ಎಸ್‍ಬಿಐ ದೈನಂದಿನ ಎಟಿಎಂ ವಿತ್‍ಡ್ರಾ ಮೊತ್ತ ₹ 20000ಕ್ಕೆ ಇಳಿಕೆ

ಹೊಸದಿಲ್ಲಿ: ದೇಶದ ಅತಿದೊಡ್ಡ ಸರಕಾರಿ ಸ್ವಾಮ್ಯದ ಬ್ಯಾಂಕ್ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (ಎಸ್‍ಬಿಐ) ಎಟಿಎಂ ನಗದು ಹಿಂಪಡೆತ ಮಿತಿಯನ್ನು (Cash Withdrawl) ಇನ್ನಷ್ಟು ಕಡಿತಗೊಳಿಸಿದೆ. ಈ ಹಿಂದೆ ₹ 40,000 ಇದ್ದ ದೈನಂದಿನ ಎಟಿಎಂ ವಿತ್‌ಡ್ರಾ ಮೊತ್ತವನ್ನು ₹ 20,000 ಕ್ಕೆ ಇಳಿಸಿದೆ. ಅಕ್ಟೋಬರ್ 31ರಿಂದ ಈ ಹೊಸ ನಿಯಮ ಜಾರಿಗೆ ಬರಲಿದೆ ಎಂದು ಎಸ್‍ಬಿಐ ತಿಳಿಸಿದೆ.

ಎಟಿಎಂಗಳಲ್ಲಿ ನಗದು ವಹಿವಾಟಿನ ವಂಚನೆ ಪ್ರಕರಣಗಳು ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ ಹಾಗೂ ಡಿಜಿಟಲ್ ಮತ್ತು ನಗದುರಹಿತ ವಹಿವಾಟನ್ನು ಪ್ರೋತ್ಸಾಹಿಸಲು ಡೆಬಿಟ್ ಕಾರ್ಡ್ ವಿತ್‌ಡ್ರಾ ಮೊತ್ತವನ್ನು ಕಡಿತಗೊಳಿಸಿರುವುದಾಗಿ ಬ್ಯಾಂಕ್ ತಿಳಿಸಿದೆ.

ಕಳೆದ ಹತ್ತು ವರ್ಷಗಳಲ್ಲಿ ಸ್ಕಿಮ್ಮರ್‌‍ಗಳು, ರಹಸ್ಯ ಕ್ಯಾಮೆರಾ ಹಾಗೂ ಎಲೆಕ್ಟ್ರಾನಿಕ್ ಡಿವೈಸ್‌ಗಳಿಂದ ಗ್ರಾಹಕರ ಪಿನ್ ಕದಿಯಲಾಗಿದೆ. ಇದರಿಂದ ಬಹಳಷ್ಟು ಗ್ರಾಹಕರು ವಂಚನೆಗೆ ಒಳಗಾಗಿದ್ದಾರೆ. ಹಾಗಾಗಿ ಇದನ್ನು ನಿಯಂತ್ರಿಸಲು ವಿತ್‌ಡ್ರಾ ಮೊತ್ತವನ್ನು ₹ 20 ಸಾವಿರಕ್ಕೆ ಇಳಿಸಿರುವುದಾಗಿ ಎಸ್‍ಬಿಐ ತಿಳಿಸಿದೆ.

ಡಿಜಿಟಲ್ ವಹಿವಾಟಿನ ಪ್ರಮಾಣ ಹೆಚ್ಚಾಗಿದ್ದರು, ನಗದು ಬೇಡಿಕೆ ಸಹ ಹೆಚ್ಚಾಗಿದೆ ಎಂದಿದ್ದಾರೆ ಎಸ್‍ಬಿಐ ವ್ಯವಸ್ಥಾಪಕ ನಿರ್ದೇಶಕ ಪಿ ಕೆ ಗುಪ್ತಾ. ಇತ್ತೀಚಿನ ಅಂದಾಜಿನ ಪ್ರಕಾರ, ನೋಟು ಅಮಾನ್ಯೀಕರಣಕ್ಕೂ ಮುಂಚೆ ಹೋಲಿಸಿದರೆ ನಗದು ಬೇಡಿಕೆ ಭಾರಿ ಪ್ರಮಾಣದಲ್ಲಿದೆ ಎಂದಿದ್ದಾರೆ.

ಹೊಸ ನಿರ್ಧಾರದಿಂದ ಗ್ರಾಹಕರಿಗೆ ತೊಂದರೆಯಾಗುವುದಿಲ್ಲವೇ ಎಂದರೆ, ಆಂತರಿಕ ವಿಶ್ಲೇಷಣೆ ಬಳಿಕ ₹ 20 ಸಾವಿರ ಮೊತ್ತ ಬಹಳಷ್ಟು ಮಂದಿ ಗ್ರಾಹಕರಿಗೆ ಸರಿಹೋಗುತ್ತದೆ ಎಂದು ಭಾವಿಸಿದ್ದೇವೆ. ಹೊಸ ಮಿತಿಯ ಕಾರಣ ವಂಚನೆ ಪ್ರಕರಣಗಳನ್ನು ತಡೆಯಬಹುದು ಎಂದಿದ್ದಾರೆ ಗುಪ್ತಾ.