17 ಲಕ್ಷದ ಚಾಕಲೇಟ್‌ ಹೊತ್ತೊಯ್ದ ಕಳ್ಳರು: ಸಿಸಿಟಿವಿಯೂ ಮಂಗಮಾಯ

ಲಖನೌ: ಕಾರು, ಚಿನ್ನ ಮುಂತಾದ ಐಷಾರಾಮಿ ವಸ್ತುಗಳನ್ನು ಕಳವು ಮಾಡುವುದನ್ನು ಕೇಳಿರುತ್ತಿರಿ. ಆದರೆ ಉತ್ತರ ಪ್ರದೇಶದಲ್ಲಿ ವಿಚಿತ್ರ ಘಟನೆಯೊಂದು ನಡೆದಿದ್ದು, ಕಳ್ಳರು ಕ್ಯಾಡ್‌ಬರಿ ಚಾಕಲೇಟ್‌ಗಳನ್ನು ಹೊತ್ತೊಯ್ದಿದ್ದಾರೆ. ಬರೋಬ್ಬರಿ 17 ಲಕ್ಷ ಮೌಲ್ಯದ ಚಾಕಲೇಟ್‌ಗಳು ಕಳವಾಗಿದ್ದು, ಪೊಲೀಸರು ಎಫ್‌ಐಆರ್‌ ದಾಖಲಿಸಿಕೊಂಡು ಕಳ್ಳರ ಬೆನ್ನು ಬಿದ್ದಿದ್ದಾರೆ. ಚಾಕಲೇಟ್‌ ಜತೆಗೆ ಸಿಸಿಟಿವಿ ಹಾಗೂ ಇನ್ನಿತರ ಎಲೆಕ್ಟ್ರಾನಿಕ್‌ ಪರಿಕರಣಗಳನ್ನೂ ಕಳ್ಳರು ಎಗರಿಸಿದ್ದಾರೆ.

ಉಡುಪಿಯಲ್ಲಿ 6 ವರ್ಷದ ಬಾಲಕಿಯ ಬಲಿ ಪಡೆದ ಚಾಕೋಲೇಟ್ ಕವರ್..!
ಇಲ್ಲಿನ ಚಿನ್ಹಾತ್‌ ಪ್ರದೇಶದಲ್ಲಿರುವ ಗೋದಾಮಿನಿಂದ ಈ ಕಳ್ಳತನ ನಡೆದಿದೆ. ಚಾಕಲೇಟ್‌ ತಯಾರಿಕೆ ತರಲಾಗಿದ್ದ ಸಿಹಿತಿಂಡಿಗಳನ್ನು ಕಳ್ಳರು ಕದ್ದೊಯ್ದಿದ್ದಾರೆ. ಮಂಗಳವಾರ ಹಾಗೂ ಬುಧವಾರ ರಾತ್ರಿ ಕಳ್ಳತನ ನಡೆದಿದ್ದು, ಚಿನ್ಹುಟ್‌ ಠಾಣೆ ಪೊಲೀಸರು ಪ್ರಕರಣದ ತನಿಖೆ ನಡೆಸುತ್ತಿದ್ದಾರೆ ಎಂದು ಸುದ್ದಿ ಸಂಸ್ಥೆಯೊಂದು ವರದಿ ಮಾಡಿದೆ.

ಕಳ್ಳತನ ಬೆಳಕಿಗೆ ಬಂದಿದ್ದು ಹೇಗೆ?
ತಯಾರಿಸಲಾದ ಚಾಕಲೇಟ್‌ ಹಾಗೂ ಚಾಕಲೇಟ್‌ ತಯಾರಿಕೆಗೆ ತಂದಿರುವ ಕಚ್ಚಾ ವಸ್ತುಗಳನ್ನು ಕಳ್ಳರು ಗೋದಾಮಿನ ಬಾಗಿಲು ಮುರಿದು ಹೊತ್ತೊಯ್ದಿದ್ದರು. ಗೋದಾಮಿನ ಬೀಗ ಮುರಿದಿದ್ದು, ಪಕ್ಕದ ಮನೆಯವರ ಗಮನಕ್ಕೆ ಬಂದಿತ್ತು. ಅವರು ಈ ಬಗ್ಗೆ ಚಾಕಲೇಟ್ ಡಿಸ್ಟ್ರಿಬ್ಯೂಟರ್‌ಗೆ ಮಾಹಿತಿ ನೀಡಿದ್ದಾರೆ. ಈ ವೇಳೆ ಕಳ್ಳತನವಾಗಿರುವುದು ಬೆಳಕಿಗೆ ಬಂದಿದೆ.

Chocolate Snail: ಚಾಕಲೇಟ್‌ನಿಂದಲೇ ಸಿದ್ಧವಾಯ್ತು ಬಸವನ ಹುಳು!: ಕಲಾ ಕೌಶಲ್ಯಕ್ಕೆ ಬೆರಗಾದ ನೆಟ್ಟಿಗರು
ಇನ್ನು ಘಟನೆಯ ಬಗ್ಗೆ ಮಾಹಿತಿ ನೀಡಿರುವ ಚಾಕಲೇಟ್‌ ವಿತರಕ ರಾಜೇಂದ್ರ ಸಿಂಗ್‌ ಸಿಧು, 'ಘಟನೆ ಸಂಬಂಧ ನಾವು ಚಿನ್ಹಟ್‌ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲು ಮಾಡಿದ್ದೇವೆ. ಈ ಬಗ್ಗೆ ಯಾರಿಗಾದರೂ ಮಾಹಿತಿ ಇದ್ದಿದ್ದೇ ಆದಲ್ಲಿ ನಮಗೆ ತಿಳಿಸಿ' ಎಂದು ಮನವಿ ಮಾಡಿಕೊಂಡಿದ್ದಾರೆ.

ಗೋದಾಮಿನಲ್ಲಿದ್ದ ಅಷ್ಟೂ ಚಾಕಲೇಟ್‌ಗಳನ್ನು ಕದ್ದೊಯ್ದಿರುವ ಕಳ್ಳರು, ಭದ್ರತೆಗಾಗಿ ಅಳವಡಿಸಲಾಗಿದ್ದ ಡಿಜಿಟಲ್‌ ವಿಡಿಯೋ ರೆಕಾರ್ಡರ್‌, ಸಿಸಿಟಿವಿ ಹಾಗೂ ಇನ್ನಿತರ ಎಲೆಕ್ಟ್ರಾನಿಕ್‌ ಉಪಕರಣಗಳನ್ನೂ ಹೊತ್ತೊಯ್ದಿದ್ದಾರೆ. ಅಕ್ಕ ಪಕ್ಕದ ಸಿಸಿಟಿವಿಗಳ ದೃಶ್ಯಗಳನ್ನು ಆಧರಿಸಿ ಪೊಲೀಸರು ತನಿಖೆ ಆರಂಭಿಸಿದ್ದಾರೆ.