ವಿದೇಶಿ ಹೂಡಿಕೆದಾರರಿಗೆ ಮೇಲ್ತೆರಿಗೆ ರದ್ದು ಸಂಭವ
ಕೇಂದ್ರ ಸರಕಾರ ಮಹತ್ವದ ಮಾರುಕಟ್ಟೆ ಸ್ನೇಹಿ ಉಪಕ್ರಮಗಳನ್ನು ಶೀಘ್ರ ಘೋಷಿಸುವ ನಿರೀಕ್ಷೆ ಇದೆ. ಮುಖ್ಯವಾಗಿ 2019ರ ಬಜೆಟ್ನಲ್ಲಿ ವಿದೇಶಿ ಮೂಲದ ಹೂಡಿಕೆದಾರರಿಗೆ ಘೋಷಿಸಿದ್ದ ಮೇಲ್ತೆರಿಗೆಯನ್ನು ರದ್ದುಪಡಿಸುವ ಸಾಧ್ಯತೆ ಇದೆ.
Vijaya Karnataka Web 9 Aug 2019, 5:00 am
ಹೊಸದಿಲ್ಲಿ : ಕೇಂದ್ರ ಸರಕಾರ ಮಹತ್ವದ ಮಾರುಕಟ್ಟೆ ಸ್ನೇಹಿ ಉಪಕ್ರಮಗಳನ್ನು ಶೀಘ್ರ ಘೋಷಿಸುವ ನಿರೀಕ್ಷೆ ಇದೆ. ಮುಖ್ಯವಾಗಿ 2019ರ ಬಜೆಟ್ನಲ್ಲಿ ವಿದೇಶಿ ಮೂಲದ ಹೂಡಿಕೆದಾರರಿಗೆ ಘೋಷಿಸಿದ್ದ ಮೇಲ್ತೆರಿಗೆಯನ್ನು ರದ್ದುಪಡಿಸುವ ಸಾಧ್ಯತೆ ಇದೆ. ಇತ್ತೀಚೆಗೆ ಷೇರು ಸೂಚ್ಯಂಕಗಳ ಭಾರಿ ಕುಸಿತಕ್ಕೆ ಇದು ಕಾರಣವಾಗಿತ್ತು. ವಿದೇಶಿ ಮೂಲದ ಹೂಡಿಕೆದಾರರು ಮೇಲ್ತೆರಿಗೆ ಘೋಷಣೆಯ ಬಳಿಕ ಷೇರು ಪೇಟೆಯಿಂದ ಹೂಡಿಕೆಯನ್ನು ವ್ಯಾಪಕವಾಗಿ ಹಿಂತೆಗೆದುಕೊಂಡಿದ್ದರು.
ಬಜೆಟ್ನಲ್ಲಿ ಅತಿ ಶ್ರೀಮಂತರಿಗೆ ವಿಧಿಸಿದ್ದ ಮೇಲ್ತೆರಿಗೆಯನ್ನು ವಿದೇಶಿ ಮೂಲದ ಹೂಡಿಕೆದಾರರಿಗೂ (ಎಫ್ಪಿಐ) ವಿಸ್ತರಿಸಲಾಗಿತ್ತು. ಇದರ ಜತೆಗೆ ಲಾಂಗ್ ಟರ್ಮ್ ಕ್ಯಾಪಿಟಲ್ ಗೇನ್ಸ್ (ಎಲ್ಟಿಸಿಜಿ) ತೆರಿಗೆಯನ್ನು ರದ್ದುಪಡಿಸುವ ಹಾಗೂ ಡಿವಿಡೆಂಡ್ ಡಿಸ್ಟ್ರಿಬ್ಯೂಷನ್ ಟ್ಯಾಕ್ಸ್ (ಡಿಡಿಟಿ) ಸುಧಾರಿಸುವ ಸಾಧ್ಯತೆ ಇದೆ.
ಹೀಗಿದ್ದರೂ, ಅತಿ ಶ್ರೀಮಂತರಿಗೆ ಮೇಲ್ತೆರಿಗೆಯ ನಿರ್ಧಾರವನ್ನು ಬದಲಿಸುವ ಸಾಧ್ಯತೆ ಇಲ್ಲ ಎಂದು ಮೂಲಗಳು ತಿಳಿಸಿವೆ.
ಸರಕಾರ ಅಧಿಸೂಚನೆ ಅಥವಾ ಸುಗ್ರೀವಾಜ್ಞೆ ಮೂಲಕ ಎಫ್ಪಿಐ ಮೇಲಿನ ಮೇಲ್ತೆರಿಗೆಯನ್ನು ರದ್ದುಪಡಿಸುವ ನಿರೀಕ್ಷೆ ಇದೆ. ಹಣಕಾಸು ಸಚಿವಾಲಯವು ಪ್ರಧಾನಿಯವರ ಕಚೇರಿ ಜತೆಗೆ ಚರ್ಚಿಸಿದ ನಂತರ ಈ ನಿರ್ಧಾರಕ್ಕೆ ಬರಲಾಗಿದೆ. ಎಫ್ಪಿಐ ಮೇಲಿನ ಮೇಲ್ತೆರಿಗೆ ರದ್ದತಿಯಿಂದ ಸರಕಾರದ ಬೊಕ್ಕಸಕ್ಕೆ ಉಂಟಾಗುವ ಸಂಭವನೀಯ ನಷ್ಟ ಕೇವಲ 400 ಕೋಟಿ ರೂ. ಮಾತ್ರ ಎಂದು ವರದಿಯಾಗಿದೆ.
ಬಿಎಸ್ಇಯಲ್ಲಿ ನೋಂದಾಯಿತ ಕಂಪನಿಗಳ ಷೇರುಗಳ ಮಾರುಕಟ್ಟೆ ಮೌಲ್ಯ ಬಜೆಟ್ ದಿನ 151ಲಕ್ಷ ಕೋಟಿ ರೂ.ಗಳಾಗಿತ್ತು. ಆಗಸ್ಟ್ 7ರ ವೇಳೆಗೆ 138 ಲಕ್ಷ ಕೋಟಿ ರೂ.ಗೆ ಇಳಿದಿತ್ತು. ಅಂದರೆ 12 ಲಕ್ಷ ಕೋಟಿ ರೂ. ಇಳಿದಿತ್ತು.
ಸರಕಾರ ಕೈಗೊಳ್ಳಲಿರುವ ಕ್ರಮಗಳ ವರದಿ ಬೆನ್ನಲ್ಲೇ ಗುರುವಾರ ಸೆನ್ಸೆಕ್ಸ್ 650 ಅಂಕ ಜಿಗಿಯಿತು.