ಸ್ಪೈಸ್‌ಜೆಟ್‌ನಿಂದ ಸ್ಪೈಸಿ ಆಫರ್; 12 ರೂ.ಗೆ ವಿಮಾನದ ಟಿಕೆಟ್

ಗುರುಗಾಂವ್: ಕೇವಲ 12 ರೂ.ಗಳಲ್ಲಿ ದೇಶ ಮತ್ತು ವಿದೇಶ ಪ್ರಯಾಣಿಸಬಹುದಾದ ಬಂಪರ್ ಆಫರ್‌ಅನ್ನು ರಾಷ್ಟ್ರದ 3ನೇ ಅತಿದೊಡ್ಡ ವಿಮಾನ ಸಂಸ್ಥೆ ಸ್ಪೈಸ್‌ಜೆಟ್ ನೀಡಿದೆ. 12ನೇ ವಾರ್ಷಿಕೋತ್ಸವ ಸಂಭ್ರಮದ ಭಾಗವಾಗಿ ಸ್ಫೈಸ್‌ಜೆಟ್, ಆರಂಭಿಕ ದರ 12 ರೂ.ಗಳ ಟಿಕೆಟ್ ಆಫರ್ ಬಿಡುಗಡೆ ಮಾಡಿದೆ.

ಜೂನ್ 26, 2017 ರಿಂದ ಮಾರ್ಚ್ 24, 2018 ವರೆಗಿನ ಅವಧಿಯಲ್ಲಿ ಆಫರ್‌ ಟಿಕೆಟ್ ಮೂಲಕ ಪ್ರಯಾಣಿಸಬಹುದು. ಟಿಕೆಟ್ ಕಾಯ್ದಿರಿಸಲು ಮೇ 23ರಿಂದ ಮೇ 28ರ ವರೆಗೆ ಕಾಲಾವಕಾಶವಿದ್ದು, ಲಕ್ಕಿ ಪ್ರಯಾಣಿಕರು 12 ರೂ. ಟಿಕೆಟ್‌ನಲ್ಲಿ ಪ್ರಯಾಣಿಸಬಹುದಾಗಿದೆ.

ಅತ್ಯಂತ ಅಗ್ಗದ ದರದಲ್ಲಿ ಪ್ರಯಾಣಿಸುವ ಅವಕಾಶದ ಜತೆಗೆ '12 ಸಾಲ್, ಬಡಾ ಧಮಾಲ್' ಎಂಬ ಲಕ್ಕಿ ಡ್ರಾ ಘೋಷಿಸಿದೆ. ದೇಶ ಮತ್ತು ವಿದೇಶ ಪ್ರಯಾಣದ ಉಚಿತ ವಿಮಾನ ಟಿಕೆಟ್, 10,000 ರೂ. ಬೆಲೆಯ ಹೋಟೆಲ್ ವೋಚರ್ ಸೇರಿದಂತೆ ಮತ್ತಿತರ ಆಕರ್ಷಕ ಬಹುಮಾನಗಳನ್ನು ಗೆಲ್ಲಬಹುದಾಗಿದೆ.

ಸ್ಪೈಸ್‌ಜೆಟ್ 358 ವಿಮಾನಗಳು ಪ್ರತಿದಿನ ಸಂಚರಿಸುತ್ತವೆ. 46 ಕೇಂದ್ರಗಳ ಮಧ್ಯೆ ಸಂಚರಿಸುತ್ತಿದ್ದು, ದೇಶದೊಳಗೆ 39 ಪ್ರದೇಶಗಳಿಗೆ ಮತ್ತು ವಿದೇಶದ 7 ಪ್ರದೇಶಗಳಿಗೆ ಸಂಚರಿಸುತ್ತವೆ.

ಆಫರ್ ಬಗ್ಗೆ ಒಂಚೂರು ವಿಶ್ಲೇಷಣೆ
ಈ ಆಫರ್‌ ತೆರಿಗೆ, ಸರ್‌ಚಾರ್ಜ್‌ಗಳನ್ನು ಹೊರತುಪಡಿಸಿದ ಬೇಸ್ ಫೇರ್‌ಗೆ ಅನ್ವಯವಾಗಲಿದೆ. ಬೇಸ್ ಫೇರ್ ಎಂದರೆ ವಿಮಾನ ಟಿಕೆಟ್‌ನ ಮೂಲ ದರ. ಶುಲ್ಕ, ತೆರಿಗೆ, ಸರ್‌ಚಾರ್ಜ್ ಮತ್ತಿತರ ದರಗಳು ಒಟ್ಟಾಗಿ ಅಂತಿಮಗೊಳ್ಳುವಾಗ ಟಿಕೆಟ್ ದರ ಬೇಸ್ ಫೇರ್‌ಗಿಂತ ದುಪ್ಪಟ್ಟು ಇರುತ್ತದೆ. ಬೇಸ್ ಫೇರ್ ಹೆಚ್ಚಾದಂತೆ ಟಿಕೆಟ್‌ನ ಅಂತಿಮ ದರವೂ ಹೆಚ್ಚಾಗುತ್ತದೆ.

ಲಕ್ಕಿ ಡ್ರಾ ಮೂಲಕ ದೇಶದೊಳಗೆ ಪ್ರಯಾಣಿಸುವ 12 ಪ್ರಯಾಣಿಕರಿಗೆ, ವಿದೇಶಕ್ಕೆ ಪ್ರಯಾಣಿಸುವ 12 ಪ್ರಯಾಣಿಕರಿಗೆ 12 ರೂ. ಟಿಕೆಟ್‌ ಸಿಗಲಿದೆ. ಇದರೊಂದಿಗೆ 12 ಭರ್ಜರಿ ಆಫರ್‌ಗಳಿದ್ದು ಪ್ರತಿ ಆಫರ್‌ನಲ್ಲು 12 ಲಕ್ಕಿ ಪ್ರಯಾಣಿಕರಿಗೆ ಬಹುಮಾನಗಳು ಸಿಗಲಿವೆ.