ಶಾರ್ಟ್‌ ಟರ್ಮ್ ಸಾಲಗಳ ಬಡ್ಡಿದರ ಇಳಿಸಿದ ಎಸ್‌ಬಿಐ: ಗೃಹ ಸಾಲಕ್ಕೂ ಅನ್ವಯವೇ ಇದು?

ಹೊಸದಿಲ್ಲಿ: ದೇಶದ ಅತಿ ದೊಡ್ಡ ಬ್ಯಾಂಕಾಗಿರುವ ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾ (ಎಸ್‌ಬಿಐ) ಬುಧವಾರ ಬೆಳಗ್ಗೆಯೇ ವಿವಿಧ ಅವಧಿಯ ವೆಚ್ಚ ಆಧಾರಿತ ಸಾಲಗಳ ಮೇಲಿನ ಬಡ್ಡಿ ದರ (ಎಂಸಿಎಲ್‌ಆರ್‌) ವನ್ನು ಇಳಿಸಿದೆ. ಇದು ಶಾರ್ಟ್‌ ಟರ್ಮ್ ಸಾಲಗಳಿಗೆ ಅನ್ವಯವಾಗಲಿದ್ದು, ಬಡ್ಡಿದರದಲ್ಲಿ 5ರಿಂದ 10 ಮೂಲಾಂಶಗಳಷ್ಟು ಕಡಿತ ಮಾಡಿದೆ. (1 ಮೂಲಾಂಶ = 0.01%) ಪರಿಷ್ಕೃತ ಬಡ್ಡಿದರಗಳು ಜುಲೈ 10 ರಿಂದ ಅನ್ವಯವಾಗಲಿದೆ. ಪರಿಷ್ಕೃತ ದರದಂತೆ ಎಂಎಲ್‌ಸಿಆರ್‌ ಶೇ.6.65ಕ್ಕೆ ಇಳಿಯಲಿದೆ.

ಎಸ್‌ಬಿಐ ಸತತವಾಗಿ 14ನೇ ಬಾರಿ ಎಂಸಿಎಲ್‌ಆರ್‌ ಕಡಿತ ಮಾಡುತ್ತಿದೆ. ಕಳೆದ ಜೂನ್‌ನಲ್ಲಿ ಕೂಡ ಸಾಲಗಳ ಮೇಲಿನ ಬಡ್ಡಿದರದಲ್ಲಿ 25 ಮೂಲಾಂಶಗಳಷ್ಟು ಕಡಿತಗೊಳಿಸಿತ್ತು.

ಆದರೆ ಕಳೆದ ಬಾರಿ ಎಂಸಿಎಲ್‌ಆರ್‌ನಲ್ಲಿ ಕಡಿತ ಮಾಡಿದ್ದರೂ ಕೂಡ ಗೃಹ ಸಾಲಗಳ ಮೇಲಿನ ಬಡ್ಡಿ ದರದಲ್ಲಿ ಇಳಿಕೆಯಾಗಿರಲಿಲ್ಲ. ಈ ಬಾರಿಯ ಎಂಸಿಎಲ್‌ಆರ್ ಕಡಿತ ಗೃಹ ಸಾಲಗಳ ಮೇಲೆ ಪರಿಣಾಮ ಆಗುತ್ತದೆಯೇ ಎಂಬುದನ್ನು ನೋಡಬೇಕು. ಸಾಮಾನ್ಯವಾಗಿ ಎಂಸಿಎಲ್‌ಆರ್‌ ಕಡಿತವಾದರೆ. ಗೃಹಸಾಲಗಳ ಮೇಲಿನ ಬಡ್ಡಿ ದರದಲ್ಲೂ ಇಳಿಕೆಯಾಗುತ್ತದೆ.

ಭಾರತೀಯ ಕಂಪನಿಗಳ ಷೇರು ಖರೀದಿಸುತ್ತಿದೆ ಚೀನಾ: ಇದರ ಹಿಂದಿನ ಕುತಂತ್ರವೇನು?

ಏನಿದು ಎಂಸಿಎಲ್‌ಆರ್‌ ?
ಬಡ್ಡಿ ದರವನ್ನು ಲೆಕ್ಕಾಚಾರ ಮಾಡುವ ಹೊಸ ವಿಧಾನ ಈ ಮಾರ್ಜಿನಲ್‌ ಕಾಸ್ಟ್‌ ಲೆಂಡಿಂಗ್‌ ರೇಟ್‌. ಎಲ್ಲಾ ಬ್ಯಾಂಕುಗಳು ಈ ನಿಯಮವನ್ನು ಅಳವಡಿಸಿಕೊಳ್ಳಲು ಆರ್‌ಬಿಐ ಸೂಚನೆ ನೀಡಿದ್ದು, ಕಳೆದ ಏಪ್ರಿಲ್‌ನಿಂದ ಅನುಮೋದನೆ ಪಡೆದ ಎಲ್ಲಾ ಗೃಹ ಸಾಲಕ್ಕೆ ಇದು ಅನ್ವಯವಾಗುತ್ತದೆ. ಈ ಹಿಂದೆ ಪ್ರತಿ ಬ್ಯಾಂಕು ತನ್ನ ಬೇಸ್‌ ರೇಟ್‌ ಆಧಾರದಲ್ಲಿ ಬಡ್ಡಿ ನಿಗದಿ ಮಾಡುತ್ತಿತ್ತು. ಬೇಸ್‌ ಆಧಾರ ಮತ್ತು ಸಾಲದ ಮೊತ್ತದ ಮೇಲೆ ಒಂದಿಷ್ಟು ಲಾಭವನ್ನು ದೃಷ್ಟಿಯಲ್ಲಿಟ್ಟುಕೊಂಡು ಬಡ್ಡಿ ಲೆಕ್ಕ ಹಾಕಲಾಗುತ್ತಿತ್ತು. ಲಾಭದ ಲೆಕ್ಕಾಚಾರವು ಹಲವಾರು ಅಂಶಗಳನ್ನು ಒಳಗೊಂಡಿದೆ. ಇದರಲ್ಲಿ ಗ್ರಾಹಕನ ಮರು ಪಾವತಿಯ ರಿಸ್ಕ್‌ ಅಂಶವು ಕೂಡ ಸೇರುತ್ತದೆ. ಉದಾಹರಣೆ ಬೇಸ್‌ ರೇಟ್‌ ವಾರ್ಷಿಕ ಶೇ. 9 ಆಗಿದ್ದರೆ, ಬಡ್ಡಿ ದರವು ಸಾಮಾನ್ಯವಾಗಿ ಶೇ. 9.25ರಷ್ಟಿರುತ್ತಿತ್ತು. ಎಂಸಿಎಲ್‌ಆರ್‌ ವ್ಯವಸ್ಥೆಯು ಆರ್‌ಬಿಐ ನೀತಿಯಿಂದ ಆಗುವ ಬಡ್ಡಿ ಇಳಿಕೆಯ ಪೂರ್ಣ ಲಾಭವನ್ನು ಗ್ರಾಹಕರಿಗೆ ತಲುಪಿಸಲು ನೆರವಾಗಿದೆ. ಅಂದರೆ ಒಂದು ವೇಳೆ ಠೇವಣಿಯ ಬಡ್ಡಿಯನ್ನು ಬ್ಯಾಂಕು ಕಡಿಮೆ ಮಾಡಿದರೆ, ಆಗ ಸಹಜವಾಗಿಯೇ ಬ್ಯಾಂಕುಗಳ ವೆಚ್ಚ ತಗ್ಗುವುದರಿಂದ ಸಾಲದ ಮೇಲಿನ ಬಡ್ಡಿಯನ್ನೂ ಇಳಿಕೆ ಮಾಡಲೇಬೇಕಾಗುತ್ತದೆ.