ವಿಂಟೇಜ್‌ ಕಾರುಗಳಿಗೆ ವಿಶೇಷ ನಂಬರ್‌ ಪ್ಲೇಟ್‌; ಪಡೆಯುವುದು ಹೇಗೆ? ಶುಲ್ಕವೆಷ್ಟು? ಇಲ್ಲಿದೆ ಮಾಹಿತಿ

ಹೊಸದಿಲ್ಲಿ: ವಿಂಟೇಜ್‌ ಕಾರು ಮತ್ತು ಇತರ ವಾಹನಗಳಿಗೆ ಶೀಘ್ರದಲ್ಲಿಯೇ 'ವಿಎ' ಎಂಬ ಎರಡಕ್ಷರವನ್ನು ಒಳಗೊಂಡಿರುವ ವಿಶೇಷ ನೋಂದಣಿ ಸಂಖ್ಯೆಗಳು ಸಿಗಲಿವೆ. ಹೀಗಾಗಿ 50 ವರ್ಷಕ್ಕೂ ಹೆಚ್ಚು ಹಳೆಯ ವಿಂಟೇಜ್‌ ವಾಹನಗಳನ್ನು ಸುಲಭವಾಗಿ ಗುರುತಿಸಬಹುದು. ಇಲಾಖಾಧಿಕಾರಿಗಳ ಶೋಷಣೆಗಳಿಂದಲೂ ಇದು ಮುಕ್ತ ನೀಡಲಿದೆ.

ವಿಎ ಎಂಬ ಅಕ್ಷರ ವಿಂಟೇಜ್‌ ಎಂಬುದನ್ನು ಬಿಂಬಿಸಲಿದೆ. ರಾಜ್ಯಗಳ ಕೋಡ್‌ ಅಕ್ಷರದ ನಂತರ ಇದು ಬರಲಿದೆ. ಉದಾಹರಣೆಗೆ ದಿಲ್ಲಿಯಲ್ಲಿ ವಿಂಟೇಜ್‌ ವಾಹನದ ನೋಂದಣಿ ಸಂಖ್ಯೆ ಡಿಎಲ್‌ವಿಎ 1234 ಎಂದು ಇರಲಿದೆ. ಮಹಾರಾಷ್ಟ್ರದಲ್ಲಿ ಎಂಎಚ್‌ವಿಎ 1234 ಮತ್ತು ಕರ್ನಾಟಕದಲ್ಲಿ ಕೆಎವಿಎ 1234 ಎಂದು ಇರಲಿದೆ. ನೋಂದಣಿ 10 ವರ್ಷಗಳ ಅವಧಿಯಾಗಿದ್ದು, ನಂತರ ನವೀಕರಿಸಬಹುದು. ನೋಂದಣಿಗೆ ಸಂಬಂಧಿಸಿ ಸಾರಿಗೆ ಇಲಾಖೆಗೆ 20,000 ರೂ. ಶುಲ್ಕ ನೀಡಬೇಕಾಗುತ್ತದೆ.

ಹೀಗಿದ್ದರೂ, ಈ ವಿಂಟೇಜ್‌ ವಾಹನಗಳನ್ನು ದೈನಂದಿನ ಬಳಕೆಗೋಸ್ಕರ ರಸ್ತೆಗೆ ಇಳಿಸಲು ಅನುಮತಿ ಇರುವುದಿಲ್ಲ. ಯಾವುದೇ ವಾಣಿಜ್ಯೋದ್ದೇಶಕ್ಕೂ ಬಳಸುವಂತಿಲ್ಲ. ಯಾವುದೇ ಪ್ರದರ್ಶನ, ರ್ಯಾಲಿ ಅಥವಾ ಮ್ಯೂಸಿಯಂ ಬಳಕೆಗೆ ಅನುಮತಿ ಇರುತ್ತದೆ. ತಾಂತ್ರಿಕ ಸಂಶೋಧನೆ, ಸಿನಿಮಾಟೋಗ್ರಫಿ, ಹೆರಿಟೇಜ್‌ ಪ್ರವಾಸ ಇತ್ಯಾದಿ ನಿರ್ದಿಷ್ಟ ಉದ್ದೇಶಗಳಲ್ಲೂ ಬಳಸಬಹುದು.

ಇಂಡಿಯಾ ಗೇಟಲ್ಲಿ ಹಳೆ ಕಾರು, ಬೈಕ್‌ ಪ್ರದರ್ಶನ (ವಿಡಿಯೋ ನೋಡಿ)

ಸಾರಿಗೆ ಸಚಿವಾಲಯ ಮೊದಲ ಬಾರಿಗೆ ವಿಂಟೇಜ್‌ ವಾಹನಗಳಿಗೆ ಸಂಬಂಧಿಸಿ ಕರಡು ನಿಯಮಾವಳಿಗಳನ್ನು ರಚಿಸಿದೆ. ಈ ವಿಂಟೇಜ್‌ ವಾಹನಗಳು ಹೈ ಸೆಕ್ಯುರಿಟಿ ನಂಬರ್‌ ಪ್ಲೇಟ್‌ಗಳನ್ನು ಒಳಗೊಂಡಿರಬೇಕು. ವಿಂಟೇಜ್‌ ವಾಹನಗಳಿಗೆ ಅವುಗಳ ರಚನೆ, ವಿನ್ಯಾಸ, ನಿರ್ವಹಣೆ, ಮಾಲಿನ್ಯ ನಿಯಂತ್ರಣ ಕುರಿತ ಶಾಸನಾತ್ಮಕ ನಿಯಮಾವಳಿಗಳಿಂದ ವಿನಾಯಿತಿ ಇರುತ್ತದೆ. ಉದ್ದೇಶಿತ ನಿಯಮಗಳ ಪ್ರಕಾರ ಈ ವಾಹನಗಳ ನಿವೃತ್ತಿಯ ವಯಸ್ಸನ್ನು ಸರಕಾರ ಅಧಿಸೂಚನೆ ಹೊರಡಿಸಿ ನಿರ್ಧರಿಸುವುದಿಲ್ಲ.

ವಿಂಟೇಜ್‌ ಕಾರು ಪ್ರಿಯರಿಗೆ ಸಖತ್‌ ಕಲೆಕ್ಷನ್ಸ್‌ ಇಲ್ಲಿದೆ (ಫೋಟೊಗಳನ್ನು ನೋಡಿ)

ಕರಡು ನಿಯಮಾವಳಿಗಳ ಪ್ರಕಾರ ಪ್ರತಿ ರಾಜ್ಯದಲ್ಲೂ ವಿಂಟೇಜ್‌ ಮೋಟಾರ್‌ ವೆಹಿಕಲ್ಸ್‌ ಸ್ಟೇಟ್‌ ಕಮಿಟಿ (ವಿಎಂವಿಎಸ್‌ಸಿ) ಅಸ್ತಿತ್ವಕ್ಕೆ ಬರಲಿವೆ. ಅದು ವಿಂಟೇಜ್‌ ವಾನಹಗಳಿಗೆ ಮಾನ್ಯತೆ ನೀಡಲಿದೆ. ವಿಂಟೇಜ್‌ ವಾಹನ ಎಂಬ ಮಾನ್ಯತೆ ಇರುವ ವಾಹನಗಳನ್ನು ಅದರ ಮೂಲ ಸ್ವರೂಪದಲ್ಲಿಯೇ ಉಳಿಸಿಕೊಳ್ಳಲು ಅವಕಾಶ ಮತ್ತು ಅರ್ಹತೆ ಇರುತ್ತದೆ.

ಮೈಸೂರು: ಕಾರ್‌ ಕಾರ್‌ ಎಲ್ನೋಡಿ ಕಾರ್‌!