ಜಾಗತಿಕ ಷೇರು ಮಾರುಕಟ್ಟೆ ಮಹಾ ಪತನ

ಹೊಸದಿಲ್ಲಿ: ಅಮೆರಿಕ, ಯುರೋಪ್‌, ಏಷ್ಯಾ ಸೇರಿದಂತೆ ವಿಶ್ವಾದ್ಯಂತ ಗುರುವಾರ ಷೇರು ಮಾರುಕಟ್ಟೆಗಳಲ್ಲಿ ಸೂಚ್ಯಂಕಗಳು ಭಾರಿ ಕುಸಿತಕ್ಕೀಡಾಯಿತು. ಮುಂಬಯಿ ಷೇರು ಮಾರುಕಟ್ಟೆ ಸಂವೇದಿ ಸೂಚ್ಯಂಕ ಸೆನ್ಸೆಕ್ಸ್‌ ಕೂಡ 800 ಅಂಕಗಳ ಪತನಕ್ಕೀಡಾಯಿತು.

ಅಮೆರಿಕದ ಷೇರು ಪೇಟೆ ಕಳೆದ 8 ತಿಂಗಳಿನಲ್ಲಿಯೇ ಗರಿಷ್ಠ ಕುಸಿತ ದಾಖಲಿಸಿತು. ಅಮೆರಿಕದ ಸಾಲಪತ್ರಗಳ (ಬಾಂಡ್‌) ಆದಾಯ ಕುಸಿತಕ್ಕೀಡಾಗುವ ಆತಂಕ ಹೂಡಿಕೆದಾರರನ್ನು ತಲ್ಲಣಗೊಳಿಸಿದೆ. ಅಮೆರಿಕ-ಚೀನಾ ಟ್ರೇಡ್‌ ವಾರ್‌ ಕೂಡ ನಕಾರಾತ್ಮಕ ಪ್ರಭಾವ ಬೀರಿದೆ.

ಮುಂಬಯಿ ಷೇರು ಮಾರುಕಟ್ಟೆ ಸಂವೇದಿ ಸೂಚ್ಯಂಕ ಸೆನ್ಸೆಕ್ಸ್‌ ಒಂದು ಹಂತದಲ್ಲಿ 1,000ಕ್ಕೂ ಹೆಚ್ಚು ಅಂಕಗಳನ್ನು ಕಳೆದುಕೊಂಡಿತು. ಅಂತಿಮವಾಗಿ 759.74 ಅಂಕಗಳ ನಷ್ಟದೊಂದಿಗೆ 34,001.15ಕ್ಕೆ ಸ್ಥಿರವಾಯಿತು. ನಿಫ್ಟಿ 225.45 ಅಂಕ ಕಳೆದುಕೊಂಡು 10,234.65ಕ್ಕೆ ದಿನದ ವಹಿವಾಟು ಮುಕ್ತಾಯಗೊಳಿಸಿತು.

ನಾಸ್‌ಡಾಕ್‌ ತತ್ತರ: ಅಮೆರಿಕದ ನ್ಯೂಯಾರ್ಕ್‌ ಸ್ಟಾಕ್‌ ಎಕ್ಸ್‌ಚೇಂಜ್‌ (ನಾಸ್‌ಡಾಕ್‌) ಸೂಚ್ಯಂಕ ಡವ್‌ ಜಾನ್ಸ್‌ ಇಂಡಸ್ಟ್ರಿಯಲ್‌ ಎವರೇಜ್‌, 831 ಅಂಕ ಕುಸಿದಿದ್ದು, ಕಳೆದ 8 ತಿಂಗಳಿನಲ್ಲಿಯೇ ಗರಿಷ್ಠ ಇಳಿಕೆ ಇದಾಗಿದೆ. ಆ್ಯಪಲ್‌, ಗೂಗಲ್‌, ಅಮೆಜಾನ್‌ ಮತ್ತಿತರ ತಂತ್ರಜ್ಞಾನ ದಿಗ್ಗಜಗಳ ಷೇರುಗಳೂ ತೀವ್ರ ಕುಸಿತಕ್ಕೀಡಾಯಿತು. ಆದರೆ ಬಿಕ್ಕಟ್ಟಿಗೆ ಫೆಡರಲ್‌ ರಿಸರ್ವ್‌ ಬಡ್ಡಿ ದರ ಏರಿಸಿರುವುದೇ ಕಾರಣ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಹೇಳಿದ್ದಾರೆ. ಚೀನಾದ ಶಾಂಘೈ ಕಂಪೊಸಿಟ್‌ ಇಂಡೆಕ್ಸ್‌ ಶೇ.5.2 ಕುಸಿದಿದ್ದು, 2014ರ ನವೆಂಬರ್‌ನಿಂದ ಕನಿಷ್ಠ ಮಟ್ಟಕ್ಕಿಳಿದಿದೆ.

ಸೆನ್ಸೆಕ್ಸ್‌ ಪತನ: ಪಿಎಸ್‌ಯು ಬ್ಯಾಂಕ್‌, ಲೋಹ, ಆಟೊಮೊಬೈಲ್‌, ಔಷಧ, ಮಾಹಿತಿ ತಂತ್ರಜ್ಞಾನ ಕಂಪನಿಗಳ ಷೇರುಗಳು ಕುಸಿತಕ್ಕೀಡಾಯಿತು. ವಹಿವಾಟು ಆರಂಭವಾದ ಕೆಲವೇ ನಿಮಿಷಗಳಲ್ಲಿ 1,000ಕ್ಕೂ ಹೆಚ್ಚು ಅಂಕ ಕುಸಿಯಿತು. ಹೂಡಿಕೆದಾರರ 3 ಲಕ್ಷ ಕೋಟಿ ರೂ.ಗೂ ಹೆಚ್ಚು ಷೇರು ಮೌಲ್ಯ ಕರಗಿತು.

ಜಾಗತಿಕ ಷೇರು ಮಾರುಕಟ್ಟೆ ಕುಸಿದಿದ್ದೇಕೆ?

-ಅಮೆರಿಕ-ಚೀನಾ ಟ್ರೇಡ್‌ ವಾರ್‌ನ ಭೀತಿ

-ಅಮೆರಿಕದಲ್ಲಿ ಸರಕಾರಿ ಬಾಂಡ್‌ಗಳ ಮಾರಾಟ ಹೆಚ್ಚಳ

-ಆದಾಯ ಕುಸಿತದ ಭೀತಿಯಲ್ಲಿ ಬಾಂಡ್‌ ಮಾರಾಟ

-ಷೇರು ಮಾರುಕಟ್ಟೆಯಲ್ಲಿ ಅಲ್ಲೋಲಕಲ್ಲೋಲ

-ಅಮೆರಿಕದ ಷೇರು ಪೇಟೆ ಕುಸಿತಕ್ಕೆ ಯುರೋಪ್‌, ಏಷ್ಯಾದಲ್ಲೂ ತಲ್ಲಣ

ಕಳೆದೊಂದು ವರ್ಷದಿಂದೀಚೆಗೆ ಷೇರು ಮಾರುಕಟ್ಟೆ ತಜ್ಞರು ದೊಡ್ಡ ಪತನವನ್ನು ನಿರೀಕ್ಷಿಸಿದ್ದರು. ಇದಕ್ಕೆ ಕಾರಣವೂ ಇತ್ತು. ಅಮೆರಿಕ ಸೇರಿದಂತೆ ಬಹುತೇಕ ಷೇರು ಮಾರುಕಟ್ಟೆಗಳ ಸೂಚ್ಯಂಕಗಳು ಸಾರ್ವಕಾಲಿಕ ಎತ್ತರದ ಮಟ್ಟದಲ್ಲಿ ಇದ್ದವು. ಅಮೆರಿಕದಲ್ಲಂತೂ ಹೂಡಿಕೆದಾರರು ಹಿಂದೆಂದೂ ಕಂಡರಿಯದಂತೆ ಗೂಳಿಯ ಅಬ್ಬರದ ಭರಪೂರ ಲಾಭ ಪಡೆಯುತ್ತಿದ್ದರು.

ಸ್ಟಾಕ್‌ ಮಾರುಕಟ್ಟೆಯಲ್ಲಿ ಏರಿದ್ದು ಇಳಿಯಲೇಬೇಕಲ್ಲವೇ? ಯಾವಾಗ ಎಂಬುದು ಪ್ರಶ್ನೆಯಾಗಿತ್ತು. ಈಗ ಇಳಿಕೆಯ ಕಾಲ ಬಂದು ಬಿಟ್ಟಿದೆ. ಅಮೆರಿಕದಲ್ಲಿ ಆ್ಯಪಲ್‌, ಫೇಸ್‌ಬುಕ್‌, ಗೂಗಲ್‌ ಮತ್ತು ಅಮೆಜಾನ್‌ ಈ ನಾಲ್ಕು ದಿಗ್ಗಜ ಕಂಪನಿಗಳ ಷೇರು ದರಗಳು ಕಳೆದ 12 ತಿಂಗಳಲ್ಲಿ ಅನೂಹ್ಯ ಎತ್ತರಕ್ಕೇರಿತ್ತು.

ಈಗ ಅಮೆರಿಕದ ಸರಕಾರಿ ಸಾಲದ ಬಿಕ್ಕಟ್ಟು ಷೇರು ಮಾರುಕಟ್ಟೆಯ ಮೇಲೆ ಭಾರಿ ಪೆಟ್ಟು ಕೊಟ್ಟಿದೆ. ಅಮೆರಿಕದ ಸರಕಾರಿ ಬಾಂಡ್‌ಗಳನ್ನು ಮಾರಾಟ ಮಾಡಲು ಹೂಡಿಕೆದಾರರು ಆರಂಭಿಸಿದ್ದಾರೆ. ದೀರ್ಘಾವಧಿಯ ಹೂಡಿಕೆಗೆ ಈ ಬಾಂಡ್‌ಗಳು ಸೂಕ್ತವಲ್ಲ ಎಂದು ಹೂಡಿಕೆದಾರರು ಕಂಗಾಲಾಗಿದ್ದು, ಮಾರುತ್ತಿದ್ದಾರೆ. ಇದು ನೇರವಾಗಿ ಷೇರು ಮಾರುಕಟ್ಟೆಗಳ ಮೇಲೆ ನಕಾರಾತ್ಮಕ ಪ್ರಭಾವ ಬೀರಿದೆ.

ಇದುವರೆಗೆ ಅಮೆರಿಕ ಸರಕಾರಿ ಬಾಂಡ್‌ಗಳ ಬಗ್ಗೆ ಅಪರಿಮಿತಿ ವಿಶ್ವಾಸ ಹೂಡಿಕೆದಾರರಲ್ಲಿ ಇತ್ತು. ಆದರೆ ಇದೀಗ ಅದೂ ಬಿರುಕು ಬಿಟ್ಟಿದೆ. ಮುಂದೇನು ಎಂಬ ಆತಂಕ ಹೂಡಿಕೆದಾರರಲ್ಲಿದೆ. ಅಮೆರಿಕದ ಫೆಡರಲ್‌ ರಿಸರ್ವ್‌ ಬಡ್ಡಿ ದರ ಏರಿಸಿದ್ದ ಪರಿಣಾಮ, ಆರ್ಥಿಕತೆ ಪ್ರಗತಿಯತ್ತ ಸಾಗುತ್ತಿದೆ ಎಂಬ ವಿಶ್ವಾಸ ಇತ್ತು. ಆದರೆ ಯಾವಾಗ ಚೀನಾ-ಅಮೆರಿಕ ಟ್ರೇಡ್‌ ವಾರ್‌ ಆರಂಭವಾಯಿತೊ, ಹೂಡಿಕೆದಾರರು ಕಂಗಾಲಾಗಿದ್ದಾರೆ. ಈ ವಾಣಿಜ್ಯ ಸಮರ ಮುಂದುವರಿದರೆ ಜಾಗತಿಕ ಆರ್ಥಿಕ ಹಿಂಜರಿತ ಕುಸಿಯಲಿದೆ ಎಂದು ಐಎಂಎಫ್‌ ಹೇಳಿರುವುದೂ ಆತಂಕ ಮೂಡಿಸಿದೆ. ಫೆಡರಲ್‌ ರಿಸರ್ವ್‌ ಬಡ್ಡಿ ದರ ಏರಿಸುತ್ತಿರುವುದರಿಂದ ಉದ್ಯಮಿಗಳಿಗೆ ಸಾಲ ದುಬಾರಿಯಾಗಲಿದ್ದು, ಇದು ಆರ್ಥಿಕ ಹಿನ್ನಡೆಗೂ ಕಾರಣವಾಗಬಹುದು ಎಂಬ ಆತಂಕವೂ ಹೂಡಿಕೆದಾರರಲ್ಲಿದೆ.