕ್ ನಂಬರ್, ಚೆಕ್‌ನ ದಿನಾಂಕ, ಚೆಕ್ ಪಡೆದವರ ಹೆಸರು, ಅವರ ಬ್ಯಾಂಕ್ ಖಾತೆ ನಂಬರ್ ಮತ್ತು ಚೆಕ್‌ನ ಮೊತ್ತ ಮುಂತಾದ ಎಲ್ಲಾ ವಿವರಗಳನ್ನು ಫೋಟೋ ಜತೆಗೆ ಬ್ಯಾಂಕ್ ಗೆ ನೀಡಬೇಕು.
• ಎಸ್‌ಎಂಎಸ್, ಇಂಟರ್ನೆಟ್, ಮೊಬೈಲ್ ಇಲ್ಲವೇ ಎಟಿಎಂ ಹೀಗೆ ಯಾವುದಾದರೊಂದು ರೂಪದಲ್ಲಿ ಬ್ಯಾಂಕಿಗೆ ಈ ವಿವರಗಳನ್ನು ನೀಡುವ ವ್ಯವಸ್ಥೆ ಇರಲಿದೆ.
• ಚೆಕ್ ಪಡೆದವರು ಆ ಚೆಕ್ ಅನ್ನು ಬ್ಯಾಂಕಿಗೆ ನೀಡಿದಾಗ ತಾಳೆ ಹಾಕಿ ನೋಡಲಾಗುತ್ತದೆ. ಈ ವೇಳೆ ಮಾಹಿತಿ ಸರಿಯಾಗಿದೆ ಎಂದಾದಲ್ಲಿ ಮಾತ್ರ ಚೆಕ್ ನ ಹಣ ನಗದು ರೂಪದಲ್ಲಿ ದೊರೆಯುತ್ತದೆ.