ಇಂಧನ ದರ ಏರಿಕೆ ನಿಯಂತ್ರಣಕ್ಕೆ ವಾರದಲ್ಲಿ ಕ್ರಮ

ಹೊಸದಿಲ್ಲಿ: ಪೆಟ್ರೋಲ್‌, ಡೀಸೆಲ್‌ ದರಗಳು ಏರುತ್ತಿರುವ ಹಿನ್ನೆಲೆಯಲ್ಲಿ, ಪರಿಸ್ಥಿತಿ ನಿಭಾಯಿಸುವ ನಿಟ್ಟಿನಲ್ಲಿ ಕೇಂದ್ರ ಸರಕಾರವು ಈ ವಾರ ಕೆಲವು ಕ್ರಮಗಳನ್ನು ಕೈಗೊಳ್ಳುವ ನಿರೀಕ್ಷೆ ಇದೆ ಎಂದು ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

''ಇಂಧನ ದರ ತಗ್ಗಿಸಲು ಅಬಕಾರಿ ಸುಂಕ ಕಡಿತದ ಆಯ್ಕೆ ಮಾತ್ರವಲ್ಲದೇ ಇತರೆ ಕ್ರಮಗಳ ಬಗ್ಗೆಯೂ ಸರಕಾರ ಆಲೋಚನೆ ನಡೆಸುತ್ತಿದೆ. ಇಂಧನ ದರ ಏರಿಕೆಯಿಂದ ಸರಕಾರವು ತೀವ್ರ ಒತ್ತಡಕ್ಕೆ ಸಿಲುಕಿದೆ. ಪರಿಸ್ಥಿತಿ ನಿಭಾಯಿಸಲು ಹಣಕಾಸು ಸಚಿವಾಲಯವು ಪೆಟ್ರೋಲಿಯಂ ಸಚಿವಾಲಯದ ಜತೆ ಸಮನ್ವಯ ನಡೆಸಿದೆ. ಕೆಲವು ಕ್ರಮಗಳ ಬಗ್ಗೆಯೂ ಚಿಂತನೆ ನಡೆಸಿದೆ,'' ಎಂದು ಅಧಿಕಾರಿಗಳು ಹೇಳಿದ್ದು, ಹೆಚ್ಚಿನ ವಿವರ ನೀಡಲು ನಿರಾಕರಿಸಿದ್ದಾರೆ.

ಕರ್ನಾಟಕ ಚುನಾವಣೆ ಹಿನ್ನೆಲೆಯಲ್ಲಿ 19 ದಿನ ಇಂಧನ ದರ ಪರಿಷ್ಕರಣೆ ಸ್ಥಗಿತಗೊಂಡಿತ್ತು. ಈಗ ಕಳೆದ 9 ದಿನಗಳಲ್ಲಿ ಪೆಟ್ರೋಲ್‌, ಡೀಸೆಲ್‌ ದರಗಳು ಕ್ರಮವಾಗಿ ರೂ.2.24 ಮತ್ತು ರೂ.2.15ರಷ್ಟು ಏರಿಕೆಯಾಗಿವೆ. ರಾಜಧಾನಿ ದಿಲ್ಲಿಯಲ್ಲಿ ಪೆಟ್ರೋಲ್‌ ದರ ರೂ.76.87, ಡೀಸೆಲ್‌ ದರ ರೂ.68.08 ಮುಟ್ಟಿದೆ.

ಇಂಧನದ ದರದಲ್ಲಿ ಕೇಂದ್ರ ಮತ್ತು ರಾಜ್ಯ ಸರಕಾರಗಳ ತೆರಿಗೆಯು ಶೇ.35-40ರಷ್ಟಿದೆ.