ತೈಲೋತ್ಪಾದನೆ ಕಡಿತಕ್ಕೆ ಸೌದಿ ಅರೇಬಿಯಾ ನಿರ್ಧಾರ

ಹೊಸದಿಲ್ಲಿ: ಸೌದಿ ಅರೇಬಿಯಾ ಡಿಸೆಂಬರ್‌ನಿಂದ ತೈಲೋತ್ಪಾದನೆಯನ್ನು ಕಡಿತಗೊಳಿಸುವುದಾಗಿ ಘೋಷಿಸಿದೆ. ಇದರ ಬೆನ್ನಲ್ಲೇ ಬ್ರೆಂಟ್‌ ಕಚ್ಚಾ ತೈಲ ದರದಲ್ಲಿ ಶೇ.2ರಷ್ಟು ಏರಿಕೆಯಾಗಿದ್ದು, 71.52ಕ್ಕೆ ತಲುಪಿದೆ.

ಇತ್ತೀಚಿನ ತೈಲ ದರ ಇಳಿಕೆಯನ್ನು ತಡೆಯಲು ಕೊಲ್ಲಿ ರಾಷ್ಟ್ರ ಸೌದಿ ಅರೇಬಿಯಾ ಯತ್ನಿಸುತ್ತಿದ್ದು, ಡಿಸೆಂಬರ್‌ನಲ್ಲಿ ದಿನದ ಸರಾಸರಿ ಉತ್ಪಾದನೆಯಲ್ಲಿ 5 ಲಕ್ಷ ಬ್ಯಾರೆಲ್‌ನಷ್ಟು ಕಡಿತಕ್ಕೆ ತೀರ್ಮಾನಿಸಿದೆ.

ತಾಂತ್ರಿಕ ತಜ್ಞರಿಂದ ನಾವು ಪಡೆದಿರುವ ವಿಶ್ಲೇಷಣೆಗಳ ಪ್ರಕಾರ ನಾವು ಮಾರುಕಟ್ಟೆಯಲ್ಲಿ ದರವನ್ನು ಸ್ಥಿರಗೊಳಿಸಲು 10 ಲಕ್ಷ ಬ್ಯಾರೆಲ್‌ ತನಕ ತೈಲ ಉತ್ಪಾದನೆಯನ್ನು ಕಡಿತಗೊಳಿಸಬೇಕಾದ ಅಗತ್ಯ ಇದೆ ಎಂದು ಸೌದಿ ಅರೇಬಿಯಾದ ಇಂಧನ ಸಚಿವ ಖಲೀದ್‌ ಅಲ್‌-ಫಾಲಿ ಅಬುಧಾಬಿಯಲ್ಲಿ ಹೇಳಿದ್ದಾರೆ.

ಕಳೆದ 1 ತಿಂಗಳಿನಿಂದ ಕಚ್ಚಾ ತೈಲ ದರದ ಮೌಲ್ಯದಲ್ಲಿ ಐದನೇ ಒಂದರಷ್ಟು ಇಳಿಕೆಯಾಗಿದೆ. ಮಾರುಕಟ್ಟೆಗೆ ಬೇಡಿಕೆಗಿಂತ ಹೆಚ್ಚು ತೈಲ ಪೂರೈಕೆಯಾಗುತ್ತಿರುವುದು ಇದಕ್ಕೆ ಕಾರಣಗಳಲ್ಲೊಂದು. ಅಮೆರಿಕವು ಇರಾನ್‌ ವಿರುದ್ಧ ವಿಧಿಸಿರುವ ನಿರ್ಬಂಧಗಳು ನಿರೀಕ್ಷೆಯಷ್ಟು ಪರಿಣಾಮಕಾರಿಯಾಗಿಲ್ಲವಾದ್ದರಿಂದ, ಕಚ್ಚಾ ತೈಲ ದರ ಇಳಿಕೆಯಾಗಿತ್ತು.

ಇದೀಗ ಸೌದಿ ಅರೇಬಿಯಾ ಉತ್ಪಾದನೆ ಕಡಿತ ಘೋಷಿಸಿರುವುದರಿಂದ, ಸೋಮವಾರ ಕಚ್ಚಾ ತೈಲ ದರ ಏರಿಕೆಯಾಗಿತ್ತು. 14 ಸದಸ್ಯರನ್ನು ಒಳಗೊಂಡಿರುವ ಒಪೆಕ್‌ನ ಸದಸ್ಯ ರಾಷ್ಟ್ರಗಳ ಪೈಕಿ ಸೌದಿ ಅರೇಬಿಯಾ ಒಂದೇ ಜಾಗತಿಕ ಕಚ್ಚಾ ತೈಲದ ಮೂರನೇ ಒಂದರಷ್ಟನ್ನು ಪೂರೈಸುತ್ತದೆ.

ಕಚ್ಚಾ ತೈಲ ದರ ಶುಕ್ರವಾರ ಬ್ಯಾರೆಲ್‌ಗೆ 70 ಡಾಲರ್‌ಗೆ ಇಳಿದಿದ್ದರೆ, ಸೋಮವಾರ 71 ಡಾಲರ್‌ಗೆ ವೃದ್ಧಿಸಿದೆ. 2019ರಲ್ಲಿ ಸೌದಿ ಅರೇಬಿಯಾ, ಕುವೈತ್‌ ಇತ್ಯಾದಿ ರಾಷ್ಟ್ರಗಳು ಮತ್ತಷ್ಟು ತೈಲೋತ್ಪಾದನೆ ಕಡಿತ ಮಾಡುವ ನಿರೀಕ್ಷೆ ಇದೆ.

ಉತ್ಪಾದನೆ ಕಡಿತ ಯಾಕೆ?
ಮಾರುಕಟ್ಟೆಯಲ್ಲಿ ಇತ್ತೀಚಿನ ತೈಲ ದರ ಇಳಿಕೆಯು ಸೌದಿ ಅರೇಬಿಯಾದ ಚಿಂತೆಗೆ ಕಾರಣ. ಯಾಕೆಂದರೆ ತೈಲ ದರ ಇಳಿದರೆ ಅದಕ್ಕೆ ಆದಾಯ ಕಡಿಮೆಯಾಗುತ್ತದೆ. ಆದ್ದರಿಂದ ಉತ್ಪಾದನೆಯನ್ನು ಕಡಿತಗೊಳಿಸುವ ಮೂಲಕ ಕೃತಕ ಅಭಾವ ಸೃಷ್ಟಿಸಿ, ದರ ಹೆಚ್ಚಿಸಲು ಬಯಸಿದೆ.