ಅಮೆರಿಕ-ಭಾರತ ವಾಣಿಜ್ಯ ಸಮರದ ಭೀತಿ: ಸೆನ್ಸೆಕ್ಸ್‌ 491 ಅಂಕ ಪತನ

ಮುಂಬಯಿ: ಭಾರತ-ಅಮೆರಿಕ ನಡುವೆ ವಾಣಿಜ್ಯ ಸಮರ ಆರಂಭವಾಗಬಹುದು ಎನ್ನುವ ಭೀತಿಗೆ ಷೇರು ಮಾರುಕಟ್ಟೆ ಸೋಮವಾರ ತತ್ತರಿಸಿದೆ. ಮುಂಬಯಿ ಷೇರು ಮಾರುಕಟ್ಟೆಯಲ್ಲಿ ಸೆನ್ಸೆಕ್ಸ್‌ 491 ಅಂಕ ಕಳೆದುಕೊಂಡಿದ್ದು, 38,960.79ಕ್ಕೆ ವಹಿವಾಟು ಕುಸಿದಿದೆ.

ರಾಷ್ಟ್ರೀಯ ಷೇರು ಸೂಚ್ಯಂಕ ನಿಫ್ಟಿ 151 ಅಂಕ ಇಳಿಕೆಯಾಗಿ 11,672ಕ್ಕೆ ದಿನದ ವಹಿವಾಟು ನಿರಾಶಾದಾಯಕವಾಗಿ ಅಂತ್ಯವಾಯಿತು.

ಭಾರತದ ಉಕ್ಕು ಮತ್ತು ಅಲ್ಯುಮಿನಿಯಂ ಉತ್ಪನ್ನಗಳಿಗೆ ಅಮೆರಿಕ ಹೆಚ್ಚಿನ ಸುಂಕ ವಿಧಿಸಿದ ಬೆನ್ನಲ್ಲಿಯೇ, ತಿರುಗೇಟು ನೀಡುವಂತೆ ಅಮೆರಿಕದ ಬಾದಾಮಿ, ಬೇಳೆಕಾಳು, ವಾಲ್‌ನಟ್‌ ಸೇರಿದಂತೆ 28 ಉತ್ಪನ್ನಗಳಿಗೆ ಭಾರತವು ಇತ್ತೀಚೆಗಷ್ಟೇ ಸುಂಕವನ್ನು ಹೆಚ್ಚಿಸಿದೆ. ಪ್ರತಿಕಾರದ ಈ ಕ್ರಮವು ಉಭಯ ದೇಶಗಳ ನಡುವೆ ವಾಣಿಜ್ಯ ಸಮರಕ್ಕೆ ಕಾರಣವಾಗಬಹುದು ಎನ್ನುವ ಭೀತಿ ಸೃಷ್ಟಿಯಾಗಿದೆ. ಇದು ಷೇರು ಹೂಡಿಕೆದಾರರ ಮೇಲೆ ನಕಾರಾತ್ಮಕ ಪ್ರಭಾವ ಬೀರಿದೆ.

ಮುಂಗಾರು ದುರ್ಬಲ, ಅಮೆರಿಕ-ಚೀನಾ ಮತ್ತು ಅಮೆರಿಕ-ಭಾರತದ ನಡುವಿನ ವಾಣಿಜ್ಯ ಸಂಘರ್ಷಗಳು, ಮಧ್ಯ ಪ್ರಾಚ್ಯದಲ್ಲಿನ ಭೌಗೋಳಿಕ ಸಂಘರ್ಷಗಳು, ಈ ವಾರ ನಿಗದಿಯಾಗಲಿರುವ ಅಮೆರಿಕದ ಫೆಡ್‌ ಬಡ್ಡಿ ದರ ಸೇರಿದಂತೆ ನಾನಾ ಅಂಶಗಳು ಷೇರು ಮಾರುಕಟ್ಟೆ ಕುಸಿತಕ್ಕೆ ಪ್ರಮುಖ ಕಾರಣಗಳಾಗಿವೆ ಎಂದು ತಜ್ಞರು ವಿಶ್ಲೇಷಿಸಿದ್ದಾರೆ.

ನಿರಂತರ ನಾಲ್ಕನೇ ದಿನವೂ ಸೆನ್ಸೆಕ್ಸ್‌ ಕುಸಿದಿದ್ದು, ಗರಿಷ್ಠ ಎಂದರೆ ಟಾಟಾ ಸ್ಟೀಲ್‌ ಷೇರುಗಳು ಶೇ.5ರಷ್ಟು ಕುಸಿದಿವೆ. ವೇದಾಂತ, ಟಾಟಾ ಮೋಟಾರ್ಸ್‌, ಎಕ್ಸಿಸ್‌ ಬ್ಯಾಂಕ್‌, ಭಾರ್ತಿ ಏರ್‌ಟೆಲ್‌, ರಿಲಯನ್ಸ್‌, ಒಎನ್‌ಜಿಸಿ, ಸನ್‌ ಫಾರ್ಮಾ, ಮಾರುತಿ ಮತ್ತು ಎಲ್‌ಆ್ಯಂಡ್‌ಟಿ ಷೇರುಗಳು ಶೇ.3.33ರ ತನಕ ನಷ್ಟಗೊಂಡಿವೆ.

ಮಾರುಕಟ್ಟೆಯ ದುರ್ಬಲ ವಹಿವಾಟಿನ ಟ್ರೆಂಡ್‌ನ ನಡುವೆಯೂ ಯೆಸ್‌ ಬ್ಯಾಂಕ್‌, ಕೋಲ್‌ ಇಂಡಿಯಾ ಮತ್ತು ಇನ್ಫೋಸಿಸ್‌ ಷೇರುಗಳು ಏರಿಕೆಯಾಗಿವೆ.