ಏಕೀಕೃತ ಡಿಜಿಟಲ್‌ ಕೈಗಾರಿಕಾ ಕೇಂದ್ರಕ್ಕೆ ರಿಲಯನ್ಸ್‌ 60,000 ಕೋಟಿ ರೂ ಹೂಡಿಕೆ: ಮುಕೇಶ್‌ ಅಂಬಾನಿ

ಮುಂಬಯಿ: ದೇಶದ ಮೊಟ್ಟಮೊದಲ ಡಿಜಿಟಲ್‌ ಕೈಗಾರಿಕಾ ಕೇಂದ್ರವನ್ನು 60,000 ಕೋಟಿ ರೂ ವೆಚ್ಚದಲ್ಲಿ ಮಹಾರಾಷ್ಟ್ರದಲ್ಲಿ ನಿರ್ಮಿಸಲು ರಿಲಯನ್ಸ್‌ ಇಂಡಸ್ಟ್ರೀಸ್‌ ಲಿಮಿಟೆಡ್‌ (ಆರ್‌ಐಎಲ್‌) ಮತ್ತು ಅದರ ಜಾಗತಿಕ ಪಾಲುದಾರ ಕಂಪನಿಗಳು ನಿರ್ಧರಿಸಿವೆ.

ಶತಕೋಟ್ಯಧಿಪತಿ ಉದ್ಯಮಿ ಮುಕೇಶ್‌ ಅಂಬಾನಿ ಅವರು 'ಮ್ಯಾಗ್ನೆಟಿಕ್‌ ಮಹಾರಾಷ್ಟ್ರ' ಹೂಡಿಕೆದಾರರ ಸಮ್ಮೇಳನದಲ್ಲಿ ಈ ವಿಷಯ ಪ್ರಕಟಿಸಿದ್ದಾರೆ.

'ಮುಂದಿನ 10 ವರ್ಷಗಳಲ್ಲಿ ರಿಲಯನ್ಸ್‌ ತನ್ನ ಜಾತಿಕ ಪಾಲುದಾರರ ಜತೆಗೂಡಿ 60,000 ಕೋಟಿ ರೂ.ಗಳನ್ನು ಹೂಡಿಕೆ ಮಾಡಲಿದ್ದು, ದೇಶದ ಮೊಟ್ಟಮೊದಲ ಏಕೀಕೃತ ಡಿಜಿಟಲ್‌ ಕೈಗಾರಿಕಾ ಕೇಂದ್ರವನ್ನು ಸ್ಥಾಪಿಸಲಾಗುವುದು' ಎಂದು ಅಂಬಾನಿ ತಿಳಿಸಿದರು.

ಪ್ರಸ್ತಾವಿತ ಮೆಗಾ ಹೂಡಿಕೆ ಯೋಜನೆಯ ಬಗ್ಗೆ ಹೆಚ್ಚಿನ ವಿವರ ನೀಡಲಿಲ್ಲ. ಈ ಮೊತ್ತದ ಬಂಡವಾಳವನ್ನು ಒಂದೇ ಹಂತದಲ್ಲಿ ಹೂಡಲಾಗುವುದೆ ಅಥವಾ ಹಂತ ಹಂತವಾಗಿ ಹೂಡಲಾಗುವುದೆ ಎಂಬ ಬಗ್ಗೆ ಹಾಗೂ ಡಿಜಿಟಲ್‌ ಕೈಗಾರಿಕಾ ಕೇಂದ್ರ ಸ್ಥಾಪನೆಯಾಗುವ ಸ್ಥಳ ಯಾವುದು ಎಂಬ ಬಗ್ಗೆ ಅವರು ಮಾಹಿತಿ ನೀಡಲಿಲ್ಲ.

ಪ್ರಧಾನಿ ನರೇಂದ್ರ ಮೋದಿ ಅವರು ಈ ಸಮಾವೇಶವನ್ನು ಉದ್ಘಾಟಿಸಿದ್ದರು.

ಆರ್‌ಐಎಲ್‌ನ ಈ ಯೋಜನೆಗೆ ಜಾಗತಿಕ ತಂತ್ರಜ್ಞಾನ ಸಂಸ್ಥೆಗಳಿಂದ ಅಭೂತಪೂರ್ವ ಸ್ಪಂದನೆ ದೊರೆತಿದೆ. ಕೆಲವೇ ವಾರಗಳಲ್ಲಿ 20ಕ್ಕೂ ಹೆಚ್ಚು ಜಾಗತಿಕ ಕಂಪನಿಗಳು ನಮ್ಮ ಜತೆ ಬಂಡವಾಳ ಹೂಡಲು ಒಪ್ಪಿಗೆ ಸೂಚಿಸಿವೆ. ಸಿಸ್ಕೋ, ಸೀಮೆನ್ಸ್‌, ಎಚ್‌ಪಿ, ಡೆಲ್‌, ನೋಕಿಯಾ ಮತ್ತು ಎನ್‌ವಿಡಿಯಾ ಕೂಡ ಇವುಗಳಲ್ಲಿ ಸೇರಿವೆ' ಎಂದು ಅಂಬಾನಿ ನುಡಿದರು.

ಉತ್ಪಾದನಾ ಕ್ರಾಂತಿಯಲ್ಲಿ ಚೀನಾ ಮಾಡಿದ ಸಾಧನೆಗಿಂತ ಎಷ್ಟೋ ಪಟ್ಟು ಹೆಚ್ಚು ಸಾಧನೆಯನ್ನು ನಾವು ಸೇವಾ ಕೇಂದ್ರಿತ ನಾಲ್ಕನೇ ಕೈಗಾರಿಕಾ ಕ್ರಾಂತಿಯಲ್ಲಿ ತ್ವರಿತವಾಗಿ ಮಾಡಬಹುದು ಎಂದು ಅವರು ಪ್ರತಿಪಾದಿಸಿದರು.

ದೇಶದ ಅತಿ ವೇಗದ ದೂರಸಂಪರ್ಕ ಜಾಲ ರಿಲಯನ್ಸ್‌ ಜಿಯೋ ಸ್ಥಾಪನೆಗೆ 1,400 ಕೋಟಿ ರೂ. ಬಂಡವಾಳ ಹೂಡಿದೆ. ಇದರಿಂದಾಗಿ ಭಾರತ ಜಗತ್ತಿನಲ್ಲೇ ನಂಬರ್ 1 ಡೇಟಾ ಬಳಕೆ ದೇಶವಾಗಿ ಮೂಡಿಬಂದಿದೆ. ಜಿಯೋ ಸೇವೆ ಆರಂಭಕ್ಕೆ ಮೊದಲು ಭಾರತ ಜಾಗತಿಕ ಡೇಟಾ ಬಳಕೆ ಪಟ್ಟಿಯಲ್ಲಿ 155ನೇ ಸ್ಥಾನದಲ್ಲಿತ್ತು.