ಶೀಘ್ರವೇ ಎಸ್‌ಬಿಐ ಎಟಿಎಂನಲ್ಲಿ 20, 50 ರೂ.ನೋಟುಗಳೂ ಲಭ್ಯ

ಹೊಸದಿಲ್ಲಿ: ಗರಿಷ್ಠ ಬೆಲೆಯ ನೋಟುಗಳ ನಿಷೇಧದಿಂದ ದೇಶದೆಲ್ಲೆಡೆ ಚಿಲ್ಲರೆ ಕಾಸಿಗಾಗಿ ಜನರು ಪರದಾಡುವಂತಾಗಿದ್ದು, ಜನ ಸಾಮಾನ್ಯರ ಈ ಸಮಸ್ಯೆ ನೀಗಿಸಲು ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ 50 ರೂ. ಹಾಗೂ 20 ರೂ.ಮುಖಬೆಲೆಯ ನೋಟುಗಳನ್ನು ಎಟಿಎಂಗಳ ಮೂಲಕ ವಿತರಿಸಲಿದೆ.

'ಎಟಿಎಂ ಹಾಗೂ ಬ್ಯಾಂಕ್ ಮುಂದೆ ತುಸು ಜನಸಂದಣೆ ಕಡಿಮೆಯಾದ ಕೂಡಲೇ ಕಡಿಮೆ ಮುಖಬೆಲೆಯ ನೋಟುಗಳೂ ಎಟಿಎಂಗಳಲ್ಲಿ ಸಿಗುವಂತೆ ಮಾಡುವ ವ್ಯವಸ್ಥೆ ಮಾಡಲಾಗುವುದು,' ಎಂದು ಎಸ್‌ಬಿಐ ಮುಖ್ಯಸ್ಥೆ ಅರುಂಧತಿ ಭಟ್ಟಚಾರ್ಯ ಘೋಷಿಸಿದ್ದಾರೆ.

ಕಪ್ಪು ಹಣ ಹಾಗೂ ಭ್ರಷ್ಟಚಾರ ನಿರ್ಮೂಲನೆಗೊಳಿಸುವ ಉದ್ದೇಶದಿಂದ ಪ್ರಧಾನಿ ನರೇಂದ್ರ ಮೋದಿ ನ.8ರಂದು 500 ರೂ. ಹಾಗೂ 1000 ರೂ.ಮುಖಬೆಲೆಯ ನೋಟುಗಳನ್ನು ನಿಷೇಧಿಸುವುದಾಗಿ ದಿಢೀರ್ ಘೋಷಿಸಿದ ನಂತರ ಚಿಲ್ಲರೆ ಕಾಸಿಗಾಗಿ ಪರದಾಡುತ್ತಿರುವ ಸಾಮಾನ್ಯ ಜನತೆಗೆ ಎಸ್‌ಬಿಐಯ ಈ ಘೋಷಣೆ ನಿಟ್ಟುಸಿರು ಬಿಡುವಂತೆ ಮಾಡಿದೆ.

ಕಳೆದೈದು ದಿನಗಳಲ್ಲಿ ಎಸ್‌ಬಿಐ ಇದುವರೆಗೆ 83,702 ಕೋಟಿ ರೂ. ಸಂಗ್ರಹಿಸಿದ್ದು, 4,146 ಕೋಟಿ ರೂ. ನೋಟುಗಳನ್ನು ಬದಲಾಯಿಸಿಕೊಟ್ಟಿದೆ.