ವರ್ಷಕ್ಕೆ 155 ಕೋಟಿ ಸಂಪಾದಿಸಿದ 7 ವರ್ಷದ ಬಾಲಕ, ಅದು ಹೇಗೆ?

ನ್ಯೂಯಾರ್ಕ್: ಮಕ್ಕಳಾಗಿದ್ದಾಗ ನಾವೇನು ಮಾಡುತ್ತಿದ್ದೆವು? ಒಮ್ಮೆ ಯೋಚಿಸಿ. ಆಟ, ಪಾಠ, ನಿದ್ದೆ, ತರಲೆ.. ಅಷ್ಟೇ.. ಆದರೆ ರಿಯಾನ್ ಎಂಬ ಈ 7 ವರ್ಷ ಪ್ರಾಯದ ಬಾಲಕ ಯೂಟ್ಯೂಬ್ ಸ್ಟಾರ್ ಆಗಿದ್ದು ವೀಡಿಯೋ ಜಾಲತಾಣದ ಮೂಲಕ ವರ್ಷಕ್ಕೆ155 ಕೋಟಿ ಸಂಪಾದನೆ ಮಾಡುತ್ತಿದ್ದಾನೆ ಎಂದರೆ ನೀವು ನಂಬಲೇಬೇಕು.

ಯಾರೀತ

ಅಮೇರಿಕಾದ ನಿವಾಸಿಯಾಗಿರುವ ರೇಯಾನ್ Ryan Toys Review ಎಂಬ ವೀಡಿಯೋ ಚಾನೆಲ್‌ ನಡೆಸುತ್ತಿದ್ದು ಹಾಲುಗಲ್ಲದ ವಯಸ್ಸಿನಲ್ಲಿ ಜಗದ್ವಿಖ್ಯಾತನಾಗಿದ್ದಾನೆ. 2015ರಲ್ಲಾತ ಇದನ್ನು ಆರಂಭಿಸಿದ್ದು ಇಲ್ಲಿಯವರೆಗೆ 1.73 ಕೋಟಿ ಫಾಲೋವರ್ಸ್ ಹೊಂದಿದ್ದಾನೆ.

ಫೋರ್ಬ್ಸ್ ಬಿಡುಗಡೆ ಮಾಡಿರುವ ಯೂಟ್ಯೂಬ್‌ನಲ್ಲಿ ಸರ್ವಾಧಿಕ ಸಂಪಾದನೆ ಮಾಡುವ ಸ್ಟಾರ್ -2018 ಪಟ್ಟಿಯಲ್ಲಿ ರೇಯಾನ್ ಎಲ್ಲರಿಗಿಂತ ಟಾಪ್ ಸ್ಥಾನದಲ್ಲಿದ್ದಾನೆ. ಸಂಪಾದನೆ ವಿಷಯದಲ್ಲೀತ ಘನಾನುಘಟಿಗಳನ್ನು ಹಿಂದಿಕ್ಕಿದ್ದಾನೆ. ಆಟದ ಸಾಮಾನುಗಳ ರಿವ್ಯೂ ಮಾಡುವ ಈತ ಕಳೆದ ವರ್ಷ 71 ಕೋಟಿ ಆದಾಯ ಗಳಿಸುವುದರ ಮೂಲಕ ಫೋರ್ಬ್ಸ್ ಪಟ್ಟಿಯಲ್ಲಿ 9ನೇ ಸ್ಥಾನದಲ್ಲಿದ್ದ ಮತ್ತು ಈ ವರ್ಷ ಮೊದಲ ಸ್ಥಾನಕ್ಕೆ ಜಿಗಿದಿದ್ದಾನೆ.

ಸಂಪಾದನೆ ಹೇಗೆ?

1.73ಕೋಟಿ ಫಾಲೋವರ್ಸ್ ಹೊಂದಿರುವ ರೇಯಾನ್ ವೀಡಿಯೋವನ್ನು ಕೋಟಿಗಟ್ಟಲೆ ಜನರು ವೀಕ್ಷಿಸುತ್ತಾರೆ. ಮನೆಯಲ್ಲಿಯೇ ಕುಳಿತು ವೀಡಿಯೋ ಮೂಲಕ ಆಟಗಳ ರಿವ್ಯೂ ಮಾಡುತ್ತಾನೆ. ಆತನ ತಂದೆ- ತಾಯಿ ಅದನ್ನು ಯೂಟ್ಯೂಬ್‌ಗೆ ಅಪ್ಲೋಡ್ ಮಾಡುತ್ತಾರೆ. ಈತನ ವೀಡಿಯೋಗಳನ್ನು ನೋಡುವವರು ಬಹುತೇಕ 3 ರಿಂದ 7 ವರ್ಷ ವಯಸ್ಸಿನ ಮಕ್ಕಳು. ರಯಾನ್ನ ಬಹುತೇಕ ಅಭಿಮಾನಿಗಳು ಅಮೇರಿಕಾದವರೇ ಆಗಿದ್ದಾರೆ.

ಅಷ್ಟೇ ಅಲ್ಲ ಈತ ಸ್ವಂತ ಆಟಿಕೆ ಮತ್ತು ಬಟ್ಟೆಗಳ ಬ್ಯುಸಿನೆಸ್ ಕೂಡ ಹೊಂದಿದ್ದಾನೆ. ಅದು ರೇಯಾನ್ಸ್ ವರ್ಲ್ಡ್ ಎಂಬ ಹೆಸರಿನಡಿಯಲ್ಲಿ ತನಗಿಷ್ಟವಾದ ಆಟಿಕೆ ಮತ್ತು ಉಡುಪುಗಳನ್ನು ಮಾರುತ್ತಾನೆ. ಅಮೇರಿಕಾದ ಇ- ಕಾಮರ್ಸ್ ದಿಗ್ಗಜ ವಾಲ್‌ಮಾರ್ಟ್‌ಲ್ಲಿ ಇವರ ಉತ್ಪನ್ನಗಳು ಮಾರಾಟವಾಗುತ್ತವೆ.