ಹೊಸ ಕಾರ್‌ಗಳಿಗೆ ನಂಬರ್‌ ಪ್ಲೇಟ್‌ ಫಿಟ್‌ ಮಾಡಿಯೇ ವಿತರಣೆ

ಹೊಸದಿಲ್ಲಿ: ಕಾರುಗಳಿಗೆ ವಾಹನ ತಯಾರಕ ಕಂಪನಿಗಳೇ ನಂಬರ್‌ ಪ್ಲೇಟ್‌ ಅನ್ನು ಅಳವಡಿಸಿ, ಗ್ರಾಹಕರಿಗೆ ವಿತರಿಸುವ ಪದ್ಧತಿ ಸದ್ಯದಲ್ಲಿಯೇ ಜಾರಿಗೆ ಬರಲಿದೆ ಎಂದು ಕೇಂದ್ರ ಸಾರಿಗೆ ಸಚಿವ ನಿತಿನ್‌ ಗಡ್ಕರಿ ಹೇಳಿದ್ದಾರೆ. ನಂಬರ್‌ ಪ್ಲೇಟ್‌ ದರವು ವಾಹನದ ಮೂಲ ದರದಲ್ಲಿಯೇ ಸೇರಿಕೊಂಡಿರುತ್ತದೆ.

ಪ್ರಸ್ತುತ ಆಯಾ ರಾಜ್ಯಗಳ ಜಿಲ್ಲಾ ಮಟ್ಟದ ಪ್ರಾಂತೀಯ ಸಾರಿಗೆ ಕಚೇರಿಗಳು(ಆರ್‌ಟಿಒ) ಪರವಾನಗಿ ಸಂಖ್ಯೆಯನ್ನು ಗ್ರಾಹಕರಿಗೆ ವಿತರಿಸುವ ಪದ್ಧತಿ ಜಾರಿಯಲ್ಲಿದೆ. ''ನಾವು ಮಹತ್ವದ ತೀರ್ಮಾನ ಕೈಗೊಂಡಿದ್ದು, ಇನ್ನು ವಾಹನ ತಯಾರಕ ಕಂಪನಿಗಳೇ ನಂಬರ್‌ ಪ್ಲೇಟ್‌ಗಳನ್ನು ವಾಹನಗಳಿಗೆ ಅಳವಡಿಸಿ ಗ್ರಾಹಕರಿಗೆ ನೀಡಲಿವೆ. ಹೊಸ ತಂತ್ರಜ್ಞಾನದ ನಂಬರ್‌ ಪ್ಲೇಟ್‌ಗಳ ಬಳಕೆ ಪದ್ಧತಿಯಿಂದ ದೇಶದಲ್ಲಿ ಏಕರೂಪತೆ ಕಾಣಿಸಲಿದೆ, '' ಎಂದು ಗಡ್ಕರಿ ಹೇಳಿದ್ದಾರೆ.

ನಂಬರ್‌ ಪ್ಲೇಟ್‌ ವಿಷಯದಲ್ಲಿ ಭದ್ರತೆಗೆ ಸಂಬಂಧಿಸಿದಂತೆ ರಾಜಿ ಪ್ರಶ್ನೆಯೇ ಇಲ್ಲ ಎಂದು ಹೇಳಿದರು.