ಚೀನಾ-ಅಮೆರಿಕ ವಾಣಿಜ್ಯ ಸಮರಕ್ಕೆ ಸೆನ್ಸೆಕ್ಸ್‌ ತಲ್ಲಣ

ಮುಂಬಯಿ : ಚೀನಾ ಮತ್ತು ಅಮೆರಿಕ ನಡುವಣ ವಾಣಿಜ್ಯ ಸಮರ ಜಾಗತಿಕ ಷೇರು ಮಾರುಕಟ್ಟೆ ಗುರುವಾರ ಮುಗ್ಗರಿಸಿದ್ದು, ಮುಂಬಯಿ ಷೇರು ಮಾರುಕಟ್ಟೆ ಸಂವೇದಿ ಸೂಚ್ಯಂಕ ಸೆನ್ಸೆಕ್ಸ್‌ ಕೂಡ 356 ಅಂಕ ನಷ್ಟಕ್ಕೀಡಾಯಿತು.

ಆಟೊಮೊಬೈಲ್‌, ಬ್ಯಾಂಕಿಂಗ್‌, ರಿಯಾಲ್ಟಿ ಇತ್ಯಾದಿ ವಲಯಗಳ ಷೇರುಗಳು ಕುಸಿದವು. ಸೆನ್ಸೆಕ್ಸ್‌ 37,165 ಅಂಕಗಳಿಗೆ ದಿನದಾಟ ಮುಕ್ತಾಯಗೊಳಿಸಿದ್ದು, ಕಳೆದ 4 ತಿಂಗಳಲ್ಲಿಯೇ ಒಂದೇ ದಿನದ ಗರಿಷ್ಠ ಕುಸಿತಕ್ಕೀಡಾಯಿತು. ನಿಫ್ಟಿ 101 ಅಂಕ ಕಳೆದುಕೊಂಡು 10,300ಕ್ಕೆ ಸ್ಥಿರವಾಯಿತು.

ಚೀನಾದ ಆಮದಿಗೆ ಅಮೆರಿಕ ಸುಂಕ ಹೆಚ್ಚಿಸಿದರೆ, ಅದಕ್ಕೆ ತಿರುಗೇಟು ನೀಡುವುದಾಗಿ ಚೀನಾ ಎಚ್ಚರಿಸಿದ್ದು, ಷೇರು ಮಾರುಕಟ್ಟೆಯನ್ನು ತಲ್ಲಣಗೊಳಿಸಿತು. ವಾಣಿಜ್ಯ ಬಿಕ್ಕಟ್ಟು ತೀವ್ರಗೊಂಡರೆ ಕರೆನ್ಸಿ ವಾರ್‌ ಆಗಿ ಪರಿವರ್ತನೆಯಾಗುವ ಸಾಧ್ಯತೆ ಇದೆ ಎಂದು ಆರ್‌ಬಿಐ ಬುಧವಾರ ಎಚ್ಚರಿಸಿತ್ತು.

ನಿರೀಕ್ಷೆಯಂತೆ ಅಮೆರಿಕದಲ್ಲಿ ಫೆಡರಲ್‌ ರಿಸರ್ವ್‌ ಬಡ್ಡಿ ದರವನ್ನು ಯಥಾಸ್ಥಿತಿಯಲ್ಲಿಟ್ಟಿದ್ದು, ಕ್ರಮೇಣ ಏರಿಸುವ ಇಂಗಿತ ವ್ಯಕ್ತಪಡಿಸಿದೆ. ಮತ್ತೊಂದು ಕಡೆ ತೈಲ ದರ ಇಳಿಮುಖವಾಗುತ್ತಿದ್ದು, ಷೇರು ಪೇಟೆ ಮತ್ತೆ ಚೇತರಿಸುವ ಸಾಧ್ಯತೆ ಇದೆ ಎಂದೂ ಹೂಡಿಕೆದಾರರು ಅಭಿಪ್ರಾಯಪಟ್ಟಿದ್ದಾರೆ.