ರೂಪಾಯಿ ಪಾತಾಳಕ್ಕೆ, ತಯಾರಿಕಾ ವೆಚ್ಚ ಗಗನಕ್ಕೆ, ಮತ್ತೆ ಸೋಪ್‌ನಿಂದ ಬಿಸ್ಕತ್‌ ತನಕ ದರ ಏರಿಕೆ!

ಮುಂಬಯಿ: ಅಮೆರಿಕದ ಡಾಲರ್‌ ಎದುರು ಭಾರತದ ಕರೆನ್ಸಿ ರೂಪಾಯಿ ದುರ್ಬಲಗೊಂಡಿದ್ದು, ಗ್ರಾಹಕ ಸರಕುಗಳ ಮಾರುಕಟ್ಟೆ ಮೇಲೆ ಒತ್ತಡ ಹೆಚ್ಚಾಗಿದೆ. ಹೀಗಾಗಿ ಸ್ಮಾರ್ಟ್‌ಫೋನ್‌, ಲ್ಯಾಪ್‌ಟಾಪ್‌, ಟಿವಿ, ರೆಫ್ರಿಜಿರೇಟರ್‌ ಸೇರಿದಂತೆ ಕೆಲವು ಉತ್ಪನ್ನಗಳ ದರ ಏರಿಕೆಯಾಗಲಿದೆ ಎಂದು ಮಾರುಕಟ್ಟೆ ತಜ್ಞರು ಅಂದಾಜು ಮಾಡಿದ್ದಾರೆ.

ಅಲ್ಲದೇ, ಸಾಬೂನಿನಿಂದ ಬಿಸ್ಕತ್‌ ತನಕ ಎಫ್‌ಎಂಸಿಜಿ (ತ್ವರಿತ ಮಾರಾಟದ ಗ್ರಾಹಕ ವಸ್ತುಗಳು) ವಲಯದ ಪದಾರ್ಥಗಳ ದರವೂ ಏರಿಕೆಯಾಗಲಿದೆ. ಹಿಂದೂಸ್ತಾನ್‌ ಯುನಿಲಿವರ್‌, ಬ್ರಿಟಾನಿಯಾ, ಟಾಟಾ ಕನ್ಸೂಮರ್‌ ಪ್ರೊಡಕ್ಟ್ಸ್‌, ಡಾಬರ್‌ ಸೇರಿದಂತೆ ಎಫ್‌ಎಂಸಿಜಿ ವಲಯದ ಪ್ರಮುಖ ಕಂಪನಿಗಳು ಬಿಸ್ಕತ್‌, ಸಕ್ಕರೆ, ಸಾಬೂನು ಸೇರಿದಂತೆ ನಾನಾ ಉತ್ಪನ್ನಗಳ ದರಗಳನ್ನು ಏರಿಕೆ ಮಾಡಲಿವೆ.

ಡಾಲರ್‌ ಎದುರು ಭಾರತದ ಕರೆನ್ಸಿ 77 ರೂ.ಗಿಂತ ಕೆಳಗೆ ಕುಸಿದಿರುವುದರಿಂದ ಆಮದು ಕಚ್ಚಾ ವಸ್ತುಗಳನ್ನು ಒಳಗೊಂಡ ಉತ್ಪನ್ನಗಳ ದರ ಹೆಚ್ಚಳ ಮಾಡಬೇಕಾದ ಒತ್ತಡ ಉತ್ಪಾದಕ ಕಂಪನಿಗಳ ಮೇಲಿದೆ.

ಈ ತಿಂಗಳೇ ದರ ಹೆಚ್ಚಳ

ಈಗಾಗಲೇ ಮಾರ್ಚ್ ಅಂತ್ಯ ಅಥವಾ ಏಪ್ರಿಲ್‌ನಲ್ಲಿ ಕೆಲವು ಪದಾರ್ಥಗಳ ದರಗಳು ಏರಿಕೆಯಾಗಿದ್ದು, ಎರಡನೇ ಹಂತದ ಬೆಲೆ ಹೆಚ್ಚಳವು ಮೇ 2-3ನೇ ವಾರದಿಂದಲೇ ಆರಂಭವಾಗಬಹುದು ಎಂದು ಉದ್ಯಮದ ಮೂಲಗಳು ತಿಳಿಸಿವೆ.

ತಾಳೆ ಎಣ್ಣೆ ರಫ್ತು ತೆರಿಗೆ ಕಡಿತಗೊಳಿಸಲು ಮಲೇಷ್ಯಾ ಚಿಂತನೆ, ಇಳಿಯುವುದೇ ಅಡುಗೆ ಎಣ್ಣೆ ದರ?
ಅಲ್ಯುಮಿನಿಯಂ, ಪ್ಲಾಸ್ಟಿಕ್‌ ತುಟ್ಟಿ

ರೂಪಾಯಿ ಕುಸಿತದ ಪರಿಣಾಮ, ಈಗಾಗಲೇ ಕಳೆದ ಎರಡು ತಿಂಗಳಲ್ಲಿ ಅಲ್ಯುಮಿನಿಯಂ, ಉಕ್ಕು, ಪ್ಲಾಸ್ಟಿಕ್‌ನಂಥ ಸರಕುಗಳ ದರಗಳು ಶೇ. 8ರಿಂದ 10ರ ತನಕ ಏರಿಕೆಯಾಗಿವೆ. ಹೆಚ್ಚುವರಿ ವೆಚ್ಚಗಳನ್ನು ಭರಿಸುತ್ತಿರುವ ಕಾರಣಕ್ಕೆ ಕಂಪನಿಗಳ ಲಾಭದ ಪ್ರಮಾಣ ಗಣನೀಯ ಕುಸಿದಿದೆ ಎಂದು ಹೈಯರ್‌ ಇಂಡಿಯಾ ಅಧ್ಯಕ್ಷ ಸತೀಶ್‌. ಎನ್‌.ಎಸ್‌ ಹೇಳಿದ್ದಾರೆ.

ದುಬಾರಿ ದುನಿಯಾ

* ಕಳೆದ ತಿಂಗಳು ಬಹುತೇಕ ಕಂಪನಿಗಳು ಉತ್ಪನ್ನಗಳ ದರವನ್ನು ಶೇ. 5-6ರಷ್ಟು ಹೆಚ್ಚಳ ಮಾಡಿದ್ದು, ಈ ತಿಂಗಳು ಇನ್ನಷ್ಟು ಏರಿಕೆ.

* ಸ್ಮಾರ್ಟ್‌ಫೋನ್‌ ಮತ್ತು ಕಂಪ್ಯೂಟರ್‌ಗಳ ದರಗಳು ಈ ತಿಂಗಳಿಂದಲೇ ಶೇ. 3-5ರಷ್ಟು ಏರಿಕೆ.

* ಕಾರ್‌ ಉತ್ಪಾದಕ ಕಂಪನಿಗಳ ಮೇಲೂ ದರ ಏರಿಕೆಯ ಒತ್ತಡ ಸೃಷ್ಟಿಯಾಗಿದೆ.

* ಹೈಯರ್‌ ಇಂಡಿಯಾದ ಉತ್ಪನ್ನಗಳ ದರ ಕಳೆದ ತಿಂಗಳು ಶೇ. 3, ಈ ತಿಂಗಳು ಶೇ. 3 ರಿಂದ 5ರಷ್ಟು ಏರಿಕೆ.

* ತುಟ್ಟಿಯಾಗಲಿವೆ ಬಿಸ್ಕತ್‌, ರಸ್ಕ್‌, ಬ್ರೆಡ್‌, ಕೇಕ್‌, ಡೇರಿ ಉತ್ಪನ್ನಗಳು

* ರೂಪಾಯಿ ಕುಸಿತದ ಪರಿಣಾಮ ನಮ್ಮ ಉತ್ಪನ್ನಗಳ ದರ ಹೆಚ್ಚಳವು ಜೂನ್‌ನಲ್ಲಿ ಕಂಡು ಬರಲಿದೆ ಎಂದು ಗೋಡ್ರೆಜ್‌ ಅಪ್ಲೈನ್ಸಸ್‌ ಸಂಸ್ಥೆಯ ಬಿಸಿನೆಸ್‌ ಹೆಡ್‌ ಕಮಲ್‌ ನಂದಿ ಹೇಳಿದ್ದಾರೆ.

* ಮಾರ್ಚ್ನಲ್ಲೇ ಶೇ. 8 ರಿಂದ 10ರಷ್ಟು ದರಗಳನ್ನು ಏರಿಕೆ ಮಾಡಿದ್ದೇವೆ. ಮತ್ತೆ ಪ್ರಸಕ್ತ ತ್ರೈಮಾಸಿಕದಲ್ಲಿ ಶೇ. 7-8ರಷ್ಟು ಏರಿಕೆ ಮಾಡುವ ಯೋಜನೆ ಇದೆ ಎಂದು ಪಾರ್ಲೆ ಕಂಪನಿ ಹೇಳಿದೆ.

* ಟಿವಿಎಸ್‌ ಸ್ಕೂಟರ್‌, ಮೋಟಾರ್‌ ಸೈಕಲ್‌ಗಳು 1,000 ರೂಪಾಯಿಯಿಂದ 2,500 ರೂ. ತನಕ ಏರಿಕೆ.



ಬಿಸ್ಕತ್‌ ದರವೂ ಹೆಚ್ಚಳ

ಬ್ರಿಟಾನಿಯಾ ಇಂಡಸ್ಟ್ರೀಸ್‌ ಪ್ರಸಕ್ತ ಹಣಕಾಸು ವರ್ಷದಲ್ಲಿ ಬಿಸ್ಕತ್‌ ಸೇರಿದಂತೆ ತನ್ನ ಉತ್ಪನ್ನಗಳ ದರಗಳು ಶೇ. 10ರಷ್ಟು ಏರಿಕೆಯಾಗುವ ಸಾಧ್ಯತೆಗಳಿವೆ. ಹಿಟ್ಟು, ಸಕ್ಕರೆ, ಬಾದಾಮಿ, ಗೋಡಂಬಿ, ಪ್ಯಾಕೇಜ್‌ ಪದಾರ್ಥಗಳು ತುಟ್ಟಿಯಾಗಿವೆ ಎಂದು ಬ್ರಿಟಾನಿಯಾ ಕಂಪನಿ ಎಂಡಿ ವರಣ್‌ ಬೆರ್ರಿ ಹೇಳಿದ್ದಾರೆ.

ಅಡುಗೆ ಎಣ್ಣೆ ದರ ಇಳಿಯುತ್ತಾ?

ಜಾಗತಿಕ ಮಾರುಕಟ್ಟೆಯಲ್ಲಿಅಡುಗೆ ಎಣ್ಣೆಯ ದರಗಳು ಟನ್‌ಗೆ 100 ಡಾಲರ್‌ ಇಳಿಕೆಯಾಗಿದೆ. ದರ ಇಳಿಸಲು ಇದರಿಂದ ಅವಕಾಶವಿದೆ. ಆದರೆ, ರೂಪಾಯಿ ಕುಸಿತದ ಪರಿಣಾಮ ಟನ್‌ಗೆ 50 ಡಾಲರ್‌ ಹೊರೆ ಬೀಳಲಿದೆ. ಇದರಿಂದಾಗಿ ದರ ಇಳಿಕೆಯ ಅವಕಾಶವು ಇಲ್ಲದಂತಾಗಿದೆ ಎಂದು ಫ್ಯೂಚರ್‌ ಬ್ರ್ಯಾಂಡ್‌ ಅಡುಗೆ ಎಣ್ಣೆ ಉತ್ಪಾದಿಸುವ ಅದಾನಿ ವಿಲ್ಮಾರ್ ಕಂಪನಿಯ ಮುಖ್ಯ ಅಧಿಕಾರಿ ಅಂಗ್‌ಶು ಮಲಿಕ್‌ ಹೇಳಿದ್ದಾರೆ.

ವರ್ಷದಲ್ಲಿಸಗಟು ಹಣದುಬ್ಬರ ಏರಿಕೆ (ಶೇಕಡಾವಾರು)

ಮೂಲ ವಸ್ತುಗಳು - 25.97

ಎಣ್ಣೆ ಬೀಜಗಳು - 22.49

ತರಕಾರಿಗಳು - 19.88

ಗೋಧಿ - 14.4

ಕಚ್ಚಾ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ - 69.20

ಕೆಮಿಕಲ್‌ ಮತ್ತು ಈ ಸಂಬಂಧಿ ಉತ್ಪನ್ನಗಳು - 12.66

ತೀಕ್ಷ್ಣ ಒಳನೋಟ ಹಾಗೂ 20ಕ್ಕೂ ಹೆಚ್ಚು ವಲಯಗಳ ವಿಸ್ತೃತ ಮಾಹಿತಿ ಒಳಗೊಂಡ 'ಎಕನಾಮಿಕ್ ಟೈಮ್ಸ್' ವಿಶೇಷ ಲೇಖನಗಳಿಗಾಗಿ ಈಗಲೇ ಸಬ್‌ಸ್ಕ್ರೈಬ್ ಆಗಿ.