1,400 ಕೋಟಿ ರೂ. ಹೂಡಿಕೆ ಸಂಗ್ರಹಿಸಿದ ರ‍್ಯಾಪಿಡೋ; ಸ್ವಿಗ್ಗಿ, ಟಿವಿಎಸ್‌ನಿಂದ ಭಾರೀ ಹೂಡಿಕೆ

ಬೆಂಗಳೂರು: ಬೈಕ್ ಮತ್ತು ಆಟೋ ಟ್ಯಾಕ್ಸಿ ಅಗ್ರಿಗೇಟರ್ ರ‍್ಯಾಪಿಡೋ ಆಹಾರ-ವಿತರಣಾ ಸಂಸ್ಥೆ ಸ್ವಿಗ್ಗಿ ಮತ್ತು ಹೊಸ ಹೂಡಿಕೆದಾರ ಟಿವಿಎಸ್ ಮೋಟಾರ್ ನೇತೃತ್ವದಲ್ಲಿ 180 ಮಿಲಿಯನ್ ಡಾಲರ್ (ಸುಮಾರು 1,370 ಕೋಟಿ ರೂ.) ಹಣವನ್ನು ಸಂಗ್ರಹಿಸಿದೆ.

ಅಸ್ತಿತ್ವದಲ್ಲಿರುವ ಹೂಡಿಕೆದಾರರಾದ ವೆಸ್ಟ್‌ಬ್ರಿಡ್ಜ್ ಕ್ಯಾಪಿಟಲ್, ಶೆಲ್ ವೆಂಚರ್ಸ್ ಮತ್ತು ನೆಕ್ಸಸ್ ವೆಂಚರ್ಸ್ ಕೂಡ ಹಣ ಹೂಡಿಕೆ ಮಾಡಿವೆ. 'ಇಟಿ'ಗೆ ಸಿಕ್ಕಿರುವ ಮಾಹಿತಿ ಪ್ರಕಾರ ಸ್ವಿಗ್ಗಿ ಒಂದೇ ಏಟಿಗೆ ಸುಮಾರು 124 ಮಿಲಿಯನ್ ಡಾಲರ್ (950 ಕೋಟಿ ರೂ.) ಹೂಡಿಕೆ ಮಾಡಿದೆ. ಇದು ಮೊಬಿಲಿಟಿ ಸೆಕ್ಟರ್‌ನಲ್ಲಿ ಕಂಪನಿಯ ಮೊದಲ ಬೃಹತ್‌ ಮೊತ್ತದ ಹೂಡಿಕೆಯಾಗಿದೆ.

ಈ ಹೂಡಿಕೆಯ ನಂತರ ರ‍್ಯಾಪಿಡೋ ಮೌಲ್ಯ 830 ಮಿಲಿಯನ್ ಡಾಲರ್‌ (6,300 ಕೋಟಿ ರೂ.)ಗೆ ಏರಿಕೆಯಾಗಲಿದ್ದು, ಸ್ವಿಗ್ಗಿ ಸುಮಾರು ಶೇ. 15ರಷ್ಟು ಪಾಲನ್ನು ಹೊಂದಿರಲಿದೆ ಎಂದು ಮೂಲಗಳು ತಿಳಿಸಿವೆ.

“ಈ ಸುತ್ತಿನಲ್ಲಿ ಸ್ವಿಗ್ಗಿಯ ಭಾಗವಹಿಸುವಿಕೆಯಿಂದ ಎರಡು ಕಂಪನಿಗಳ ನಡುವೆ ಹೊಂದಾಣಿಕೆ ನಿರ್ಮಾಣವಾಗಲಿದೆ. ಹೆಚ್ಚಿನ ಫ್ಲೀಟ್ ಲಭ್ಯತೆಯ ಮೂಲಕ ಗ್ರಾಹಕರ ಉತ್ತಮ ಅನುಭವವನ್ನು ತಲುಪಿಸುವ ಸಾಮಾನ್ಯ ಉದ್ದೇಶದೊಂದಿಗೆ ಈ ಹೂಡಿಕೆ ಮಾಡಲಾಗಿದೆ. ಇದರಿಂದ ಸ್ವಿಗ್ಗಿಗೆ ಡೆಲಿವರಿ ಎಕ್ಸಿಕ್ಯೂಟಿವ್‌ಗಳು ಸಿಕ್ಕಿದರೆ, ರ‍್ಯಾಪಿಡೋದ ಕ್ಯಾಪ್ಟನ್‌ಗಳಿಗೆ ಹೆಚ್ಚುವರಿ ಗಳಿಕೆ ಸಿಗಲಿದೆ ಎಂದು," ಎಂದು ಕಂಪನಿಯು ಹೇಳಿಕೆಯಲ್ಲಿ ತಿಳಿಸಿದೆ.

ಓಲಾ ಬೈಕ್‌ ಟ್ಯಾಕ್ಸಿ ವಿರುದ್ಧ ಕ್ರಮ ಜರುಗಿಸದಂತೆ ಹೈಕೋರ್ಟ್ ಆದೇಶ
ಸ್ವಿಗ್ಗಿಯ ಹೂಡಿಕೆಯು ಸಂಪೂರ್ಣವಾಗಿ ಹಣಕಾಸಿನ ಸ್ವರೂಪದ್ದಾಗಿದ್ದು, ಸ್ವಿಗ್ಗಿಗೆ ತನ್ನ ಇನ್‌ಸ್ಟಾಮಾರ್ಟ್ ವಿಸ್ತರಣೆಗೆ ಈ ಡೀಲ್‌ ಅನುಕೂಲ ಮಾಡಿಕೊಡಲಿದೆ. ಈ ಹಿಂದೆ ಜೊಮ್ಯಾಟೊ ಕೂಡ ರ‍್ಯಾಪಿಡೋ ಜೊತೆ ಮಾತುಕತೆ ನಡೆಸಿತ್ತು. ಆದರೆ ಅದು ಫಲಪ್ರದವಾಗಿರಲಿಲ್ಲ.

ಬೈಕ್-ಟ್ಯಾಕ್ಸಿ ಪ್ಲಾಟ್‌ಫಾರ್ಮ್‌ನಂತೆ ಪ್ರಾರಂಭವಾದ ರ‍್ಯಾಪಿಡೋ ಇದೀಗ ಒಂದಿಷ್ಟು ಬದಲಾವಣೆಗಳೊಂದಿಗೆ ಸ್ವಿಗ್ಗಿಯಂತಹ ಕಂಪನಿಗೆ ಸೇವೆ ನೀಡುತ್ತಿದೆ. ಜತೆಗೆ ಕಂಪನಿಯು 26 ನಗರಗಳಲ್ಲಿ ಆಟೋ ರಿಕ್ಷಾ ಸೇವೆಗಳಿಗೂ ಕಾಲಿಟ್ಟಿದೆ.

ಹೂಡಿಕೆಯಿಂದ ಸ್ವಿಗ್ಗಿಗೆ ರ‍್ಯಾಪಿಡೋದ ಬೈಕ್ ಟ್ಯಾಕ್ಸಿ ಫ್ಲೀಟ್‌ಗಳ ಸಹಾಯ ಸಿಗಲಿದೆ. ಎರಡೂ ವ್ಯವಹಾರಗಳು ಕಾರ್ಯಾಚರಣೆಯ ವಿಷಯದಲ್ಲಿ ಒಂದೊಕ್ಕೊಂದು ಪೂರಕವಾಗಿವೆ. ರ‍್ಯಾಪಿಡೋತನ್ನ ತಂತ್ರಜ್ಞಾನವನ್ನು ಸುಧಾರಿಸಲು, ಹೆಚ್ಚಿನ ಜನರನ್ನು ನೇಮಿಸಿಕೊಳ್ಳಲು ಮತ್ತು ಪ್ಲಾಟ್‌ಫಾರ್ಮ್‌ನಲ್ಲಿ ಸವಾರರ ಸಂಖ್ಯೆಯನ್ನು ಹೆಚ್ಚಿಸಲು ಹೂಡಿಕೆಯ ಹಣವನ್ನು ಬಳಸಿಕೊಳ್ಳಲಿದೆ.

"ಸ್ವಿಗ್ಗಿ ಮತ್ತು ರ‍್ಯಾಪಿಡೋ ಹೆಚ್ಚು ಅವಕಾಶಗಳು ಮತ್ತು ಹೆಚ್ಚಿನ ಗಳಿಕೆಗಳ ಮೂಲಕ ಸವಾರರಿಗೆ ಸಹಾಯ ಮಾಡುವ ನಿಟ್ಟಿನಲ್ಲಿ ಲಾಜಿಸ್ಟಿಕ್ಸ್ ಪ್ಲಾಟ್‌ಫಾರ್ಮ್ ಅನ್ನು ನಿರ್ಮಿಸುವ ಉದ್ದೇಶವನ್ನೂ ಹೊಂದಿವೆ,” ಎಂದು ಸ್ವಿಗ್ಗಿಯ ಸಹಸ್ಥಾಪಕ ಮತ್ತು ಸಿಇಒ ಶ್ರೀಹರ್ಷ ಮೆಜೆಟಿ ಹೇಳಿದ್ದಾರೆ.

ಎಲೆಕ್ಟ್ರಿಕ್‌ ವಾಹನಗಳ ಭವಿಷ್ಯದ ಬಗ್ಗೆ ಹೆಚ್ಚು ಆಸಕ್ತಿ ಹೊಂದಿರುವ ಟಿವಿಎಸ್‌ ಮೋಟಾರ್ ನಮಗೆ ಮತ್ತಷ್ಟು ವಿಸ್ತರಣೆಗೆ ಸಹಾಯ ಮಾಡಲಿದೆ ಎಂದು ರ‍್ಯಾಪಿಡೋ ಸಹ ಸಂಸ್ಥಾಪಕ ಅರವಿಂದ ಸಂಕ ಹೇಳಿದ್ದಾರೆ.

ಸಾಂಕ್ರಾಮಿಕ-ಪೂರ್ವದಲ್ಲಿ ರ‍್ಯಾಪಿಡೋ ಬೌನ್ಸ್, ವೋಗೋ, ಡ್ರೈವ್‌ಜಿ, ಓಲಾ ಮತ್ತು ಉಬರ್‌ ವಿರುದ್ಧ ಸ್ಪರ್ಧಿಸುತ್ತಿದ್ದವು. ಸಿಕ್ವೊಯಾ ಕ್ಯಾಪಿಟಲ್ ಬೆಂಬಲಿತ ಬೌನ್ಸ್ ಎಲೆಕ್ಟ್ರಿಕ್ ವಾಹನಗಳನ್ನು ತಯಾರಿಸಲು ಮನಸ್ಸು ಮಾಡಿದರೆ, ವೋಗೋವನ್ನು ಚಲೋ ಸ್ವಾಧೀನಪಡಿಸಿಕೊಂಡಿತ್ತು. ಏತನ್ಮಧ್ಯೆ, ಉಬರ್ ಮತ್ತು ಓಲಾ ಎರಡೂ ತಮ್ಮ ಪ್ರಮುಖ ಕ್ಯಾಬ್ ಮತ್ತು ಆಟೋ ರಿಕ್ಷಾ ವಿಭಾಗದ ಮೇಲೆಗೆ ಹೆಚ್ಚಿನ ಗಮನ ಹರಿಸಿದ್ದವು.

ರ‍್ಯಾಪಿಡೋ ಈ ಹಿಂದೆ ವಿವಿಧ ಹೂಡಿಕೆದಾರರಿಂದ 130 ಮಿಲಿಯನ್ ಡಾಲರ್‌ ಸಂಗ್ರಹಿಸಿತ್ತು. ಭಾರತದ 100 ಕ್ಕೂ ಹೆಚ್ಚು ನಗರಗಳಲ್ಲಿ ಕಾರ್ಯನಿರ್ವಹಿಸುತ್ತಿರುವ ರ‍್ಯಾಪಿಡೋ ಪ್ರಸ್ತುತ 15 ಲಕ್ಷ ಬೈಕ್ ಟ್ಯಾಕ್ಸಿ ಫ್ಲೀಟ್‌ ಹೊಂದಿದೆ. ಜತೆಗೆ 25 ಲಕ್ಷ ಗ್ರಾಹಕರನ್ನೂ ಹೊಂದಿರುವುದಾಗಿ ಹೇಳಿಕೊಂಡಿದೆ.

ತೀಕ್ಷ್ಣ ಒಳನೋಟ ಹಾಗೂ 20ಕ್ಕೂ ಹೆಚ್ಚು ವಲಯಗಳ ವಿಸ್ತೃತ ಮಾಹಿತಿ ಒಳಗೊಂಡ 'ಎಕನಾಮಿಕ್ ಟೈಮ್ಸ್' ವಿಶೇಷ ಲೇಖನಗಳಿಗಾಗಿ ಈಗಲೇ ಸಬ್‌ಸ್ಕ್ರೈಬ್ ಆಗಿ.