ಹೊಸದಿಲ್ಲಿ : ದೇಶದ 371 ಜಿಲ್ಲಾ ಸಹಕಾರಿ ಬ್ಯಾಂಕ್‌ಗಳಲ್ಲಿ (ಡಿಸಿಬಿ) 500 ರೂ. ಮತ್ತು 1,000 ರೂ.ಗಳ ಒಟ್ಟು 8,000 ಕೋಟಿ ರೂ. ಬೆಲೆಯ ಹಳೆಯ ರದ್ದಾಗಿರುವ ಕರೆನ್ಸಿ ನೋಟುಗಳ ಸಂಗ್ರಹ ಇದೆ ಎಂದು ಎನ್‌ಸಿಪಿ ಮುಖ್ಯಸ್ಥ ಶರದ್‌ ಪವಾರ್‌ ಹೇಳಿದ್ದಾರೆ.
ರಿಸರ್ವ್‌ ಬ್ಯಾಂಕ್‌ ಆಫ್‌ ಇಂಡಿಯಾ ಈ ರದ್ದಾಗಿರುವ ನೋಟುಗಳನ್ನು ಸಹಕಾರಿ ಬ್ಯಾಂಕ್‌ಗಳಿಂದ ಸ್ವೀಕರಿಸಲು ಒಪ್ಪದಿರುವ ಕಾರಣ, ಸಹಕಾರಿ ಬ್ಯಾಂಕ್‌ಗಳ ಕರೆನ್ಸಿ ಚೆಸ್ಟ್‌ಗಳಲ್ಲಿ ಕೊಳೆಯುತ್ತಿವೆ ಎಂದು ಪವಾರ್‌ ರಾಜ್ಯಸಭೆಯಲ್ಲಿ ತಿಳಿಸಿದರು.
ಸರಕಾರವು ಡಿಸಿಬಿಗಳಲ್ಲಿ ಕೊಳೆಯುತ್ತಿರುವ ಈ ಹಳೆ ನೋಟುಗಳನ್ನು ಆರ್‌ಬಿಐ ಸ್ವೀಕರಿಸಲು ಅನುವು ಮಾಡಿಕೊಡಬೇಕು. ನೋಟು ಅಮಾನ್ಯತೆಯ ನಂತರ ಡಿಸಿಬಿಗಳಿಗೆ ಸಾಲ ವಿತರಿಸುವ ಸಾಮರ್ಥ್ಯ ಗಣನೀಯವಾಗಿ ಕುಸಿದಿದೆ ಎಂದರು. ಕೃಷಿ ಸಾಲ ವಿತರಣೆಗೆ ಭಾರಿ ತೊಡಕು ಉಂಟಾಗಿದೆ ಎಂದರು.
ಸರಕಾರವು 2016ರ ನವೆಂಬರ್‌ 8ರಂದು ನೋಟಿ ಅಮಾನ್ಯತೆ ಘೋಷಿಸಿದ ನಂತರ ಡಿಸಿಬಿಗಳು ರದ್ದಾದ ಕರೆನ್ಸಿಗಳನ್ನು ಹೊಸತಕ್ಕೆ ವಿನಿಮಯ ಮಾಡಿಕೊಳ್ಳುವುದನ್ನು ನಿಷೇಧಿಸಿತ್ತು. ನ.14ರಂದು ಡಿಸಿಬಿಗಳು ಹಳೆ ನೋಟುಗಳನ್ನು ಸ್ವೀಕರಿಸುವುದನ್ನೂ ನಿರ್ಬಂಧಿಸಿತ್ತು.