200 ರು. ಸಮೀಪಕ್ಕೆ ಈರುಳ್ಳಿ ದರ! ಈಜಿಪ್ಟ್, ಟರ್ಕಿಯಿಂದ ಆಮದು

ಬೆಂಗಳೂರು: ದಿನದಿಂದ ದಿನಕ್ಕೆ ದೇಶದ ಈರುಳ್ಳಿ ಬೆಲೆಯಲ್ಲಿ ಹೆಚ್ಚಾಗುತ್ತಿದೆ ಹೊರತು ಕಡಿಮೆಯಾಗುವ ಯಾವ ಲಕ್ಷಣಗಳು ಕಾಣುತ್ತಿಲ್ಲ. ಸರಕಾರ ಆಮದು ಮಾಡಿಕೊಳ್ಳುವ ಪ್ರಯತ್ನ ಮಾಡುತ್ತಿದ್ದು, ಈಜಿಪ್ಟ್‌ನಿಂದ 6,090 ಮೆಟ್ರಿಕ್ ಟನ್ ಜೊತೆಗೆ ಟರ್ಕಿಯಿಂದ 11,000 ಮೆಟ್ರಿಕ್ ಟನ್ ತರಿಸುತ್ತಿದೆ.

ಆದರೆ ಕರ್ನಾಟಕ ಸೇರಿ ದೆಹಲಿ-ಎನ್‌ಸಿಆರ್, ಮಹಾರಾಷ್ಟ್ರ,ಒಡಿಶಾ ಮತ್ತು ಆಂಧ್ರಪ್ರದೇಶದಲ್ಲಿ ಈರುಳ್ಳಿ ಬೆಲೆ ಮಾತ್ರ ಕಡಿಮೆಯಾಗುತ್ತಲೇ ಇಲ್ಲ ಪ್ರತೀ ಕೆ.ಜಿ ಈರುಳ್ಳಿ 120 ರಿಂದ 140 ರೂಪಾಯಿ ಮಾರಾಟವಾಗುತ್ತಿದೆ.

ಗುರುವಾರ ಬೆಂಗಳೂರು ಮಾರುಕಟ್ಟೆಯಲ್ಲಿ ಕೆ ಜಿ ಈರುಳ್ಳಿ ಬೆಲೆ 180 ರೂ.ಗೆ ಏರಿಕೆಯಾಗಿದೆ. ಪಶ್ಚಿಮ ಬಂಗಾಳದ ಕೋಲ್ಕತ್ತಾದಲ್ಲಿ ಈರುಳ್ಳಿ ಬೆಲೆ 160 ರೂ ಗೆ ತಲುಪಿದೆ. ಹೀಗಾಗಿ ಜನತೆ ಆತಂಕಗೊಂಡಿದ್ದು, ಹೋಟೆಲ್ ಉದ್ಯಮದ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರಿದೆ.

ನಾನು ಈರುಳ್ಳಿ-ಬೆಳ್ಳುಳ್ಳಿ ತಿನ್ನೋದಿಲ್ಲ, ನಂಗೆ ಅದ್ರ ಚಿಂತೆ ಇಲ್ಲ: ನಿರ್ಮಲಾ ಸೀತರಾಮನ್

ಮುಂದಿನ ದಿನಗಳಲ್ಲಿ 200 ರೂ ಬೆಲೆ ಆದರೂ ಅಚ್ಚರಿಯಿಲ್ಲ ಎಂದು ಮಾರುಕಟ್ಟೆ ವಿಶ್ಲೇಷಕರು ಹೇಳಿದ್ದಾರೆ. ಬೆಲೆ ಏರಿಕೆಯ ನಡುವೆಯೇ ಟರ್ಕಿ ಈರುಳ್ಳಿ ಮಂಗಳೂರು ಮಾರುಕಟ್ಟೆಯನ್ನು ಪ್ರವೇಶಿಸಿದೆ. ಮಂಗಳವಾರ ನಗರಕ್ಕೆ 30 ಟನ್‌ನಷ್ಟು ಟರ್ಕಿ ಈರುಳ್ಳಿ ಬಂದಿದ್ದು ಬುಧವಾರ ಕೆ. ಜಿ. ಗೆ 130 ರೂ.ನಂತೆ ಮಾರಾಟವಾಗಿದೆ.

ಈರುಳ್ಳಿ ದರ ಹೆಚ್ಚಳ, ಎಲ್ಲೆಡೆ ಉಳ್ಳಾಗಡ್ಡಿ ನಾಟಿ

ಈಜಿಪ್ಟ್‌ನಿಂದ ಕೂಡ ಕರಾವಳಿ ಮಾರುಕಟ್ಟೆಗೆ ಈರುಳ್ಳಿ ಬಂದಿದೆ. ಸಮಸ್ಯೆ ಎಂದರೆ ವಿದೇಶಿ ಈರುಳ್ಳಿ ರುಚಿ ಮತ್ತು ಖಾರ ಚೆನ್ನಾಗಿದೆ. ಈರುಳ್ಳಿ ಗಾತ್ರ ಮಾತ್ರ ದೊಡ್ಡದಾಗಿದ್ದು, ಒಂದು ಈರುಳ್ಳಿ ಕಾಲು ಕೆ.ಜಿ ಗೂ ಹೆಚ್ಚು ತೂಗುತ್ತದೆ. ಹೀಗಾಗಿ ಖರೀದಿ ಮಾಡಲು ಜನ ಹಿಂದೆ ಮುಂದೆ ನೋಡುತ್ತಿದ್ದಾರೆ.