ಗ್ರಾಹಕರ ಸುರಕ್ಷತೆ ದೃಷ್ಟಿಯಿಂದ ಪ್ಲೇಸ್ಟೋರ್‌ನಿಂದ ಲೋನ್‌ ಆ್ಯಪ್‌ಗಳನ್ನು ರದ್ದುಪಡಿಸಿದ ಗೂಗಲ್‌

ಮುಂಬಯಿ: ಗೂಗಲ್‌ ತನ್ನ ಪ್ಲೇ ಸ್ಟೋರ್‌ನಿಂದ ನೂರಾರು ಲೋನ್‌ ಆ್ಯಪ್‌ಗಳನ್ನು ಗ್ರಾಹಕರ ಸುರಕ್ಷತೆಯ ದೃಷ್ಟಿಯಿಂದ ರದ್ದುಪಡಿಸಿದೆ.
ಗೂಗಲ್‌ ತನ್ನ ಬ್ಲಾಗ್‌ ಪೋಸ್ಟ್‌ನಲ್ಲಿ ಈ ವಿಷಯವನ್ನು ಗುರುವಾರ ತಿಳಿಸಿದೆ.

"ಬಳಕೆದಾರರ ದೂರುಗಳು ಹಾಗೂ ಸರಕಾರಗಳು ನೀಡಿರುವ ಎಚ್ಚರಿಕೆಗಳ ಹಿನ್ನೆಲೆಯಲ್ಲಿ ಪರ್ಸನಲ್‌ ಲೋನ್‌ ಆ್ಯಪ್‌ಗಳನ್ನು ಸುರಕ್ಷತೆಯ ದೃಷ್ಟಿಯಿಂದ ಪ್ಲೇ ಸ್ಟೋರ್‌ನಿಂದ ತೆಗೆದು ಹಾಕಲಾಗಿದೆ’’ಎಂದು ಕಂಪನಿ ತಿಳಿಸಿದೆ.

ರಾಯ್ಟರ್ಸ್‌ ವರದಿಯ ಪ್ರಕಾರ ಪ್ಲೇ ಸ್ಟೋರ್‌ನಲ್ಲಿ 10 ಲೋನ್‌ ಆ್ಯಪ್‌ಗಳು ಗೂಗಲ್‌ನ ನಿಯಮಗಳನ್ನು ಉಲ್ಲಂಘಿಸಿವೆ. ಹೀಗಿದ್ದರೂ ಇಂಥ ಎಷ್ಟು ಆ್ಯಪ್‌ಗಳನ್ನು ತೆಗೆದು ಹಾಕಲಾಗಿದೆ ಎಂದು ಗೂಗಲ್‌ ತಿಳಿಸಿಲ್ಲ.

ಲೋನ್‌ ಆ್ಯಪ್‌ ವಂಚನೆಗಳ ಬಗ್ಗೆ ತನಿಖೆಗಿಳಿದ ಇ.ಡಿ, ವಿದೇಶಕ್ಕೆ ಹಣ ರವಾನಿಸಿರುವ ಬಗ್ಗೆಯೂ ಪರಿಶೀಲನೆ
ಈ ನಡುವೆ ಗೂಗಲ್‌ ಕೂಲಂಕಷ ಪರಿಶೀಲನೆ ಮಾಡದೆಯೇ ಸಾಲ ವಿತರಕ ಆ್ಯಪ್‌ಗಳಿಗೆ ಅವಕಾಶ ನೀಡಕೂಡದು ಎಂದು ಡಿಜಿಟಲ್‌ ತಜ್ಞರು ತಿಳಿಸಿದ್ದಾರೆ.

2019ರ ನವೆಂಬರ್‌ನಲ್ಲಿ ಗೂಗಲ್‌ ತನ್ನ ನೂತನ ಡೆವಲಪರ್‌ ನೀತಿಯಲ್ಲಿ, 60 ದಿನಗಳಿಗಿಂತ ಕಡಿಮೆ ಮರು ಪಾವತಿಯ ಅವಧಿ ಇರುವ ಲೋನ್‌ ಆ್ಯಪ್‌ಗಳಿಗೆ ತನ್ನ ಪ್ಲೇ ಸ್ಟೋರ್‌ನಲ್ಲಿ ಅವಕಾಶ ಇಲ್ಲ ಎಂದಿತ್ತು. ಲೋನ್‌ ಆ್ಯಪ್‌ ಗಳು ತಮ್ಮ ಸಾಲದ ಮರು ಪಾವತಿಯ ಕನಿಷ್ಠ ಮತ್ತು ಗರಿಷ್ಠ ಅವಧಿಯನ್ನು ಬಹಿರಂಗಪಡಿಸಬೇಕು ಎಂದು ಷರತ್ತು ವಿಧಿಸಿತ್ತು.