ಷೇರು ಮಾರುಕಟ್ಟೆಯಲ್ಲಿ ಮತ್ತೆ ತಲ್ಲಣ: 800 ಅಂಕ ಕುಸಿತ; ರೂಪಾಯಿ ಮೌಲ್ಯದಲ್ಲೂ ಇಳಿಮುಖ

ಹೊಸದಿಲ್ಲಿ: ಷೇರು ಮಾರುಕಟ್ಟೆಯಲ್ಲಿ ಮತ್ತೆ ಕುಸಿತ ಕಂಡಿದ್ದು, ನಷ್ಟದಿಂದ ಷೇರು ಹೂಡಿಕೆದಾರರು ಮತ್ತೆ ತತ್ತರಿಸಿ ಹೋಗಿದ್ದಾರೆ. ರೂಪಾಯಿ ಅಪಮೌಲ್ಯಗೊಂಡಿರುವುದರಿಂದ ಬಿಎಸ್‌ಇ ಸೆನ್ಸೆಕ್ಸ್ 800ಕ್ಕೂ ಅಧಿಕ ಅಂಕಗಳಷ್ಟು ಕುಸಿತ ಕಂಡಿದೆ.

35,820.53ರಲ್ಲಿ ಆರಂಭಗೊಂಡ 30 ಷೇರುಗಳ ಬಿಎಸ್‌ಇ ಸೆನ್ಸೆಕ್ಸ್ ಮಾರುಕಟ್ಟೆ ಬೆಳಗ್ಗೆಯೇ 150 ಅಂಕಗಳಷ್ಟು ಕುಸಿತ ಕಂಡಿತು. ಬಳಿಕ, ಕೆಲವೇ ಹೊತ್ತಿನಲ್ಲಿ 35,300 ಅಂಕಗಳಷ್ಟು ಕೆಳಗಿಳಿದ ಸೂಚ್ಯಂಕ, ಮಧ್ಯಾಹ್ನ 1.45ರ ವೇಳೆಗೆ ಸುಮಾರು 857.50 ಅಂಕಗಳಷ್ಟು ದೀರ್ಘ ಕುಸಿತ ಕಂಡಿದ್ದು, 35,118.13 ಸೂಚ್ಯಂಕಕ್ಕೆ ಇಳಿದಿದೆ. ಇನ್ನೊಂದೆಡೆ, 50 ಷೇರುಗಳ ಎನ್‌ಎಸ್‌ಇ ಷೇರು ಮೌಲ್ಯ ಸಹ ಶೇ. 2.5ರಷ್ಟು ಇಳಿಕೆಯಾಗಿದ್ದು, 10,600 ರ ಆಸುಪಾಸಿಗೆ ಕುಸಿತ ಕಂಡಿದೆ.

ಅಲ್ಲದೆ, ರೂಪಾಯಿ ಮೌಲ್ಯದಲ್ಲೂ ಭಾರಿ ಕುಸಿತ ಕಂಡಿದ್ದು ಮತ್ತೆ 43 ಪೈಸೆ ಅಪಮೌಲ್ಯಗೊಂಡಿದೆ. ಅಮೆರಿಕ ಡಾಲರ್‌ ಎದುರು ನಿನ್ನೆ 73.34ರಷ್ಟಿದ್ದ ರೂಪಾಯಿ ಮೌಲ್ಯ ಇಂದು 73.77ಕ್ಕೆ ಅಪಮೌಲ್ಯಗೊಂಡಿದೆ. ಡಾಲರ್‌ಗೆ ಹೆಚ್ಚು ಬೇಡಿಕೆ, ವಿದೇಶಿ ನಿಧಿ ಹೊರಹರಿವು ಹಾಗೂ ಹೆಚ್ಚುತ್ತಿರುವ ಅಂತಾರಾಷ್ಟ್ರೀಯ ಕಚ್ಚಾ ತೈಲ ಬೆಲೆಯಿಂದಾಗಿ ರೂಪಾಯಿ ಮೌಲ್ಯ ಹಲವು ದಿನಗಳಿಂದ ಕುಸಿಯುತ್ತಿದೆ.

ಇನ್ನು, ರೂಪಾಯಿ ಮೌಲ್ಯ ಕುಸಿತ ಹಾಗೂ ಮುಂತಾದ ವಿಚಾರಗಳ ಬಗ್ಗೆ ಚರ್ಚೆ ನಡೆಸಲು ಇಂದು ಕೇಂದ್ರ ವಾಣಿಜ್ಯ ಸಚಿವ ಸುರೇಶ್‌ ಪ್ರಭು ನೇತೃತ್ವದಲ್ಲಿ ಸಭೆ ನಡೆಯುವ ಸಾಧ್ಯತೆ ಇದೆ.