1 ಲೀಟರ್‌ ಹಾಲಿನ ಪ್ಯಾಕೇಟ್‌ಗೆ ಸಬ್ಸಿಡಿ ದರ ಸಂಭವ

ಹೊಸದಿಲ್ಲಿ : ಶೀಘ್ರದಲ್ಲಿಯೇ 1 ಲೀಟರ್‌ ಹಾಲಿನ ಪ್ಯಾಕೇಟ್‌ಗೆ ಸಬ್ಸಿಡಿ ದರ ಸಿಗುವ ಸಾಧ್ಯತೆ ಇದೆ. ಜನತೆ ಅರ್ಧ ಲೀಟರ್‌ ಬದಲಿಗೆ 1 ಲೀಟರ್‌ ಪ್ಯಾಕೇಟ್‌ಗಳನ್ನು ಕೊಳ್ಳುವ ಮೂಲಕ ಪ್ಲಾಸ್ಟಿಕ್‌ ಬಳಕೆಗೆ ಕಡಿವಾಣ ಹಾಕಬೇಕು ಎಂಬುದು ಇದರ ಉದ್ದೇಶ.

ಡೇರಿ ವಲಯದಲ್ಲಿ ಪ್ಲಾಸ್ಟಿಕ್‌ ಪುನರ್ಬಳಕೆಗೂ ಆದ್ಯತೆ ನೀಡುವಂತೆ ಸರಕಾರ ಸೂಚಿಸಿದೆ. ಅಕ್ಟೋಬರ್‌ 2ರಂದು ಗಾಂಧಿ ಜಯಂತಿಯ ವೇಳೆಗೆ ಡೇರಿಗಳು ಪ್ಲಾಸ್ಟಿಕ್‌ ಬಳಕೆಯನ್ನು ಗಣನೀಯವಾಗಿ ಕಡಿತಗೊಳಿಸುವಂತೆಯೂ ಸರಕಾರ ತಿಳಿಸಿದೆ.

ಹಾಲು ಉತ್ಪಾದಕ ವಲಯದ ಸಂಸ್ಥೆಗಳು ಹಾಗೂ ಒಕ್ಕೂಟಗಳ ಪ್ರಮುಖರ ಜತೆಗೆ ಪಶು ಸಂಗೋಪನೆ ಮತ್ತು ಡೇರಿ ಕಾರ್ಯದರ್ಶಿ ಅತುಲ್‌ ಚತುರ್ವೇದಿ ಅವರು ಬುಧವಾರ ಸಭೆ ನಡೆಸಿದ್ದಾರೆ. ಹಾಲಿನ ಪ್ಯಾಕೇಟ್‌ಗಳ ಪುನರ್ಬಳಕೆಗೆ ಮನವಿ ಮಾಡಿದ್ದಾರೆ.

ಇದರಿಂದಾಗಿ ಅರ್ಧ ಲೀಟರ್‌ ಹಾಲಿನ ದರದಲ್ಲೇನೂ ವ್ಯತ್ಯಾಸವಾಗುವುದಿಲ್ಲ. ಆದರೆ 1 ಲೀಟರ್‌ ಹಾಲು ಖರೀದಿಗೆ ಸಬ್ಸಿಡಿ ದರದ ಸೌಲಭ್ಯ ಸಿಗಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.