ಷೇರು ಮಾರುಕಟ್ಟೆಯಲ್ಲಿ ರಕ್ತಪಾತ

ಮುಂಬಯಿ : ಬಡ್ಡಿ ದರಗಳನ್ನು ಯಥಾಸ್ಥಿತಿಯಲ್ಲಿ ಮುಂದುವರಿಸಿದ ಆರ್‌ಬಿಐನ ಅನಿರೀಕ್ಷಿತ ತೀರ್ಮಾನ ಷೇರುಪೇಟೆ ಮೇಲೆ ನಕಾರಾತ್ಮಕ ಪ್ರಭಾವ ಬೀರಿದೆ. ಅಲ್ಲದೇ, ಡಾಲರ್‌ ಎದುರು ರೂಪಾಯಿ ಮೌಲ್ಯ ಮತ್ತಷ್ಟು ಕುಸಿದು 74ರ ಮಟ್ಟವನ್ನು ಸಮೀಪಿಸಿದೆ. ಈ ಬೆಳವಣಿಗೆಗಳಿಂದ ಮುಂಬಯಿ ಷೇರುಪೇಟೆಯಲ್ಲಿ ಸೆನ್ಸೆಕ್ಸ್‌ನ ಕುಸಿತ ಮುಂದುವರಿದಿದೆ.

ಸೆನ್ಸೆಕ್ಸ್‌ 792.17 ಅಂಕ ಕುಸಿದಿದ್ದು 34,376.99ಕ್ಕೆ ಇಳಿದಿದೆ. ಇದು ಕಳೆದ 6 ತಿಂಗಳಲ್ಲಿನ ಗರಿಷ್ಠ ಕುಸಿತ. ಇತ್ತ ರಾಷ್ಟ್ರೀಯ ಷೇರು ಸೂಚ್ಯಂಕ ನಿಫ್ಟಿ 282.80 ಅಂಕ ಕಳೆದುಕೊಂಡು, ದಿನದಾಂತ್ಯಕ್ಕೆ 10,316.45ಕ್ಕೆ ವ್ಯವಹಾರ ಅಂತ್ಯವಾಯಿತು. ಈ ವಾರ ಸೆನ್ಸೆಕ್ಸ್‌ 1,850.15 ಅಂಕ ಅಥವಾ ಶೇ.5.10ರಷ್ಟು ಕುಸಿದಿದೆ. ನಿಫ್ಟಿ 614 ಅಂಕ ಅಥವಾ ಶೇ.5.50ರಷ್ಟು ಇಳಿಕೆಯಾಗಿದೆ.

ಕಳೆದ ಮೂರು ದಿನಗಳಿಂದ ಆರ್‌ಬಿಐ ಆರ್ಥಿಕ ಪರಾಮರ್ಶೆ ಸಭೆ ನಡೆಸಿದ್ದು, ಶುಕ್ರವಾರ ರೆಪೊ ದರವನ್ನು ಶೇ.0.25ರಷ್ಟು ಏರಿಕೆ ಮಡಲಿದೆ ಎಂದು ಮಾರುಕಟ್ಟೆ ನಿರೀಕ್ಷೆ ಮಾಡಿತ್ತು. ಆರ್‌ಬಿಐ ಪ್ರಕಟಣೆ ಹೊರಬಿದ್ದ ಮೇಲೆ ಮಾರುಕಟ್ಟೆಯಲ್ಲಿ ಮಾರಾಟದ ಭರಾಟೆ ಹೆಚ್ಚಾಯಿತು. ಇದರಿಂದ ಷೇರು ಮಾರುಕಟ್ಟೆ ಒತ್ತಡಕ್ಕೆ ಸಿಲುಕಿತು. ಡಾಲರ್‌ ದರ ಏರಿಕೆ ಹಿನ್ನೆಲೆಯಲ್ಲಿ ವಿದೇಶಿ ಸಾಂಸ್ಥಿಕ ಹೂಡಿಕೆದಾರರಿಂದ ಹೊರ ಹರಿವು ಹೆಚ್ಚಳವಾಯಿತು.

ಒಎನ್‌ಜಿಸಿ ಷೇರುಗಳು ಹೆಚ್ಚಿನ ಪ್ರಮಾಣದಲ್ಲಿ ಅಂದರೆ ಶೇ.15.93ರಷ್ಟು ನಷ್ಟ ಕಂಡಿವೆ. ಆರ್‌ಐಎಲ್‌(ಶೇ.6.31), ಅದಾನಿ ಪೋರ್ಟ್ಸ್(ಶೇ.5.36), ಎಸ್‌ಬಿಐ(ಶೇ.4.73), ಭಾರ್ತಿ ಏರ್‌ಟೆಲ್‌(ಶೇ.4.27), ಮಾರುತಿ ಸುಜುಕಿ(ಶೇ.4.18), ಯೆಸ್‌ ಬ್ಯಾಂಕ್‌(ಶೇ.4.16), ಬಜಾಜ್‌ ಆಟೊ(ಶೇ.3.97), ಐಟಿಸಿ ಲಿಮಿಟೆಡ್‌(ಶೇ.3.52), ವೇದಾಂತ ಲಿಮಿಟೆಡ್‌(ಶೇ.3.42), ಎಂ ಆ್ಯಂಡ್‌ ಎಂ (ಶೇ.3.35), ಎಚ್‌ಡಿಎಫ್‌ಸಿ(ಶೇ.3.24), ಏಕ್ಸಿಸ್‌ ಬ್ಯಾಂಕ್‌(ಶೇ.3.01) ಷೇರುಗಳು ಕುಸಿದಿವೆ.

ಇನ್ಫಿ, ಟಿಸಿಎಸ್‌ ಏರಿಕೆ:

ಷೇರುಪೇಟೆಯಲ್ಲಿ ಒಂದು ಕಡೆ ಕುಸಿತ ಕಂಡು ಬಂದಿದ್ದರೆ, ಏತನ್ಮಧ್ಯೆ ಇನ್ಫೋಸಿಸ್‌ ಮತ್ತು ಟಿಸಿಎಸ್‌ ಷೇರುಗಳು ಕ್ರಮವಾಗಿ ಶೇ.2.19 ಮತ್ತು ಶೇ.1.88ರಷ್ಟು ಲಾಭ ಗಳಿಸಿವೆ.

==

ಕೇಂದ್ರ ಸರಕಾರವು ಪೆಟ್ರೋಲ್‌ ಮತ್ತು ಡೀಸೆಲ್‌ ಮೇಲಿನ ಅಬಕಾರಿ ಸುಂಕದಲ್ಲಿ ಶೇ.1.5ರಷ್ಟು ಕಡಿತ ಮಾಡಿದೆ. ಅಲ್ಲದೇ ತೈಲ ಕಂಪನಿಗಳು ಲೀಟರ್‌ಗೆ 1 ರೂಪಾಯಿ ನಷ್ಟವನ್ನು ಭರಿಸುವಂತೆ ಸೂಚಿಸಿದೆ. ಈ ಕ್ರಮದಿಂದಾಗಿ ತೈಲ ಕಂಪನಿಗಳ ಷೇರುಗಳು ಕುಸಿದಿವೆ. ಎಚ್‌ಪಿಸಿಎಲ್‌ ಷೇರುಗಳು ಶೇ.25.18, ಬಿಪಿಸಿಎಲ್‌ ಷೇರುಗಳು ಶೇ.21.11, ಐಒಸಿ ಷೇರುಗಳು ಶೇ.16.99ರಷ್ಟು ಕುಸಿದಿವೆ.