ಸಾರಿಡಾನ್‌ ಮಾತ್ರೆಯ ನಿಷೇಧ ತೆರವುಗೊಳಿಸಿದ ಸುಪ್ರೀಂಕೋರ್ಟ್‌

ಹೊಸದಿಲ್ಲಿ : ನೋವು ನಿವಾರಕ ಮಾತ್ರೆ ಸಾರಿಡಾನ್‌ ಅನ್ನು ನಿಷೇಧಿತ ಔಷಧಗಳ ಪಟ್ಟಿಯಿಂದ ಸುಪ್ರೀಂ ಕೋರ್ಟ್‌ ತೆರವುಗೊಳಿಸಿದೆ ಎಂದು ಉತ್ಪಾದಕ ಪಿರಮಲ್‌ ಎಂಟರ್‌ಪ್ರೈಸಸ್‌ ತಿಳಿಸಿದೆ.

ಸಾರಿಡಾನ್‌ ಪರವಾಗಿ ಸುಪ್ರೀಂ ಕೋರ್ಟ್‌ ಆದೇಶ ಹೊರಡಿಸಿದೆ ಎಂದು ಪಿರಮಲ್‌ ಎಂಟರ್‌ಪ್ರೈಸಸ್‌ (ಪಿಇಎಲ್‌) ತಿಳಿಸಿದೆ.

2018ರ ಸೆಪ್ಟೆಂಬರ್‌ನಲ್ಲಿ ಸಾರಿಡಾನ್‌ಗೆ ನಿಷೇಧ ವಿಧಿಸಲಾಗಿತ್ತು. ಆದರೆ ಇದಕ್ಕೆ ಸುಪ್ರೀಂಕೋರ್ಟ್‌ನಿಂದ ತಡೆಯಾಜ್ಞೆ ತರುವಲ್ಲಿ ಕಂಪನಿ ಯಶಸ್ವಿಯಾಗಿತ್ತು. ಹೀಗಾಗಿ ಇದರ ಉತ್ಪಾದನೆ, ಮಾರಾಟವನ್ನು ಮುಂದುವರಿಸಿತ್ತು.

''ಸುಪ್ರೀಂ ಕೋರ್ಟ್‌ ಆದೇಶದಿಂದ ಸಂತಸವಾಗಿದೆ. ಸುರಕ್ಷಿತ ಔಷಧವನ್ನು ನೀಡುವ ನಮ್ಮ ಬದ್ಧತೆಯನ್ನು ಇದು ದೃಢಪಡಿಸಿದೆ'' ಎಂದು ಪಿಇಎಲ್‌ ಕಾರ್ಯಕಾರಿ ನಿರ್ದೇಶಕ ನಂದಿನಿ ಪಿರಮಲ್‌ ತಿಳಿಸಿದ್ದಾರೆ.