ಶೇ.6.5 ಬಡ್ಡಿ ದರ ಯಥಾಸ್ಥಿತಿ

ಹೊಸದಿಲ್ಲಿ: ಆರ್ಥಿಕ ವಿಶ್ಲೇಷಕರ ನಿರೀಕ್ಷೆಯಂತೆ ರಿಸರ್ವ್‌ ಬ್ಯಾಂಕ್‌ ಶೇ.6.5ರ ಬಡ್ಡಿ ದರದಲ್ಲಿ ಯಾವುದೇ ಬದಲಾವಣೆ ಮಾಡಿಲ್ಲ.

ಶೇ.6ರ ರಿವರ್ಸ್‌ ರೆಪೊ ದರವನ್ನೂ ಆರ್‌ಬಿಐ ಹಾಗೆ ಉಳಿಸಿಕೊಂಡಿದೆ. ನಗದು ಮೀಸಲು ಅನುಪಾತದಲ್ಲೂ ಯಾವುದೇ ಬದಲಾವಣೆ ಮಾಡಿಲ್ಲ. ಬಡ್ಡಿ ದರ ಕುರಿತ ದ್ವೈಮಾಸಿಕ ಸಭೆಯ ನಂತರ ಆರ್‌ಬಿಐ ಈ ವಿಷಯ ಪ್ರಕಟಿಸಿದೆ.

ಕಳೆದ ಫೆಬ್ರವರಿಯಲ್ಲಿ ನಡೆದ ಹಣಕಾಸು ನೀತಿ ಪರಾಮರ್ಶೆ ವೇಳೆ ಬಡ್ಡಿದರ ಇಳಿಕೆ ನಿರೀಕ್ಷಿಸಲಾಗಿತ್ತು. ಆದರೆ ಆರ್‌ಬಿಐ ಗವರ್ನರ್‌ ರಘುರಾಮ್‌ ರಾಜನ್ ಬಡ್ಡಿದರದಲ್ಲಿ ಯಥಾಸ್ಥಿತಿ ಕಾಯ್ದುಕೊಂಡಿದ್ದಾರೆ. ಇದು ಐದು ವರ್ಷಗಳ ಕನಿಷ್ಠ ಮಟ್ಟವಾಗಿದ್ದು, 2011 ಜನವರಿಯಲ್ಲಿ ರೆಪೊ ದರ 6.50ಕ್ಕೆ ಇಳಿಕೆಯಾಗಿತ್ತು.

ಪ್ರಸಕ್ತ ಹಣಕಾಸು ವರ್ಷದ ಒಟ್ಟು ಆಂತರಿಕ ಉತ್ಪನ್ನ (ಜಿಡಿಪಿ) ಶೇ. 7.6 ತಲುಪುವ ಸಾಧ್ಯತೆ ಇದೆ ಎಂದಿರುವ ರಾಜನ್, ಹಣದುಬ್ಬರ ಪ್ರಮಾಣದಲ್ಲಿ ಇಳಿಕೆ ಕಂಡುಬಂದರೆ ಮತ್ತೆ ದರ ಕಡಿತ ಮಾಡುವ ಭರವಸೆಯನ್ನೂ ನೀಡಿದ್ದಾರೆ.