ರೋಲ್ಸ್‌ರಾಯ್ಸ್‌, ಡೈಮಂಡ್‌ ವಾಚ್‌; ಗುರುವಾರ ನೀರವ್‌ ಮೋದಿ ಆಸ್ತಿ ಹರಾಜು

ಮುಂಬಯಿ: ದೇಶಬಿಟ್ಟು ಪರಾರಿಯಾಗಿರುವ ವಜ್ರದ ವ್ಯಾಪಾರಿ ನೀರವ್‌ ಮೋದಿ ಅವರ ಐಶಾರಾಮಿ ಕಾರ್‌ ರೋಲ್ಸ್‌ರಾಯ್ಸ್‌ ಘೋಸ್ಟ್‌, ಡೈಮಂಡ್‌ ವಾಚ್‌ಗಳು ಮತ್ತು ಅಪರೂಪದ ಕಲಾಕೃತಿಗಳೂ ಸೇರಿದಂತೆ 112 ಆಸ್ತಿಗಳ ಮಾರಾಟಕ್ಕೆ ವೇದಿಕೆ ಸಜ್ಜಾಗಿದೆ. ಗುರುವಾರ ಹರಾಜು ಪ್ರಕ್ರಿಯೆ ನಡೆಯಲಿದೆ.

ಜಾರಿ ನಿರ್ದೇಶನಾಲಯದ(ಇ.ಡಿ) ಪರವಾಗಿ ಸಾಫ್ರೊನಾರ್ಟ್‌ ಈ ಹರಾಜನ್ನು ನಡೆಸಲಿದೆ. 72 ಆಸ್ತಿಗಳನ್ನು ಆನ್‌ಲೈನ್‌ ಮೂಲಕ ಹರಾಜಿಗೆ ಇಡಲಾಗುತ್ತದೆ. ಪಂಜಾಬ್‌ ನ್ಯಾಷನಲ್‌ ಬ್ಯಾಂಕಿಗೆ 14,000 ಕೋಟಿ ರೂ ವಂಚನೆ ಮಾಡಿ, ದೇಶ ತೊರೆದಿರುವ ನೀರವ್‌ ವಿರುದ್ಧ ತನಿಖೆ ಮುಂದುವರಿದಿದೆ. ಪ್ರಸ್ತುತ ನೀರವ್‌ ಬ್ರಿಟಿಷ್‌ ಜೈಲಿನಲ್ಲಿದ್ದಾರೆ.

ಕಳೆದ ವರ್ಷದ ಮಾರ್ಚ್‌ನಲ್ಲಿ ನೀರವ್‌ರ ಕಲಾಕೃತಿಗಳನ್ನು ಹರಾಜಿನ ಮೂಲಕ ಮಾರಾಟ ಮಾಡಿದ್ದ ಸಾಫ್ರೊನಾರ್ಟ್‌ ಸಂಸ್ಥೆಯು 55 ಕೋಟಿ ರೂ. ಸಂಗ್ರಹಿಸಿತ್ತು. 1935ರಲ್ಲಿಅಮೃತಾ ಶೇರ್‌-ಗಿಲ್‌ ಅವರು ಬರೆದಿದ್ದ 'ಬಾಯ್ಸ್‌ ವಿತ್‌ ಲೆಮನ್ಸ್‌' ಕಲಾಕೃತಿಯು ಗುರುವಾರದ ಹರಾಜಿಗೆ ಬರುವ ಸಾಧ್ಯತೆ ಇದೆ. 12-18 ಕೋಟಿ ರೂ.ಗೆ ಅದು ಮಾರಾಟವಾಗುವ ಅವಕಾಶಗಳಿವೆ. ರೋಲ್ಸ್‌ ರಾಯ್ಸ್‌ ಘೋಸ್ಟ್‌ ಕಾರಿಗೆ ಹರಾಜಿನಲ್ಲಿ 95 ಲಕ್ಷ ರೂ.ತನಕ ಬೆಲೆ ಬರುವ ನಿರೀಕ್ಷೆ ಇದೆ.