ಈ ಹೋಟೆಲ್‌ನಲ್ಲಿ ನಿಮಗೆ ಸರ್ವ್‌ ಮಾಡೋದು ರೋಬೋಟ್‌ಗಳು

ಕೊಯಮತ್ತೂರು: ಅವೆಂಜರ್‌ಗಳಂತಹ ಸೂಪರ್ ಹೀರೊಗಳನ್ನು ನೀವು ಹಾಲಿವುಡ್ ಚಲನಚಿತ್ರಗಳಲ್ಲಿ ಮಾತ್ರ ನೋಡಿರಬಹುದು. ಆದರೆ ಇಂತಹ ಸೂಪರ್ ಹೀರೊಗಳಿಂದ ಸ್ಫೂರ್ತಿ ಪಡೆದ ರೋಬೋಟ್ ಥಿಮ್ ರೆಸ್ಟೋರೆಂಟ್ ನೆರೆಯ ತಮಿಳುನಾಡಿನ ಕೊಯಮತ್ತೂರಿನಲ್ಲಿ ತಲೆಯೆತ್ತಿದೆ.

ಇಲ್ಲಿಗೆ ಆಗಮಿಸುವ ಗ್ರಾಹಕರಿಗೆ ಅಡುಗೆ ಕೋಣೆಯಿಂದ ರೋಬೋಟ್‌ಗಳೇ ಆಹಾರವನ್ನು ಸರ್ವ್ ಮಾಡಲಿದೆ. ಪ್ರಸ್ತುತ ರೋಬೋಟ್‌ಗಳು ಅನೇಕ ಜನರ ಕೇಂದ್ರ ಬಿಂದುವಾಗಿ ಮಾರ್ಪಾಟ್ಟಿದೆ.

ಐದು ಉತ್ಸಾಹಿ ಯುವಕರು ರೋಬೋಟ್ ತಳಹದಿಯ ರೆಸ್ಟೋರೆಂಟ್ ತೆರೆದಿದ್ದಾರೆ. ಹಾಗೊಂದು ವೇಳೆ ತಮ್ಮ ಹಾದಿಯಲ್ಲಿ ಯಾರೇ ಅಡ್ಡ ಬಂದರೂ ತಕ್ಷಣ ಅಲ್ಲೇ ತಟಸ್ಥವಾಗುವ ರೋಬೋಟ್‌ಗಳು ಬದಿಗೆ ಸರಿದು ನಿಲ್ಲುವಂತೆ ಸೂಚಿಸುತ್ತದೆ.


ವಿದೇಶಗಳಲ್ಲಿ ರೋಬೋಟ್ ಥೀಮ್ ರೆಸ್ಟೋರೆಂಟ್‌ಗಳು ಸಾಮಾನ್ಯವಾಗಿದೆ. ಚೀನಾ ಹಾಗೂ ಆಫ್ರಿಕಾದಲ್ಲಿ ಇದನ್ನು ನೋಡಿರುವ ಮಾಲಿಕ ಕಾರ್ತಿಕೇಯನ್ ಮನದಲ್ಲೂ ಇಂತಹದೊಂದು ರೆಸ್ಟೋರೆಂಟ್ ಭಾರತದಲ್ಲೂ ಆರಂಭಿಸುವ ಯೋಚನೆ ಹೊಳೆದಿತ್ತು.

ಆಗಲೇ ವಿಮಾನ ಥೀಮ್ ಹೊಂದಿರುವ ರೆಸ್ಟೋರೆಂಟ್ ನಡೆಸುತ್ತಿರುವ ಇವರು ವಿದೇಶಿ ಕಂಪೆನಿಯಿಂದ ರೋಬೋಟ್‌ಗಳನ್ನು ಭಾರತಕ್ಕೆ ಆಮದು ಮಾಡಿದ್ದಾರೆ. ಎಂಟು ತಿಂಗಳುಗಳ ಹಿಂದೆ ಚೆನ್ನೈನಲ್ಲಿ ಮೊದಲ ರೆಸ್ಟೋರೆಂಟ್ ಆರಂಭಿಸಲಾಗಿತ್ತು. ಗ್ರಾಹಕರಿಂದ ಲಭಿಸಿದ ಧನಾತ್ಮಕ ಪ್ರತಿಕ್ರಿಯೆ ಹಾಗೂ ಬೇಡಿಕೆಯ ಮೆರೆಗೆ ಇದೀಗ ಕೊಯಮತ್ತೂರಿನಲ್ಲೂ ಪ್ರಾರಂಭಿಸಲಾಗಿದೆ.


ಚೈನೀಸ್, ಥಾಯ್ ಹಾಗೂ ಭಾರತೀಯ ಆಹಾರಗಳನ್ನು ಬಡಿಸಲು ಎಂಟು ರೋಬೋಟ್‌ಗಳನ್ನು ಇರಿಸಲಾಗಿದೆ. ಐಪ್ಯಾಡ್ ಮೂಲಕ ಗ್ರಾಹಕರು ತಮ್ಮ ಮೆನುಗಳನ್ನು ಆರ್ಡರ್ ಮಾಡಬಹುದಾಗಿದೆ. ಬಳಿಕ ಷೆಫ್ಸ್ ಆಹಾರಗಳನ್ನು ನಿರ್ದಿಷ್ಟ ಟೇಬಲ್‌ಗಳಿಗೆ ರೋಬೋಟ್ ಮೂಲಕ ಹಸ್ತಾಂತರಿಸಲಿದ್ದಾರೆ. ಹಾಗಿದ್ದರೂ ರೋಬೋಟ್ ಟ್ರೇಗಳಿಂದ ಆಹಾರಗಳನ್ನು ಟೇಬಲ್‌ಗಳಿಗೆ ವರ್ಗಾಯಿಸಲು ವೇಟರ್‌ಗಳ ಸೇವೆಗಳನ್ನು ಪಡೆಯಲಾಗುತ್ತದೆ.

ಅಂದ ಹಾಗೆ ಪ್ರತಿ ರೋಬೋಟ್‌ಗಳ ಬೆಲೆ ಅಂದಾಜು ಏಳು ಲಕ್ಷ ರೂ.ಗಳಷ್ಟು ಬೆಲೆ ಬಾಳುತ್ತದೆ.