ರುಪಾಯಿ ಮೌಲ್ಯ ದಾಖಲೆ ಕುಸಿತ, ಡಾಲರ್ ಎದುರು ಅಧೋಗತಿ..

ನವದೆಹಲಿ : ಅಮೆರಿಕನ್ ಡಾಲರ್ ಎದುರು ಭಾರತೀಯ ರುಪಾಯಿ ಮೌಲ್ಯದ ಕುಸಿತ ಹೊಸ ದಾಖಲೆಯನ್ನೇ ನಿರ್ಮಿಸಿದೆ. ಎಎನ್ಐ ವರದಿಯ ಪ್ರಕಾರ ಭಾರತದ ರುಪಾಯಿ ಮೌಲ್ಯ 72.03 ರು.ಗೆ ಕುಸಿದಿದೆ. ಅಮೆರಿಕದ ಒಂದು ಡಾಲರ್ ಗೆ ಭಾರತ 72.03 ರುಪಾಯಿ ತೆರಬೇಕಾಗಿ ಬಂದಿದೆ.

ನಿನ್ನೆಯಷ್ಟೇ ಭಾರತೀಯ ರುಪಾಯಿ ಮೌಲ್ಯ 71.81 ರು.ಗೆ ಕುಸಿತ ಕಂಡಿತ್ತು. ಇದೀಗ ಮತ್ತೆ 22 ಪೈಸೆ ಕುಸಿತ ಕಂಡಿದೆ. ಮಾರುಕಟ್ಟೆ ಪರಿಣಿತರ ಪ್ರಕಾರ, ವಿದೇಶೀ ಬಂಡವಾಳ ಹರಿವಿನ ಹೆಚ್ಚಳವೇ ಇದಕ್ಕೆ ಕಾರಣ. ಡಿಸೆಂಬರ್ 20, 2018ರ ನಂತರ ಇದೇ ಮೊದಲ ಬಾರಿಗೆ ಭಾರತದ ರುಪಾಯಿ ಮೌಲ್ಯದಲ್ಲಿ ಭಾರೀ ಪ್ರಮಾಣದ ಕುಸಿತ ದಾಖಲಾಗಿದೆ.

ಆಟೋಮೊಬೈಲ್ ಕ್ಷೇತ್ರದಲ್ಲಿನ ಹಿನ್ನಡೆ, ಉದ್ಯೋಗ ಕಡಿತದ ಭೀತಿ ಬೆನ್ನಲ್ಲೇ ರುಪಾಯಿ ಮೌಲ್ಯದ ಕುಸಿತ ಕೂಡಾ ಆಗಿರೋದು ಆರ್ಥಿಕ ಹಿಂಜರಿಕೆಯ ಭೀತಿಗೆ ತುಪ್ಪ ಸುರಿದಂತಾಗಿದೆ.

ಹಾಗೆ ನೋಡಿದ್ರೆ ಜಾಗತಿಕ ಮಟ್ಟದಲ್ಲಿ ಭಾರೀ ಆರ್ಥಿಕ ಏರಿಳಿತಗಳು ಆಗ್ತಿವೆ. ಅಮೆರಿಕ ಹಾಗೂ ಚೀನಾ ನಡುವಿನ ಘರ್ಷಣೆಯಿಂದಾಗಿ ಚೀನಾದ ಕರೆನ್ಸಿ ಯುವಾನ್ ಮೌಲ್ಯ ಕೂಡಾ ಕುಸಿತ ಕಾಣ್ತಿದೆ. ಇದರ ನೇರ ಪರಿಣಾಮ ಭಾರತದ ರುಪಾಯಿ ಮೇಲೂ ಆಗ್ತಿದೆ.

ಒಂದು ಹಂತದಲ್ಲಿ ಭಾರತದ ರುಪಾಯಿ ಮೌಲ್ಯ ಇನ್ನೂ 47 ಪೈಸೆಗಳಷ್ಟು ಕುಸಿತ ಕಾಣಬಹುದು ಎಂದು ಅಂದಾಜಿಸಲಾಗಿತ್ತು. ಅಂತಿಮವಾಗಿ ಈ ತಿಂಗಳ ಅಂತ್ಯಕ್ಕೆ ಅಮೆರಿಕದ ಡಾಲರ್ ಎದುರು ಭಾರತದ ರುಪಾಯಿ ಮೌಲ್ಯ 72.50 ರು.ಗೆ ಕುಸಿದರೂ ಅಚ್ಚರಿಯಿಲ್ಲ ಎನ್ನಲಾಗ್ತಿದೆ.

ಇವೆಲ್ಲದರ ನಡುವೆ ಟ್ವಿಟರ್ ಸೇರಿದಂತೆ ಸಾಮಾಜಿಕ ಜಾಲತಾಣಗಳಲ್ಲಿ ರುಪಾಯಿ ಮೌಲ್ಯ ಕುಸಿತಕ್ಕೆ ಪ್ರಧಾನಿ ಮೋದಿ ಸರ್ಕಾರದ ಆಡಳಿತ ವೈಖರಿಯೇ ಕಾರಣ ಎಂದು ಲೇವಡಿ ಮಾಡಲಾಗುತ್ತಿದೆ. 2010ರಲ್ಲಿ ಭಾರತದ ರುಪಾಯಿ ಮೌಲ್ಯ ಅಮೆರಿಕ ಡಾಲರ್ ಎದುರು 46.77 ರು.ಗೆ ಕುಸಿದಾಗ ಮೋದಿ ನೀಡಿದ್ದ ಹೇಳಿಕೆಗಳನ್ನು ನೆಟ್ಟಿಗರು ನೆನಪು ಮಾಡಿಕೊಡ್ತಿದ್ದಾರೆ. ಭ್ರಷ್ಟಾಚಾರ ಸೇರಿದಂತೆ ಯುಪಿಎ ಸರ್ಕಾರದ ಹಲವು ವೈಫಲ್ಯಗಳೇ ರುಪಾಯಿ ಮೌಲ್ಯ ಕುಸಿತಕ್ಕೆ ಕಾರಣ ಎಂದು 2010ರಲ್ಲಿ ಗುಜರಾತ್ ಮುಖ್ಯಮಂತ್ರಿಗಿದ್ದ ಮೋದಿ ಟೀಕೆ ಮಾಡಿದ್ದರು.