30,000 ಕೋಟಿ ರೂ. ವಸೂಲಿ: ಎಸ್‌ಬಿಐ ನಿರೀಕ್ಷೆ

ಕೋಲ್ಕೊತಾ : ದಿವಾಳಿ ಸಂಹಿತೆ(ಐಬಿಸಿ) ಅನ್ವಯ ಕಂಪನಿಗಳಿಂದ ಸಾಲ ವಸೂಲಿಗೆ ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾ(ಎಸ್‌ಬಿಐ) ಮುಂದಾಗಿದ್ದು, ಈ ಮೂಲಕ ಪ್ರಸಕ್ತ ಹಣಕಾಸು ವರ್ಷದಲ್ಲಿ 30,000 ಕೋಟಿ ರೂ. ವಸೂಲಿ ಮಾಡುವ ವಿಶ್ವಾಸ ವ್ಯಕ್ತಪಡಿಸಿದೆ.

ದೇಶದ ಬೃಹತ್‌ ಬ್ಯಾಂಕ್‌ ಆದ ಎಸ್‌ಬಿಐ, ವಸೂಲಾಗದ ಸಾಲಗಳ ಪ್ರಮಾಣ ತಗ್ಗಿಸಲು ಯತ್ನಿಸುತ್ತಿದೆ. ಐಬಿಸಿ ಅನ್ವಯ 78 ಸಾವಿರ ಕೋಟಿ ರೂ. ವಸೂಲಿಗೆ ಎಸ್‌ಬಿಐ ಕ್ರಮ ಕೈಗೊಂಡಿದೆ. ಭೂಷಣ್‌ ಸ್ಟೀಲ್‌-ಟಾಟಾ ಸ್ಟೀಲ್‌ನಿಂದ 8,500 ಕೋಟಿ ರೂ. ವಸೂಲಿ ಮಾಡುವಲ್ಲಿ ಬ್ಯಾಂಕ್‌ ಯಶಸ್ಸು ಪಡೆದಿದೆ. ಎಲೆಕ್ಟ್ರೋಸ್ಟೀಲ್‌-ವೇದಾಂತದಿಂದ 6,000 ಕೋಟಿ ರೂ. ವಸೂಲಿ ಮಾಡುವ ವಿಶ್ವಾಸವನ್ನೂ ಬ್ಯಾಂಕ್‌ ಹೊಂದಿದೆ ಎಂದು ಎಸ್‌ಬಿಐನ ವಸೂಲಾಗದ ಆಸ್ತಿಗಳ ಸಮೂಹದ ಡಿಎಂಡಿ ಪಲ್ಲವ್‌ ಮಹಾಪಾತ್ರ ಹೇಳಿದ್ದಾರೆ.

ಬ್ಯಾಂಕ್‌ನ ವಸೂಲಾಗದ ಒಟ್ಟು ಸಾಲ(ಎನ್‌ಪಿಎ) 2.20 ಲಕ್ಷ ಕೋಟಿ ರೂ. ಇದೆ. ದಿವಾಳಿ ಸಂಹಿತೆಯನ್ವಯ ಎನ್‌ಪಿಎ ತಗ್ಗಿಸಲು ಬ್ಯಾಂಕ್‌ ಕಾರ್ಯಪ್ರವೃತ್ತವಾಗಿದೆ. ಐಬಿಸಿ ಅನ್ವಯ 95,000 ಕೋಟಿ ರೂ. ಸಾಲಕ್ಕೆ ಸಂಬಂಧಿಸಿದಂತೆ 250 ಪ್ರಕರಣಗಳನ್ನು ಎಸ್‌ಬಿಐ ದಾಖಲಿಸಿದೆ.