ಓಲಾದಲ್ಲಿ ಸಚಿನ್‌ ಬನ್ಸಲ್‌ರಿಂದ 650 ಕೋಟಿ ರೂ. ಹೂಡಿಕೆ

ಹೊಸದಿಲ್ಲಿ: ಫ್ಲಿಪ್‌ಕಾರ್ಟ್‌ ಸಹ ಸಂಸ್ಥಾಪಕ ಸಚಿನ್‌ ಬನ್ಸಲ್‌ ಅವರು ಓಲಾದಲ್ಲಿ 650 ಕೋಟಿ ರೂ. ಹೂಡಿಕೆ ಮಾಡಿದ್ದಾರೆ.

ಅಮೆರಿಕ ಮೂಲದ ಉಬರ್‌ಗೆ ತೀವ್ರ ಸ್ಪರ್ಧೆ ನೀಡಲು ಓಲಾಗೆ ಬನ್ಸಲ್‌ರ ಭಾರೀ ಹೂಡಿಕೆಯಿಂದ ಸಹಕಾರಿಯಾಗಲಿದೆ. ಅಲ್ಲದೇ, ಓಲಾದಲ್ಲಿ ಅತಿ ದೊಡ್ಡ ವ್ಯಕ್ತಿಗತ ಹೂಡಿಕೆ ಇದಾಗಿದೆ.

ಫ್ಲಿಪ್‌ಕಾರ್ಟ್‌ನಿಂದ ಹೊರಬಂದಿದ್ದ ಸಚಿನ್‌, ಓಲಾಗೆ ಹಣ ಹೂಡಿಕೆ ಮಾಡಿದ್ದಾರೆ. ಈ ನಿಟ್ಟಿನಲ್ಲಿ ನಡೆದ ಒಪ್ಪಂದದ ಭಾಗವಾಗಿ ಜನವರಿಯಲ್ಲಿ ಬೆಂಗಳೂರು ಮೂಲದ ಓಲಾ ಕಂಪನಿಯು ಸಚಿನ್‌ ಅವರಿಗೆ 150 ಕೋಟಿ ರೂ.ಮೌಲ್ಯದ ಷೇರುಗಳನ್ನು ವರ್ಗಾಯಿಸಿತ್ತು.

''ಓಲಾ ಅನ್ನುವುದು ಭಾರತದ ಅತ್ಯಂತ ಭರವಸೆಯ ಗ್ರಾಹಕಸ್ನೇಹಿ ಕ್ಯಾಬ್‌ ಸೇವೆಯ ವ್ಯವಹಾರವಾಗಿದೆ,'' ಎಂದು ಸಚಿನ್‌ ಹೇಳಿದ್ದಾರೆ. ''ಓಲಾದ ಹೂಡಿಕೆದಾರರಾಗಿ ಸಚಿನ್‌ ನಮ್ಮೊಂದಿಗಿರುವುದು ಪುಳಕ ನೀಡುವಂಥ ವಿಚಾರ. ಯಶಸ್ವಿ ಉದ್ಯಮಿಯಾದ ಸಚಿನ್‌ರ ಅನುಭವದಿಂದ ಓಲಾಗೆ ಲಾಭವಾಗಲಿದೆ,'' ಎಂದು ಓಲಾದ ಸಿಇಒ ಮತ್ತು ಸಹ-ಸಂಸ್ಥಾಪಕ ಭವಿಷ್‌ ಅಗರವಾಲ್‌ ತಿಳಿಸಿದ್ದಾರೆ.

ಕ್ಯಾಬ್‌ ಸೇವೆಯ ಮಾರುಕಟ್ಟೆಯಲ್ಲಿ ಮೊದಲ ಸ್ಥಾನಕ್ಕಾಗಿ ಭಾರತ, ಆಸ್ಪ್ರೇಲಿಯಾ, ನ್ಯೂಜಿಲೆಂಡ್‌ ಮತ್ತು ಬ್ರಿಟನ್‌ನಲ್ಲಿ ಅಮೆರಿಕದ ಉಬರ್‌ ಜೊತೆ ಓಲಾ ತೀವ್ರ ಸೆಣಸುತ್ತಿದೆ.

ಬಿನ್ನಿ ಬನ್ಸಲ್‌ ಸಹಯೋಗದೊಂದಿಗೆ ಸಚಿನ್‌ ಅವರು ಫ್ಲಿಪ್‌ಕಾರ್ಟ್‌ ಅನ್ನು ದಶಕದ ಹಿಂದಷ್ಟೇ ಆರಂಭಿಸಿದ್ದರು. ಅಮೆರಿಕದ ವಾಲ್‌ ಮಾರ್ಟ್‌ ಕಂಪನಿಯು ಫ್ಲಿಪ್‌ಕಾರ್ಟ್‌ನ ಶೇ.77ರಷ್ಟು ಷೇರುಗಳನ್ನು ಖರೀದಿಸಿದ ಬಳಿಕ, ಸಚಿನ್‌ ಹೊರಬಂದಿದ್ದರು.