ಬೆಂಗಳೂರು: ಇನ್ಫೋಸಿಸ್‌ನ ಸಿಇಒ ವಿಶಾಲ್ ಸಿಕ್ಕಾ ಅವರಿಗೆ ಸಂಬಳ ಜಾಸ್ತಿ ಆಯಿತು ಎಂದು ಈ ಹಿಂದೆ ಅಸಮಾಧಾನ ವ್ಯಕ್ತಪಡಿಸಿದ್ದವರನ್ನು ಸಮಾಧಾನಪಡಿಸುವಂತೆ, ಅವರ 2016-17ರ ವೇತನ ಪ್ಯಾಕೇಜ್‌ನ ಭಾಗವಾಗಿರುವ ಟಾರ್ಗೆಟ್ ವೇರಿಯಬಲ್ ಕಾಂಪನ್‌ಸೇಶನ್ (ಟಿವಿಪಿ)ಮೊತ್ತದಲ್ಲಿ ಶೇ.40ರಷ್ಟು ಕಡಿತ ಮಾಡಲಾಗಿದೆ.
ವಿಶಾಲ್ ಸಿಕ್ಕಾ ಅವರು 2016-17ರ ಸಾಲಿಗೆ 3.68 ದಶಲಕ್ಷ ಡಾಲರ್ ಟಿವಿಪಿ ಗಳಿಸಿದ್ದಾರೆ.
ಇನ್ಫೋಸಿಸ್‌ನ ಸಾಧನೆಯು ನಾಲ್ಕನೇ ತ್ರೈಮಾಸಿಕದಲ್ಲಿ ಇಳಿಕೆಯಾಗಿರುವುದರಿಂದ ಅವರ ಟಿವಿಪಿಗೆ ಕತ್ತರಿ ಹಾಕಲಾಗಿದೆ.
ಇನ್ಫೋಸಿಸ್‌ನ ಸಂಸ್ಥಾಪಕರಲ್ಲೊಬ್ಬರಾದ ಎನ್.ಆರ್ ನಾರಾಯಣ ಮೂರ್ತಿ ಮತ್ತು ಇತರರು ಕಂಪನಿಯ ಉನ್ನತ ಹುದ್ದೆಯಲ್ಲಿರುವವರು ಭಾರಿ ವೇತನ ತೆಗೆದುಕೊಳ್ಳುತ್ತಿರುವುದಕ್ಕೆ ಬಹಿರಂಗವಾಗಿಯೇ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದರು. ಸಿಇಒ ಸಿಕ್ಕಾ ಹಾಗೂ ಸಿಒಒ ಯುಬಿ ಪ್ರವೀಣ್ ರಾವ್ ಅವರ ಸಂಬಳದಲ್ಲಿ ಗಣನೀಯ ಹೆಚ್ಚಳವನ್ನು ಹಲವು ಕಟುವಾಗಿ ಟೀಕಿಸಿದ್ದರು. 2016-17ರಲ್ಲಿ ಇನ್ಫೋಸಿಸ್‌ನ ಪ್ರದರ್ಶನ ನಿರಾಶಾದಾಯಕವಾಗಿತ್ತು.
ಇನ್ಫೋಸಿಸ್ ಮಾರ್ಚ್‌ಗೆ ಅಂತ್ಯವಾದ ತ್ರೈಮಾಸಿಕದಲ್ಲಿ 3,603 ಕೋಟಿ ರೂ. ನಿವ್ವಳ ಲಾಭ ಗಳಿಸಿದ್ದರೂ, ಮಾರುಕಟ್ಟೆಯ ನಿರೀಕ್ಷೆ ಮುಟ್ಟಿರಲಿಲ್ಲ. ಆದಾಯದ ಬೆಳವಣಿಗೆಯ ಅಂದಾಜು ಕೂಡ ತೃಪ್ತಿಕರವಾಗಿರಲಿಲ್ಲ. 2015-16ರ ಸಾಲಿಗೆ ಸಿಕ್ಕಾ 7.45 ದಶಲಕ್ಷ ಡಾಲರ್ (ಅಂದಾಜು 48.73 ಕೋಟಿ ರೂ.) ವಾರ್ಷಿಕ ನಿವ್ವಳ ವೇತನ ಗಳಿಸಿದ್ದರು. ಅವರ ವೇತನ ಟಿಸಿಎಸ್ ಹಾಗೂ ಇತರ ಐಟಿ ಕಂಪನಿಗಳ ಸಿಇಒಗಳಿಗಿಂತ ಹೆಚ್ಚಿನ ಮೊತ್ತದ್ದಾಗಿತ್ತು.