ದೇಶದಲ್ಲಿ ಕೊರೊನಾ ಪ್ರಕರಣಗಳು ಇಳಿಕೆ, 848 ಅಂಕ ಜಿಗಿತ ಕಂಡ ಸೆನ್ಸೆಕ್ಸ್‌

ಮುಂಬಯಿ: ದೇಶದಲ್ಲಿ ಹೊಸ ಕೋವಿಡ್‌-19 ಪ್ರಕರಣಗಳ ಸಂಖ್ಯೆ ಇಳಿಕೆಯಾಗುತ್ತಿರುವ ವರದಿಗಳು ಸೋಮವಾರ ಷೇರು ಮಾರುಕಟ್ಟೆಯ ಮೇಲೆ ಸಕಾರಾತ್ಮಕ ಪ್ರಭಾವ ಬೀರಿತು. ಮುಂಬಯಿ ಷೇರು ಮಾರುಕಟ್ಟೆ ಸಂವೇದಿ ಸೂಚ್ಯಂಕ ಸೆನ್ಸೆಕ್ಸ್‌ 848 ಅಂಕಗಳ ಏರಿಕೆ ದಾಖಲಿಸಿ 49,580ಕ್ಕೆ ದಿನದ ವಹಿವಾಟು ಮುಕ್ತಾಯಗೊಳಿಸಿತು. ನಿಫ್ಟಿ ಕೂಡ 245 ಅಂಕ ಏರಿಕೆಯಾಗಿ 14,923ಕ್ಕೆ ಸ್ಥಿರವಾಯಿತು. ಕಳೆದ ಹಲವು ದಿನಗಳಿಂದ ಷೇರು ಮಾರುಕಟ್ಟೆ ಒಂದೋ ಇಳಿಕೆ ಹಾದಿಯಲ್ಲಿ, ಇಲ್ಲವೇ ಹೆಚ್ಚು ಏರಿಕೆ ಕಾಣದೇ ವಹಿವಾಟು ಮುಗಿಸುತ್ತಿತ್ತು. ಸೋಮವಾರ ಹಲವು ದಿನಗಳ ಬಳಿಕ ಮೊದಲ ಬಾರಿಗೆ ಭಾರಿ ಏರಿಕೆ ದಾಖಲಿಸಿದೆ.

ಷೇರು ಮಾರುಕಟ್ಟೆಯಲ್ಲಿ ಕರಡಿ ಕುಣಿತ, ಬರೋಬ್ಬರಿ 1,145 ಅಂಕ ಕಳೆದುಕೊಂಡ ಸೆನ್ಸೆಕ್ಸ್‌
"ಬ್ಯಾಂಕಿಂಗ್‌, ಲೋಹ, ಆಟೊಮೊಬೈಲ್‌ ವಲಯದ ಷೇರುಗಳು ಲಾಭ ಗಳಿಸಿತು. ಹೊಸ ಕೋವಿಡ್‌-19 ಪ್ರಕರಣಗಳು ಇಳಿಕೆಯಾಗುತ್ತಿರುವುದು ಸಕಾರಾತ್ಮಕ ಪ್ರಭಾವ ಬೀರಿತು" ಎಂದು ಜಿಯೊಜಿತ್‌ ಫೈನಾನ್ಷಿಯಲ್‌ ಸರ್ವೀಸ್‌ನ ಮುಖ್ಯಸ್ಥ ವಿನೋದ್‌ ನಾಯರ್‌ ತಿಳಿಸಿದ್ದಾರೆ. ಶಾಂಘೈ, ಹಾಂಕಾಂಗ್‌ನಲ್ಲೂ ಷೇರು ಸೂಚ್ಯಂಕಗಳು ಚೇತರಿಸಿತು.

ಇಂಡಸ್‌ ಇಂಡ್‌ ಬ್ಯಾಂಕ್‌, ಎಸ್‌ಬಿಐ, ಐಸಿಐಸಿಐ ಬ್ಯಾಂಕ್‌, ಎಚ್‌ಡಿಎಫ್‌ಸಿ ಬ್ಯಾಂಕ್‌, ಎಕ್ಸಿಸ್‌ ಬ್ಯಾಂಕ್‌ ಷೇರುಗಳು ಗರಿಷ್ ಲಾಭ ಗಳಿಸಿದವು.