ಹೊಸ ಎತ್ತರಕ್ಕೇರಿದ ಸೆನ್ಸೆಕ್ಸ್‌, ನಿಫ್ಟಿ

ಮುಂಬಯಿ : ಮುಂಬಯಿ ಷೇರು ಮಾರುಕಟ್ಟೆಯಲ್ಲಿ ಮಂಗಳವಾರ ಗೂಳಿಯ ಅಬ್ಬರ. ಸೆನ್ಸೆಕ್ಸ್‌ ಮತ್ತು ನಿಫ್ಟಿ ಎರಡೂ ಸೂಚ್ಯಂಕಗಳು ಹೊಸ ದಾಖಲೆಯ ಎತ್ತರಕ್ಕೆ ಜಿಗಿಯಿತು. ರಫ್ತು ಪ್ರಮಾಣದ ಏರಿಕೆ, ವಿದೇಶಿ ಬಂಡವಾಳ ಹೂಡಿಕೆಯ ಒಳಹರಿವಿನ ಚೇತರಿಕೆ, ವಾಡಿಕೆಯ ಮುಂಗಾರು ಸಾಧ್ಯತೆ ಇತ್ಯಾದಿ ಸಕಾರಾತ್ಮಕ ಅಂಶಗಳು ಸಕಾರಾತ್ಮಕ ಪ್ರಭಾವ ಬೀರಿತು.

ಸೆನ್ಸೆಕ್ಸ್‌ ಮಧ್ಯಂತರದಲ್ಲಿ 39,364.34ಕ್ಕೆ ಏರಿಕೊಂಡು ಅಂತಿಮವಾಗಿ 39,275.64ಕ್ಕೆ ದಿನದ ವಹಿವಾಟು ಮುಕ್ತಾಯಗೊಳಿಸಿತು. 369.80 ಅಂಕ ಜಿಗಿತ ಸಾಧಿಸಿತು. ಕಳೆದ 4 ದಿನಗಳ ವಹಿವಾಟಿನಲ್ಲಿ ಸೆನ್ಸೆಕ್ಸ್‌ 690 ಅಂಕಗಳ ಏರಿಕೆ ದಾಖಲಿಸಿತ್ತು. ಎನ್‌ಎಸ್‌ಇ ಮೊದಲ ಬಾರಿಗೆ ಮಧ್ಯಂತರದಲ್ಲಿ 11,800 ಅಂಕಗಳ ಗಡಿ ದಾಟಿತು. ಕೊನೆಯಲ್ಲಿ 11,787ಕ್ಕೆ ಸ್ಥಿರವಾಯಿತು. 96 ಅಂಕ ವೃದ್ಧಿಸಿತು.

ವಿದೇಶಿ ಫಂಡ್‌ಗಳ ಒಳ ಹರಿವಿನ ಪರಿಣಾಮ ಹಣಕಾಸು ವಲಯದ ಷೇರುಗಳು ಏರಿಕೊಂಡಿತು. ಐಸಿಐಸಿಐ ಬ್ಯಾಂಕ್‌, ಒಎನ್‌ಜಿಸಿ, ಎಲ್‌ಆ್ಯಂಡ್‌ಟಿ ಷೇರುಗಳು ಲಾಭ ಗಳಿಸಿತು. ಜಪಾನ್‌, ಫ್ರಾನ್ಸ್‌, ಬ್ರಿಟನ್‌ನಲ್ಲಿ ಷೇರು ಮಾರುಕಟ್ಟೆ ಸೂಚ್ಯಂಕಗಳು ಏರಿತ್ತು.

ವಾಯಿದಾ ಮಾರುಕಟ್ಟೆಯಲ್ಲಿ ಜಾಗತಿಕ ಕಚ್ಚಾ ತೈಲ ದರ ಪ್ರತಿ ಬ್ಯಾರೆಲ್‌ಗೆ 71 ಡಾಲರ್‌ಗೆ ಇಳಿಯಿತು. ಡಾಲರ್‌ ಎದುರು ರೂಪಾಯಿ ಮೌಲ್ಯ 18 ಪೈಸೆ ನಷ್ಟಕ್ಕೀಡಾಗಿ 69.60ಕ್ಕೆ ಸ್ಥಿರವಾಯಿತು. ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು 1,038 ಕೋಟಿ ರೂ. ಮೌಲ್ಯದ ಷೇರುಗಳನ್ನು ಸೋಮವಾರ ಖರೀದಿಸಿದ್ದರು.