ಮತ್ತೆ ಪುಟಿದೆದ್ದ ಗೂಳಿ, ಒಂದೇ ದಿನ 834 ಅಂಕ ಜಿಗಿದ ಸೆನ್ಸೆಕ್ಸ್‌

ಮುಂಬಯಿ: ಕಳೆದ ಎರಡು ದಿನಗಳ ವಹಿವಾಟಿನಲ್ಲಿ 1,000 ಅಂಕ ಕಳೆದುಕೊಂಡಿದ್ದ ಸೆನ್ಸೆಕ್ಸ್‌, ಮಂಗಳವಾರ 834 ಅಂಕ ಏರಿಕೆಯಾಗಿದೆ. 48,000 ಮಟ್ಟಕ್ಕೆ ಇಳಿದಿದ್ದ ಸೆನ್ಸೆಕ್ಸ್‌ ಈಗ 49,398ಕ್ಕೆ ಮುಟ್ಟಿದೆ. ಕಳೆದ ನಾಲ್ಕು ತಿಂಗಳಲ್ಲಿ ಇದು ಒಂದು ದಿನದ ಗರಿಷ್ಠ ಜಿಗಿತ. ಇತ್ತ, ರಾಷ್ಟ್ರೀಯ ಷೇರು ಸೂಚ್ಯಂಕ ನಿಫ್ಟಿ 239 ಅಂಕ ಏರಿಕೆಯೊಂದಿಗೆ 14,521ಕ್ಕೆ ತಲುಪಿದೆ.

ಅಮೆರಿಕ ಅಧ್ಯಕ್ಷ ಸ್ಥಾನಕ್ಕೆ ಚುನಾಯಿತರಾಗಿರುವ ಜೋ ಬಿಡೆನ್‌ ಬಗ್ಗೆ ಜಾಗತಿಕ ಮಟ್ಟದಲ್ಲಿ ವಿಶ್ವಾಸ ವೃದ್ಧಿಯಾಗುತ್ತಿದೆ. ಜೊತೆಗೆ ಹಣಕಾಸು ಕಾರ್ಯದರ್ಶಿಯಾಗಿ ಜೆನೆತ್‌ ಯೆಲನ್‌ ಅವರನ್ನು ಆಯ್ಕೆ ಮಾಡಲಾಗಿದ್ದು, ಆರ್ಥಿಕ ಹಿಂಜರಿತ ತಡೆಗೆ ಅವರು ಸೂಕ್ತ ಕ್ರಮ ಕೈಗೊಳ್ಳುವ ಭರವಸೆ ಕಂಡು ಬಂದಿದೆ. ಇವೂ ಸೇರಿದಂತೆ ಜಾಗತಿಕ ಪ್ರಭಾವಗಳು ಭಾರತೀಯ ಷೇರುಪೇಟೆಯನ್ನೂ ಪ್ರಭಾವಿಸಿವೆ.
ಡಾಲರ್‌ ಎದುರು ರೂಪಾಯಿ ಚೇತರಿಕೆ, ವಿದೇಶಿ ಬಂಡವಾಳದ ಒಳಹರಿವು ಮತ್ತಷ್ಟು ಹೆಚ್ಚಳವಾಗಿದ್ದು ಷೇರುಪೇಟೆಗೆ ಬಲ ತುಂಬಿದವು. ಮಂಗಳವಾರ ಹೂಡಿಕೆದಾರರು ಖರೀದಿಗೆ ಉತ್ಸಾಹ ತೋರಿಸಿದ್ದರಿಂದ ಷೇರುಪೇಟೆ ಜಗಮಗಿಸಿತು.

ಸೆನ್ಸೆಕ್ಸ್‌ ಗುಚ್ಛದಲ್ಲಿ ಬಜಾಜ್‌ ಫಿನ್‌ಸರ್ವ್‌ ಷೇರುಗಳು ಹೆಚ್ಚಿನ ಲಾಭ (ಶೇ.6.77 ಏರಿಕೆ) ದಾಖಲಿಸಿವೆ. ಬಜಾಜ್‌ ಫೈನಾನ್ಸ್‌, ಎಚ್‌ಡಿಎಫ್‌ಸಿ, ರಿಲಯನ್ಸ್‌ ಇಂಡಸ್ಟ್ರೀಸ್‌, ಇನ್ಫೋಸಿಸ್‌, ಎಲ್‌ಆ್ಯಂಡ್‌ಟಿ, ಐಸಿಐಸಿಐ ಬ್ಯಾಂಕ್‌, ಸನ್‌ ಫಾರ್ಮಾ ಷೇರುಗಳು ಲಾಭ ಪಡೆದಿವೆ. ಟೆಕ್‌ ಮಹೀಂದ್ರಾ, ಐಟಿಸಿ ಮತ್ತು ಎಂಆ್ಯಂಡ್‌ಎಂ ಷೇರುಗಳು ಶೇ.0.54ರ ತನಕ ನಷ್ಟಗೊಂಡವು.

ಎರಡೇ ದಿನದಲ್ಲಿ 1000 ಅಂಕ ಕುಸಿದ ಸೆನ್ಸೆಕ್ಸ್‌: 14,281ಕ್ಕೆ ನಿಂತ ನಿಫ್ಟಿ!
ಸೋಮವಾರ ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು 650 ಕೋಟಿ ರೂ. ಮೌಲ್ಯದ ಷೇರುಗಳನ್ನು ಖರೀದಿಸಿದ್ದರು.

ಇರಲಿ ಎಚ್ಚರಿಕೆಯ ನಡೆ

ಕಳೆದ ಎರಡು ದಿನಗಳಲ್ಲಿ ಸೆನ್ಸೆಕ್ಸ್‌ ತೀವ್ರ ನಷ್ಟ ದಾಖಲಿಸಿತ್ತು. ಅಮೆರಿಕ ಮತ್ತು ಏಷ್ಯಾ ಮಾರುಕಟ್ಟೆಯಲ್ಲಿನ ಸಕಾರಾತ್ಮಕ ಅಂಶಗಳು ಸೆನ್ಸೆಕ್ಸ್‌ ಅನ್ನು ಪ್ರಭಾವಿಸಿವೆ. ರಿಯಾಲ್ಟಿ, ಸರಕಾರಿ ಸ್ವಾಮ್ಯದ ಬ್ಯಾಂಕ್‌ಗಳ ವಲಯದ ಷೇರುಗಳ ಖರೀದಿ ಪ್ರಕ್ರಿಯೆ ಹೆಚ್ಚಿದೆ. ಅಮೆರಿಕ ಆರ್ಥಿಕ ಚೇತರಿಕೆಗೆ ಇನ್ನಷ್ಟು ಉತ್ತೇಜಕ ಕ್ರಮಗಳು ಜಾರಿಯಾದರೆ, ಭಾರತೀಯ ಮಾರುಕಟ್ಟೆಗೆ ಇನ್ನಷ್ಟು ಅನುಕೂಲವಾಗಲಿದೆ. ಷೇರು ಮಾರುಕಟ್ಟೆಯ ಏರಿಳಿತಗಳು ಮುಂದುವರಿಯಲಿದ್ದು, ಹೂಡಿಕೆದಾರರು ಎಚ್ಚರದ ನಡೆ ಅನುಸರಿಸಬೇಕು ಎನ್ನುವುದು ತಜ್ಞರ ಸಲಹೆ.

ತೈಲ ದುಬಾರಿ

ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ದರ 1.22 ಪರ್ಸೆಂಟ್‌ ಏರಿಕೆಯಾಗಿದ್ದು, ಬ್ಯಾರೆಲ್‌ಗೆ 55.42 ಡಾಲರ್‌ಗೆ ಮುಟ್ಟಿದೆ. ಇದರ ಪರಿಣಾಮ, ದೇಶೀಯ ಮಾರುಕಟ್ಟೆಯಲ್ಲಿ ಪೆಟ್ರೋಲ್‌ ಮತ್ತು ಡೀಸೆಲ್‌ ಮತ್ತಷ್ಟು ದುಬಾರಿಯಾಗುವ ಸಾಧ್ಯತೆ ಇದೆ.