ಸ್ಟಾರ್ಟಪ್‌ ರ‍್ಯಾಂಕಿಂಗ್‌ನಲ್ಲಿ ರಾಜ್ಯದ ಅಮೋಘ ಸಾಧನೆ, ಗುಜರಾತ್‌ ನಂತರದ ಸ್ಥಾನದಲ್ಲಿ ಕರ್ನಾಟಕ

ಹೊಸದಿಲ್ಲಿ: ಸ್ಟಾರ್ಟಪ್‌ಗಳ ಹಬ್‌ ಎಂದೇ ಖ್ಯಾತಿ ಪಡೆದಿರುವ ಕರ್ನಾಟಕ ಸ್ಟಾರ್ಟಪ್‌ ರ‍್ಯಾಂಕಿಂಗ್ 2019ರಲ್ಲಿ ಅಮೋಘ ಸಾಧನೆ ಮೆರೆದಿದ್ದು ಗುಜರಾತ್‌ ನಂತರದ ಸ್ಥಾನವನ್ನು ಪಡೆದುಕೊಂಡಿದೆ.

ಕೇಂದ್ರ ಸರಕಾರ ಎರಡನೇ ಆವೃತ್ತಿಯ ರಾಜ್ಯಗಳ ಸ್ಟಾರ್ಟಪ್‌ ರ‍್ಯಾಂಕಿಂಗ್‌ನ್ನು ಶುಕ್ರವಾರ ಬಿಡುಗಡೆ ಮಾಡಿದ್ದು ಇದರಲ್ಲಿ ರಾಜ್ಯದ ಸಾಧನೆ ದಾಖಲಾಗಿದೆ. ರಾಜ್ಯಗಳನ್ನು ಉದ್ಯಮಸ್ನೇಹಿಗಳನ್ನಾಗಿ ಉತ್ತೇಜಿಸುವ ಉದ್ದೇಶದಿಂದ ಈ ಸ್ಟಾರ್ಟಪ್‌ ರ‍್ಯಾಂಕಿಂಗ್‌ನ್ನು ಬಿಡುಗಡೆ ಮಾಡುವ ಪರಿಪಾಠವನ್ನು ಕೇಂದ್ರ ಸರಕಾರ ಎರಡು ವರ್ಷಗಳ ಹಿಂದೆ ಆರಂಭಿಸಿತ್ತು. ಹೊಸ ಹೊಸ ಅನ್ವೇಷಣೆಗಳು, ಉದ್ಯಮದ ಭಿನ್ನ ಆಲೋಚನೆಗಳಿಗೆ ರಾಜ್ಯಮಟ್ಟದಲ್ಲಿಯೇ ಸೂಕ್ತ ಬೆಂಬಲ ಸಿಗುವಂತೆ ಮಾಡುವುದು ಇದರ ಒಟ್ಟು ಉದ್ದೇಶ.

ಈ ಬಾರಿಯ ರ‍್ಯಾಂಕಿಂಗ್‌ ಈ ರೀತಿ ಇದೆ,


ಈ ಸ್ಪರ್ಧೆಯಲ್ಲಿ ಒಟ್ಟು 22 ರಾಜ್ಯಗಳು ಮತ್ತು 3 ಕೇಂದ್ರಾಡಳಿತ ಪ್ರದೇಶಗಳು ಪಾಲ್ಗೊಂಡಿದ್ದವು. ರ‍್ಯಾಂಕಿಂಗ್‌ನ ಜೊತೆ ಜೊತೆಗೆ ಯಾವ ವಿಭಾಗಳಲ್ಲಿ ಸುಧಾರಣೆ ಮಾಡಿಕೊಳ್ಳಬಹುದು ಎಂಬುದರ ಬಗ್ಗೆಯೂ ಸಲಹೆಯನ್ನು ನೀಡಲಾಗಿದೆ. ಕೇಂದ್ರ ವಾಣಿಜ್ಯ ಮತ್ತು ಕೈಗಾರಿಕೆ ಸಚಿವ ಪಿಯೂಷ್‌ ಗೋಯಲ್ ರ‍್ಯಾಂಕಿಂಗ್ ಪಡೆದ ರಾಜ್ಯಗಳನ್ನು ಅಭಿನಂದಿಸಿದ್ದಾರೆ.

ಕೈಗಾರಿಕೆ ಮತ್ತು ಆಂತರಿಕ ವ್ಯಾಪಾರ ಉತ್ತೇಜನ ಇಲಾಖೆ (ಡಿಪಿಐಐಟಿ) ಈ ರ‍್ಯಾಂಕಿಂಗ್‌ನ್ನು ಬಿಡುಗಡೆ ಮಾಡಿದೆ. ಒಟ್ಟು 7 ವಿಭಾಗಳಲ್ಲಿ ರಾಜ್ಯಗಳು ತೋರಿದ ಸಾಧನೆಯನ್ನು ಪರಿಗಣಿಸಿ ಈ ರ‍್ಯಾಂಕಿಂಗ್‌ನ್ನು ನೀಡಲಾಗಿದೆ.

ಸದ್ಯ ಭಾರತದಲ್ಲಿ 50,000 ಕ್ಕೂ ಹೆಚ್ಚು ಸ್ಟಾರ್ಟಪ್‌ಗಳಿದ್ದು, ಇವುಗಳಲ್ಲಿ 30 ಯುನಿಕಾರ್ನ್‌ಗಳ ಮಟ್ಟಕ್ಕೆ ಅಂದ್ರೆ ಬೃಹತ್‌ ಕಂಪನಿಗಳ ಸ್ವರೂಪದಲ್ಲಿ ಬೆಳೆದಿವೆ. ದೇಶದಲ್ಲಿ 9,300 ಟೆಕ್ ಸ್ಟಾರ್ಟಪ್‌ಗಳಿದ್ದು, ಇವುಗಳಲ್ಲಿ 1,600 ಪೂರ್ಣ ಪ್ರಮಾಣದ ಟೆಕ್‌ ಕಂಪನಿಗಳಾಗಿವೆ. ನಾಸ್ಕಾಂ-ಜಿನ್ನೋವ್‌ ವರದಿ ಪ್ರಕಾರ ಭಾರತದ ಟೆಕ್‌ ಸ್ಟಾರ್ಟಪ್‌ ವಾತಾವರಣ ಇದೇ ರೀತಿ ಮುಂದುವರಿದಲ್ಲಿ 2025ರ ಹೊತ್ತಿಗೆ 100 ಯುನಿಕಾರ್ನ್‌ಗಳು ಹುಟ್ಟಿಕೊಳ್ಳಲಿದ್ದು, 11 ಲಕ್ಷ ನೇರ ಉದ್ಯೋಗ ಸೃಷ್ಟಿಯಾಗಲಿದೆ. ಸದ್ಯ ಡಿಪಿಐಐಟಿ 36,614 ಸ್ಟಾರ್ಟಪ್‌ಗಳನ್ನು ದೇಶದಲ್ಲಿ ಗುರುತಿಸಿದೆ.