6 ದಿನಕ್ಕೆ 6 ಸಲ ಮಿಲನ ಮಹೋತ್ಸವ!

ಹೊಸದಿಲ್ಲಿ: 6 ದಿನದಲ್ಲಿ 6 ಸಲ ಮಿಲನ ಮಹೋತ್ಸವದಲ್ಲಿ ಪಾಲ್ಗೊಳ್ಳಿ ಎಂದು ಚೀನಾದ ಅಲಿಬಾಬಾ ಕಂಪನಿಯ ಸಂಸ್ಥಾಪಕ ಜಾಕ್‌ ಮಾ ಅವರು ಉದ್ಯೋಗಿಗಳಿಗೆ ಕರೆ ನೀಡಿದ್ದಾರೆ. ''ಇದರಿಂದ ಸಮೃದ್ಧ ಜೀವನ ಸಾಧ್ಯವಾಗುತ್ತದೆ, ಜೀವನ ಮಟ್ಟ ಸುಧಾರಿಸುತ್ತದೆ,'' ಎಂದು ಸಲಹೆ ನೀಡಿದ್ದಾರೆ.

ಉದ್ಯೋಗಿಗಳಿಗೆ ''996'' ಸೂತ್ರವನ್ನು(ಬೆಳಗ್ಗೆ 9ರಿಂದ ರಾತ್ರಿ 9ರ ತನಕ, 6 ದಿನದ ಕೆಲಸ) ಜಾರಿಗೊಳಿಸಬೇಕು ಎಂದು ಪ್ರತಿಪಾದಿಸಿದ್ದ ಅವರು, ಈಗ 6 ದಿನದಲ್ಲಿ 6 ಸಲ ಮಿಲನ ಮಹೋತ್ಸವದ ಸೂತ್ರವನ್ನು ಪ್ರಸ್ತಾಪಿಸಿದ್ದಾರೆ. ಇದನ್ನು 'ಸ್ಪಿರಿಟ್‌ ಆಫ್‌ 669'' ಎಂದು ಕರೆದಿದ್ದಾರೆ. 6ದಿನ 6 ಸಲ ಸೆಕ್ಸ್‌, ಇಲ್ಲಿ ಸಮಯವನ್ನು ಅಂದಾಜು 9 ಗಂಟೆ ಅಂದುಕೊಳ್ಳಬೇಕಂತೆ.

ಚೀನಾದ ಕುಬೇರನೆಂದೇ ಕರೆಯಲಾಗುವ 54 ವರ್ಷದ ಜಾಕ್‌ ಮಾ, ತಮ್ಮ ಕಂಪನಿ ವತಿಯಿಂದ ನಡೆದ ಉದ್ಯೋಗಿಗಳ ಸಾಮೂಹಿಕ ವಿವಾಹ ಕಾರ್ಯಕ್ರಮದಲ್ಲಿ ''669''ರ ಸಲಹೆ ನೀಡಿದ್ದಾರೆ. ''ಕೆಲಸದ ಸಮಯದಲ್ಲಿ ನಾವು ಸ್ಪಿರಿಟ್‌ '996'ಗೆ ಒತ್ತು ನೀಡುತ್ತೇವೆ. ಬದುಕಿನಲ್ಲಿ '660' ಅನ್ನು ಅನುಸರಿಸಬೇಕು,'' ಎನ್ನುವುದು ಜಾಕ್‌ ಮಾ ಸಲಹೆ.

ಪ್ರತಿ ವರ್ಷ ಮೇ 10ರಂದು ಕಂಪನಿಯ ಮುಖ್ಯ ಕಚೇರಿಯ ಹಂಗ್‌ ಝೌನಲ್ಲಿ 'ಅಲಿ ಡೇ' ಆಚರಿಸಲಾಗುತ್ತದೆ. ಅ ದಿನ ಸಾಮೂಹಿಕ ವಿವಾಹ ಕಾರ್ಯಕ್ರಮ ಆಯೋಜಿಸಲಾಗುತ್ತದೆ.

ಕೆಲಸಕ್ಕೆ 996, ಬದುಕಿಗೆ 669
ಜಾಕ್‌ ಮಾ ಅವರ ಸಲಹೆಯು ಸಾಮಾಜಿಕ ಜಾಲತಾಣಗಳಲ್ಲಿ ಬಿಸಿಬಿಸಿ ಚರ್ಚೆಗೆ ಕಾರಣವಾಗಿದೆ. '996'ರ ಪ್ರಕಾರ ವಾರದ 6 ದಿನವೂ ಬೆಳಗ್ಗೆ 9ರಿಂದ ರಾತ್ರಿ 9ರ ತನಕ ಕೆಲಸ ಮಾಡಿದರೆ, '669'ಕ್ಕೆ ತ್ರಾಣ ಎಲ್ಲಿರುತ್ತದೆ ಎಂದು ಕೆಲವರು ಪ್ರಶ್ನಿಸಿದ್ದಾರೆ. ಜಾಕ್‌ ಮಾ ಅವರ '996' ಸೂತ್ರಕ್ಕೂ ಟೆಕ್‌ ಉದ್ಯಮದಿಂದ ವ್ಯಾಪಕ ವಿರೋಧ ವ್ಯಕ್ತವಾಗಿತ್ತು.