ಅಮೆರಿಕ ಪ್ರವಾಸ ಕೈಗೊಳ್ಳುವ ಭಾರತೀಯರ ಸಂಖ್ಯೆ ಗಣನೀಯ ಕುಸಿತ

[This story originally published in Times of India on Sept.14, 2018]

Vijaya Karnataka Web

ಹೊಸದಿಲ್ಲಿ: ಕಳೆದ 8 ವರ್ಷಗಳಲ್ಲಿ ಇದೇ ಮೊದಲ ಬಾರಿಗೆ ಅಮೆರಿಕಕ್ಕೆ ತೆರಳುವ ಭಾರತೀಯರ ಸಂಖ್ಯೆ ಗಣನೀಯ ಪ್ರಮಾಣದಲ್ಲಿ ಕುಸಿತ ಕಂಡಿದೆ. 2017ರಲ್ಲಿ ಅಮೆರಿಕಕ್ಕೆ ತೆರಳಿದ ಭಾರತೀಯರ ಸಂಖ್ಯೆ 11.14 ಲಕ್ಷ ಆಗಿತ್ತು. ಅದಕ್ಕೂ ಹಿಂಧಿನ ವರ್ಷ 11.72 ಲಕ್ಷ ಭಾರತೀಯರು ಅಮೆರಿಕ ಪ್ರವಾಸ ಕೈಗೊಂಡಿದ್ದರು. ಅಮೆರಿಕದ ವಾಣಿಜ್ಯ ಇಲಾಖೆಯ ನ್ಯಾಷನಲ್ ಟ್ರಾವೆಲ್ ಅಂಡ್ ಟ್ರೇಡ್‌ ಆಫೀಸ್‌ (ಎನ್‌ಟಿಟಿಓ) ಅಂಕಿ-ಅಂಶಗಳಿಂದ ಈ ಮಾಹಿತಿ ಹೊರಬಿದ್ದಿದೆ.

ಎನ್‌ಟಿಟಿಓ ಕಳೆದ ಏಪ್ರಿಲ್‌ನಲ್ಲಿ ತಾತ್ಕಾಲಿಕವಾಗಿ ಸಾಗರೋತ್ತರ ಪ್ರವಾಸಿಗರ ಭೇಟಿ ವರದಿ ಪ್ರಕಟಣೆಯನ್ನು ತಡೆಹಿಡಿದಿತ್ತು. ಅಮೆರಿಕದ ಕಸ್ಟಂಸ್‌ ಮತ್ತು ಗಡಿ ರಕ್ಷಣಾ (ಸಿಬಿಪಿ) ವಿಭಾಗದ ದಾಖಲೆಗಳು ಅಸಮರ್ಪಕವಾಗಿವೆ ಎಂಬ ಕಾರಣಕ್ಕೆ ವರದಿ ಪ್ರಕಟಣೆ ಸ್ಥಗಿತಗೊಳಿಸಲಾಗಿತ್ತು.

ಇದರಿಂದಾಗಿ 2017ರಲ್ಲಿ ಅಮೆರಿಕಕ್ಕೆ ಭೇಟಿ ನೀಡಿದ ಅಂತಾರಾಷ್ಟ್ರೀಯ ಪ್ರವಾಸಿಗರ ದಾಖಲೆಗಳು ಲಭ್ಯವಿರಲಿಲ್ಲ. ಬುಧವಾರದಂದು ಅಮೆರಿಕದ ಇಲಾಖೆ 2017ರ ಮುನ್ಸೂಚನಾ ವರದಿಯನ್ನು ಮಾತ್ರ ಬಿಡುಗಡೆ ಮಾಡಿದೆ. ಅದರ ತುಲನಾತ್ಮಕ ಅಧ್ಯಯನವು, ಭಾರತೀಯ ಯಾತ್ರಿಕರ ಸಂಖ್ಯೆ ಕುಸಿದಿರುವುದನ್ನು ತೋರಿಸಿದೆ.

ಈ ಮೊದಲು 2009ರಲ್ಲಿ 5.5 ಲಕ್ಷ ಭಾರತೀಯ ಪ್ರವಾಸಿಗರು ಅಮೆರಿಕ ಯಾತ್ರೆ ಮಾಡಿದ್ದರು. ಈ ಪ್ರಮಾಣ ಅದರ ಹಿಂದಿನ ವರ್ಷಕ್ಕಿಂತ ಶೇ 8ರಷ್ಟು ಕಡಿಮೆಯಾಗಿತ್ತು. ಜಾಗತಿಕ ಆರ್ಥಿಕ ಹಿಂಜರಿತದಿಂದಾಗಿ ಕಾರ್ಪೊರೇಟ್‌ಗಳು, ಉದ್ಯಮಿಗಳು ಮತ್ತು ವೈಯಕ್ತಿಕ ಪ್ರವಾಸಿಗರು ಸೇರಿದಂತೆ ಈ ಸಂಖ್ಯೆ ಕುಸಿತವಾಗಿತ್ತು. ಆ ಬಳಿಕ 2016ರ ವರೆಗೂ ಅಮೆರಿಕಕ್ಕೆ ಪ್ರವಾಸ ಮಾಡುವ ಭಾರತೀಯರ ಸಂಖ್ಯೆ ಸತತವಾಗಿ ಏರುಮುಖವಾಗಿತ್ತು.

ಹಾಗಿದ್ದರೂ ಇದು ತಾತ್ಕಾಲಿಕ ಕುಸಿತ ಎನ್ನಬಹುದು. ಎನ್‌ಟಿಟಿಓ ಬಿಡುಗಡೆ ಮಾಡಿರುವ 2018ರಿಂದ 2022ರ ವರೆಗಿನ ಭಾರತೀಯ ಯಾತ್ರಿಕರ ಮುನ್ಸೂಚನಾ ವರದಿಯಲ್ಲಿ ಈ ಸಂಖ್ಯೆ ಹೆಚ್ಚುವ ಬಗ್ಗೆ ಭವಿಷ್ಯ ನುಡಿದಿದೆ.

ಪ್ರವಾಸೋದ್ಯಮದ ಮೂಲಗಳ ಪ್ರಕಾರ, ಕಳೆದ ಹಲವು ವರ್ಷಗಳಿಂದ ಅಂತಾರಾಷ್ಟ್ರೀಯ ಪ್ರವಾಸ ಕೈಗೊಳ್ಳುವ ಭಾರತೀಯರ ಸಂಖ್ಯೆ ಪ್ರತಿ ವರ್ಷ ಶೇ 10-12ರಷ್ಟು ಏರಿಕೆ ಕಾಣುತ್ತಿದೆ.

ಇತ್ತೀಚಿನ ವರ್ಷಗಳಲ್ಲಿ ಅಮೆರಿಕ ವಿದೇಶಿ ಪ್ರವಾಸಿಗರ ಕುರಿತು ಅನುಸರಿಸುತ್ತಿರುವ ನಾನಾ ನಿರ್ಬಂಧಗಳು ಈ ಕುಸಿತಕ್ಕೆ ಕಾರಣವಾಗಿವೆ. ಅಮೆರಿಕ ಪ್ರವಾಸ ಕೈಗೊಳ್ಳುವುದು ಮೊದಲಿನಷ್ಟು ಸುಲಭ ಅಲ್ಲ ಎಂಬ ಭಾವನೆ ಪ್ರವಾಸಿಗರಲ್ಲಿ ಬೇರೂರಿರುವುದು ಇದಕ್ಕೆ ಕಾರಣ ಎಂದು ಪ್ರವಾಸಿ ಏಜೆಂಟರೊಬ್ಬರು ಅಭಿಪ್ರಾಯ ಪಡುತ್ತಾರೆ.