ನಿಲ್ಲದ ರೂಪಾಯಿ ಕುಸಿತಕ್ಕೆ ಸೆನ್ಸೆಕ್ಸ್ ತತ್ತರ

ಹೊಸದಿಲ್ಲಿ: ಕಚ್ಚಾ ತೈಲದ ದರ ಏರಿಕೆ ಸೇರಿದಂತೆ ಅಂತಾರಾಷ್ಟ್ರೀಯ ಮತ್ತು ದೇಶೀಯ ಪ್ರಭಾವಗಳಿಂದ ಮುಂಬಯಿ ಷೇರುಪೇಟೆಯಲ್ಲಿ ಸೆನ್ಸೆಕ್ಸ್‌ ಮಂಗಳವಾರ 509.04 ಅಂಕ ಕಳೆದುಕೊಂಡು 37,413.13ಕ್ಕೆ ಕುಸಿಯಿತು. ಇದು ಕಳೆದ 1 ತಿಂಗಳಲ್ಲಿನ ಕನಿಷ್ಠ ಮಟ್ಟವಾಗಿದೆ. ಸೆನ್ಸೆಕ್ಸ್‌ ಸೋಮವಾರ 464 ಅಂಕ ಕುಸಿದಿತ್ತು. ಒಟ್ಟಾರೆ, ವಾರದ ಆರಂಭದ ಮೊದಲ ಎರಡು ದಿನಗಳಲ್ಲಿಯೇ 1,000 ಅಂಕ ಕುಸಿದಂತಾಗಿದೆ.

''ರಾಷ್ಟ್ರೀಯ ಷೇರು ಸೂಚ್ಯಂಕ ನಿಫ್ಟಿ 150.60 ಅಂಕ ಇಳಿಕೆಯಾಗಿದ್ದು, 11,287.50ಕ್ಕೆ ಕುಸಿದಿದೆ. ಡಾಲರ್‌ ಎದುರು ರೂಪಾಯಿ ದರ ಕುಸಿಯುತ್ತಿರುವುದು ಹೂಡಿಕೆದಾರರ ಮೇಲೆ ನಕಾರಾತ್ಮಕ ಪರಿಣಾಮ ಬೀರಿದೆ,'' ಎಂದು ತಜ್ಞರು ವಿಶ್ಲೇಷಿಸಿದ್ದಾರೆ. ಜಾಗತಿಕ ವಾಣಿಜ್ಯ ಸಮರ ತೀವ್ರಗೊಳ್ಳುತ್ತಿದ್ದು ಎಫ್‌ಎಂಸಿಜಿ, ಲೋಹ, ವಾಹನ, ಫೈನಾನ್ಸಿಯಲ್‌ ಷೇರುಗಳು ಮಾರಾಟ ದೊಡ್ಡ ಪ್ರಮಾಣದಲ್ಲಿತ್ತು. ಬ್ರೆಂಟ್‌ ಕಚ್ಚಾ ತೈಲವು ಬ್ಯಾರೆಲ್‌ಗೆ 78.52 ಡಾಲರ್‌ ಮುಟ್ಟಿದೆ.