19 ತಿಂಗಳ ಕನಿಷ್ಠ ಮಟ್ಟಕ್ಕೆ ರೂಪಾಯಿ ಕುಸಿತ

ಮುಂಬಯಿ: ಕಚ್ಚಾ ತೈಲದ ದರ ಏರಿಕೆ ಮತ್ತು ಜಾಗತಿಕ ಪ್ರಭಾವಗಳಿಂದ ರೂಪಾಯಿ ದರವು ಬುಧವಾರ ಕಳೆದ 19 ತಿಂಗಳಲ್ಲಿಯೇ ಕನಿಷ್ಠ ಮಟ್ಟಕ್ಕೆ ಕುಸಿದಿದೆ. ಡಾಲರ್‌ ಎದುರು ರೂಪಾಯಿ ದರವು 37 ಪೈಸೆ ಅಥವಾ ಶೇ.0.54ರಷ್ಟು ಕುಸಿದಿದ್ದು ರೂ.68.61ಕ್ಕೆ ಇಳಿಕೆಯಾಗಿದೆ. 2016ರ ನವೆಂಬರ್‌ 24ರಂದು ರೂಪಾಯಿ ದರ ರೂ.68.73ಕ್ಕೆ ಇಳಿದಿತ್ತು.

ಬೆಳೆಯುತ್ತಿರುವ ಕಚ್ಚಾ ತೈಲ ಬೆಲೆಗಳು, ಹೆಚ್ಚುತ್ತಿರುವ ಚಾಲ್ತಿ ಖಾತೆ ಕೊರತೆ ಮತ್ತು ಹಣದುಬ್ಬರದಲ್ಲಿನ ಏರಿಕೆಯ ಆತಂಕದಿಂದ ಡಾಲರ್‌ ಎದುರು ರೂಪಾಯಿ ದುರ್ಬಲವಾಗುತ್ತಿದೆ. ಅಲ್ಪ ವಿರಾಮದ ಬಳಿಕ, ಕಚ್ಚಾ ತೈಲದ ದರಗಳು ಮತ್ತೆ ಏರಿಕೆಯಾಗುತ್ತಿವೆ. ತನ್ನ ಮಿತ್ರ ರಾಷ್ಟ್ರಗಳಿಗೆ ಇರಾನ್‌ನಿಂದ ಇಂಧನ ಆಮದು ಮಾಡಿಕೊಳ್ಳದಂತೆ ಅಮೆರಿಕ ಕರೆ ನೀಡಿದೆ. ಕಚ್ಚಾ ತೈಲದ ದರ ಶೇ.0.5 ಏರಿಕೆಯಾಗಿ ಬ್ಯಾರೆಲ್‌ಗೆ 76.78 ಡಾಲರ್‌ ಮುಟ್ಟಿದೆ. ಇದೂ ರೂಪಾಯಿ ಕುಸಿತಕ್ಕೆ ಕಾರಣವಾಯಿತು. ಬ್ಯಾಂಕಿಂಗ್‌ ವಲಯದ ಸ್ಥಿರತೆಗೆ ಸಂಬಂಧಿಸಿದಂತೆ ಆರ್‌ಬಿಐ ಸಕಾರಾತ್ಮಕ ಅಭಿಪ್ರಾಯವನ್ನು ವ್ಯಕ್ತಪಡಿಸಿಲ್ಲ.

ಕಳೆದ ವರ್ಷ ರೂಪಾಯಿ ದರ ಶೇ.5.96ರಷ್ಟು ವೃದ್ಧಿಯಾಗಿತ್ತು. ಪರಿಸ್ಥಿತಿ ಹೀಗೆಯೇ ಮುಂದುವರಿದರೆ, ಈ ವರ್ಷದ ಡಿಸೆಂಬರ್‌ ವೇಳೆಗೆ ಡಾಲರ್‌ ಎದುರು ರೂಪಾಯಿ ಮೌಲ್ಯ ರೂ.70ಕ್ಕೆ ಇಳಿಕೆಯಾಗುವ ನಿರೀಕ್ಷೆ ಇದೆ. ಎಕನಾಮಿಕ್‌ ಟೈಮ್ಸ್‌ ಸಮೀಕ್ಷೆಯ ಪ್ರಕಾರ ರೂಪಾಯಿ ಮತ್ತಷ್ಟು ಇಳಿಯಲಿದ್ದು, ಜಾಗತಿಕ ಮಟ್ಟದ ಅನಿಶ್ಚಿತತೆಯೇ ಇದಕ್ಕೆ ಕಾರಣ. ಈ ವರ್ಷ ಪ್ರಗತಿಶೀಲ ಮಾರುಕಟ್ಟೆಗಳ ಕರೆನ್ಸಿಗಳಲ್ಲಿಯೇ ರೂಪಾಯಿ ಹೆಚ್ಚು ನಷ್ಟಕ್ಕೀಡಾಗಿದೆ.ಇದುವರೆಗೆ ಶೇ.6.7ರಷ್ಟು ಮೌಲ್ಯ ಕಳೆದುಕೊಂಡಿದೆ. ಡಾಲರ್‌ ಎದುರು ರೂಪಾಯಿ ಮೌಲ್ಯ ಇಳಿದರೆ, ಆಮದು ವೆಚ್ಚ ತುಟ್ಟಿಯಾಗುತ್ತದೆ. ತೈಲ ಆಮದು ಕೂಡ ದುಬಾರಿಯಾಗುತ್ತದೆ. ವಿದೇಶಿ ಶಿಕ್ಷಣ, ಪ್ರವಾಸ ತುಟ್ಟಿಯಾಗುತ್ತದೆ. ಆದರೆ ರಫ್ತುದಾರರಿಗೆ ಇದು ಲಾಭದಾಯಕ. ಮಾಹಿತಿತಂತ್ರಜ್ಞಾನ ವಲಯಕ್ಕೂ ಅನುಕೂಲಕರ.