ಗುಜರಾತ್‌ನ ಫೋರ್ಡ್‌ ಫ್ಯಾಕ್ಟರಿ ಮೇಲೆ ಟಾಟಾ ಮೋಟಾರ್ಸ್‌ ಕಣ್ಣು, ಮತ್ತಷ್ಟು ಕಾರು ಉತ್ಪಾದನೆಗೆ ಪ್ಲ್ಯಾನ್‌

ಆದಾಯದ ದೃಷ್ಟಿಯಿಂದ ದೇಶದ ಅತಿದೊಡ್ಡ ವಾಹನ ತಯಾರಿಕಾ ಕಂಪನಿಯಾಗಿರುವ ಟಾಟಾ ಮೋಟಾರ್ಸ್ ಗುಜರಾತ್‌ನಲ್ಲಿರುವ ಫೋರ್ಡ್ ಇಂಡಿಯಾದ ಸನಂದ್ ಉತ್ಪಾದನಾ ಘಟಕವನ್ನು ಸ್ವಾಧೀನಪಡಿಸಿಕೊಳ್ಳಲು ಮಾತುಕತೆ ನಡೆಸುತ್ತಿದೆ ಎಂದು ಈ ಬಗ್ಗೆ ತಿಳಿದಿರುವವರು ‘ಇಟಿ’ಗೆ ತಿಳಿಸಿದ್ದಾರೆ. ಕಳೆದ ಸೆಪ್ಟೆಂಬರ್‌ನಲ್ಲಿ ಅಮೆರಿಕ ಮೂಲದ ಫೋರ್ಡ್‌ ಭಾರತದಲ್ಲಿ ಮಾರುಕಟ್ಟೆಯಿಂದ ನಿರ್ಗಮಿಸುವುದಾಗಿ ಹೇಳಿತ್ತು.

ಭಾರತದಲ್ಲಿ ಫೋರ್ಡ್ 2 ಕಾರ್ಖಾನೆಗಳನ್ನು ಹೊಂದಿದ್ದು ಇದರಲ್ಲಿ ಒಂದನ್ನು ಸ್ವಾಧೀನಪಡಿಸಿಕೊಳ್ಳಲು ಟಾಟಾ ಮೋಟಾರ್ಸ್ ಮುಂದಾಗಿದೆ. ಎಂಜಿ ಮೋಟಾರ್ ಮತ್ತು ಭವಿಶ್ ಅಗರ್ವಾಲ್ ನೇತೃತ್ವದ ಓಲಾ ಕೂಡ ಇದರ ಖರೀದಿಗೆ ಆಸಕ್ತಿ ಹೊಂದಿವೆ.

ಇನ್ನು ಈ ಘಟಕದ ಮಾರಾಟ ಸಂಬಂಧ ಟಾಟಾ ಮೋಟಾರ್ಸ್‌ ಹಾಗೂ ಫೋರ್ಡ್‌ ಇಂಡಿಯಾ ಗುಜರಾತ್‌ ಸರಕಾರವನ್ನೂ ಸಂಪರ್ಕಿಸಿದ್ದು, ಕಾರ್ಖಾನೆಯ ಮಾರಾಟದ ನಂತರದ ಪ್ರೋತ್ಸಾಹಕ ಯೋಜನೆಗಳ ಬಗ್ಗೆ ತಿಳಿದುಕೊಳ್ಳಲು ಯತ್ನಿಸಿವೆ ಎಂದು ಗೊತ್ತಾಗಿದೆ.

ಸೆಪ್ಟೆಂಬರ್‌ ತ್ರೈಮಾಸಿಕದಲ್ಲಿ ಟಾಟಾ ಮೋಟಾರ್ಸ್‌ಗೆ ಬರೋಬ್ಬರಿ 4,442 ಕೋಟಿ ರೂ. ನಷ್ಟ!
ಸದ್ಯ ದೇಶದ ಪ್ರಯಾಣಿಕ ವಾಹನ ಕ್ಷೇತ್ರದಲ್ಲಿ ಭಾರೀ ವೇಗದಲ್ಲಿ ಮುನ್ನಡೆಯುತ್ತಿರುವ ಟಾಟಾ ಮೋಟಾರ್ಸ್, ತನ್ನ ಘಟಕಗಳಲ್ಲಿ ಶೇ. 85 ಸಾಮರ್ಥ್ಯದೊಂದಿಗೆ ಕಾರ್ಯನಿರ್ವಹಿಸುತ್ತಿದೆ. ಕಂಪನಿಯು 2023ನೇ ಆರ್ಥಿಕ ವರ್ಷದಲ್ಲಿ 5 - 6 ಲಕ್ಷ ಕಾರುಗಳನ್ನು ಉತ್ಪಾದಿಸುವ ಯೋಜನೆ ಹೊಂದಿದ್ದು ಫೋರ್ಡ್ ಘಟಕದ ಸ್ವಾಧೀನ ಕಂಪನಿಯ ನೆರವಿಗೆ ಬರಲಿದೆ.

ಟಾಟಾ ಮೋಟಾರ್ಸ್ ಈಗಾಗಲೇ ದೇಶದ ಕಾರು ಮಾರುಕಟ್ಟೆಯಲ್ಲಿ ಮೂರನೇ ಸ್ಥಾನಕ್ಕೇರಿದ್ದು, ಪ್ರಯಾಣಿಕ ವಾಹನ ಕ್ಷೇತ್ರದಲ್ಲಿ ಎರಡನೇ ಸ್ಥಾನದಲ್ಲಿರುವ ಹ್ಯುಂಡೈ ಮೋಟಾರ್ ಇಂಡಿಯಾಗೆ ಭಾರೀ ಸವಾಲೊಡ್ಡುತ್ತಿದೆ.

ದೇಶದಲ್ಲಿ ಎಲೆಕ್ಟ್ರಿಕ್‌ ವಾಹನ ಕ್ರಾಂತಿಗೆ ಮುಂದಾದ ಟಾಟಾ: 5 ವರ್ಷದಲ್ಲಿ 15 ಸಾವಿರ ಕೋಟಿ ರೂ. ಹೂಡಿಕೆ!
ಒಂದು ಘಟಕ ಉಳಿಸಿಕೊಳ್ಳಲು ಫೋರ್ಡ್‌ ಚಿಂತನೆ

ಫೋರ್ಡ್ ಇಂಡಿಯಾ ತನ್ನ ಆಯ್ಕೆಗಳನ್ನು ಮುಕ್ತವಾಗಿಟ್ಟಿದೆ. ರಫ್ತು ಮಾರುಕಟ್ಟೆಗಾಗಿ ಭಾರತದಲ್ಲಿರುವ ಒಂದು ಘಟಕದಲ್ಲಿ ಎಲೆಕ್ಟ್ರಿಕ್‌ ವಾಹನಗಳನ್ನು ತಯಾರಿಸುವ ಬಗ್ಗೆಯೂ ಚಿಂತನೆ ನಡೆಸುತ್ತಿದೆ. ಇದರಿಂದ ಭಾರತ ಸರಕಾರದ ಉತ್ಪಾದನೆ ಆಧಾರಿತ ಪ್ರೋತ್ಸಾಹಧನದ ಲಾಭವೂ ಕಂಪನಿಗೆ ಸಿಗಲಿದೆ.

"ಟಾಟಾ ಮೋಟಾರ್ಸ್ ಸನಂದ್‌ ಘಟಕದ ಸ್ವಾಧೀನದಲ್ಲಿ ಮುಂಚೂಣಿಯಲ್ಲಿದ್ದು ಕಾರ್ಮಿಕರೊಂದಿಗೆ ಘಟಕವನ್ನು ಸ್ವಾಧೀನಪಡಿಸಿಕೊಳ್ಳುವ ಸಾಮರ್ಥ್ಯ ಹೊಂದಿದೆ. ಆದಾಗ್ಯೂ ಒಂದು ಘಟಕವನ್ನು ಮಾತ್ರ ಫೋರ್ಡ್‌ ಮಾರಾಟ ಮಾಡಬಹುದು ಹಾಗೂ ಇನ್ನೊಂದನ್ನು ಇವಿ ರಫ್ತಿಗೆ ಬಳಸಿಕೊಳ್ಳಬಹುದು,” ಎಂದು ಮಾತುಕತೆಯ ಬಗ್ಗೆ ತಿಳಿದಿರುವ ವ್ಯಕ್ತಿಯೊಬ್ಬರು ಹೇಳಿದ್ದಾರೆ.

ಈ ಟಾಟಾ ಉದ್ಯಮ ಕಳೆದ 10 ವರ್ಷದಲ್ಲಿ ಇದೇ ಮೊದಲ ಬಾರಿಗೆ ಲಾಭ ನೀಡುತ್ತಿದೆ! ಪೂರ್ಣ ವಿವರ ಇಲ್ಲಿದೆ
ಸನಂದ್‌ನಲ್ಲಿರುವ ಘಟಕದ ಮಾರಾಟದಲ್ಲಿ ಎಂಜಿನ್ ಕಾರ್ಖಾನೆಯು ಒಳಗೊಂಡಿಲ್ಲ. ಫೋರ್ಡ್‌ ಪ್ಯಾಂಥರ್ ಎಂಜಿನ್‌ಗಳ ರಫ್ತಿನಲ್ಲಿ ಈ ಘಟಕ ಪ್ರಮುಖ ಪಾತ್ರ ವಹಿಸುತ್ತಿದೆ. ಆದ್ದರಿಂದ ಇದನ್ನು ಉದ್ದೇಶಿತ ಮಾರಾಟ ವ್ಯಾಪ್ತಿಯಿಂದ ಹೊರಗಿಡಲಾಗಿದೆ.

ಈ ಘಟಕ ಮಾರಾಟ ಸಂಬಂಧ ಸಿಎಂ ನೇತೃತ್ವದ ಸಮಿತಿ ಮುಂದಿನ ವಾರ ಸಭೆ ಸೇರಲಿದ್ದು, ಮಾರಾಟವನ್ನು ಪೂರ್ಣಗೊಳಿಸುವ ಸಾಧ್ಯತೆ ಇದೆ ಎಂದು 'ಟಿಒಐ' ವರದಿ ಮಾಡಿದೆ. ಈ ಬಗ್ಗೆ ಟಾಟಾ ಮೋಟಾರ್ಸ್‌ ಪ್ರತಿಕ್ರಿಯೆ ನೀಡಲು ನಿರಾಕರಿಸಿದ್ದರೆ, ಪೋರ್ಡ್‌ ಇಂಡಿಯಾ ವಕ್ತಾರರು ಅವಕಾಶಗಳ ಬಗ್ಗೆ ಮುಕ್ತವಾಗಿರುವುದಾಗಿ ಹೇಳಿದ್ದಾರೆ.

ಸ್ಥಳೀಯ ಮಾರುಕಟ್ಟೆಯಿಂದ ನಿರ್ಗಮಿಸುವುದಾಗಿ ಘೋಷಿಸಿದ್ದರೂ ಕೇಂದ್ರ ಸರಕಾರದ ಪಿಎಲ್‌ಐ ಯೋಜನೆಯಡಿ ಹೂಡಿಕೆ ಮಾಡುವುದಾಗಿ ಫೋರ್ಡ್‌ ಮೋಟಾರ್ಸ್‌ ಘೋಷಿಸಿದೆ. ಭಾರತದ ಮಾರುಕಟ್ಟೆಯಿಂದ ನಿರ್ಗಮಿಸುವುದಾಗಿ ಕಂಪನಿ ಘೋಷಿಸುವುದಕ್ಕೂ ಎರಡು ವಾರಗಳ ಮುನ್ನ ಅಮೆರಿಕದ ಮೂಲ ಕಂಪನಿ ಭಾರತೀಯ ಘಟಕಕ್ಕೆ 5,000 ಕೋಟಿ ರೂ.ಗೂ ಹೆಚ್ಚಿನ ಹಣ ನೀಡಿತ್ತು. ಸೆಪ್ಟೆಂಬರ್‌ನಲ್ಲಿ 2,175 ಕೋಟಿ ರೂ. ಹಾಗೂ ಇದೀಗ ಮಾರ್ಚ್‌ನಲ್ಲಿ 2,900 ಕೋಟಿ ರೂ.ಗಳನ್ನು ಕಂಪನಿ ಹೂಡಿಕೆ ಮಾಡಿದೆ.

ಪಿಎಲ್‌ಐ ಯೋಜನೆ ಅಡಿಯಲ್ಲಿ ದೇಶದಲ್ಲಿರುವ ಒಂದು ಘಟಕವನ್ನು ಎಲೆಕ್ಟ್ರಿಕ್‌ ವಾಹನಗಳ ರಫ್ತಿಗೆ ಬಳಸಿಕೊಳ್ಳುವ ಸಂಬಂಧ ಚರ್ಚೆ ನಡೆಯುತ್ತಿದೆ ಎಂದು ಫೋರ್ಡ್‌ ಇಂಡಿಯಾ ವಕ್ತಾರರೂ ಖಚಿತಪಡಿಸಿದ್ದಾರೆ.

ಎಲೆಕ್ಟ್ರಿಕ್ ವಾಹನ ಕ್ಷೇತ್ರದಲ್ಲಿ ಮುಂದಡಿ ಇಡಲು ಕಂಪನಿಯು ಜಾಗತಿಕವಾಗಿ ಪ್ರತ್ಯೇಕ ಅಂಗಸಂಸ್ಥೆಯನ್ನು ರಚಿಸುತ್ತಿದೆ. ಮತ್ತು ಇವಿ ವಿನ್ಯಾಸವನ್ನು ಹಂಚಿಕೊಳ್ಳಲು ಯುರೋಪ್‌ನ ಅತಿದೊಡ್ಡ ವಾಹನ ತಯಾರಕ ಕಂಪನಿ ಫೋಕ್ಸ್‌ವ್ಯಾಗನ್‌ ಜತೆ ಪಾಲುದಾರಿಕೆಯನ್ನೂ ಮಾಡಿಕೊಂಡಿದೆ. ಎರಡೂ ಕಂಪನಿಗಳು ಭಾರತದಲ್ಲಿ ಎಲೆಕ್ಟ್ರಿಕ್‌ ಕಾರುಗಳನ್ನು ಬಿಡುಗಡೆ ಮಾಡಲು ನೋಡುತ್ತಿದ್ದು, ಜತೆಗೆ ಈಗಾಗಲೇ ದೇಶದಿಂದ ಕಾರುಗಳನ್ನು ರಫ್ತು ಕೂಡ ಮಾಡಿವೆ. ಹೀಗಾಗಿ ಎರಡೂ ಕಂಪನಿಗಳು ಸೇರಿ ಎಲೆಕ್ಟ್ರಿಕ್‌ ಕಾರುಗಳನ್ನು ದೇಶದಲ್ಲಿ ಉತ್ಪಾದನೆ ಮಾಡಬಹುದು ಎಂದು ತಜ್ಞರು ಅಂದಾಜಿಸಿದ್ದಾರೆ. ಮುಖ್ಯವಾಹಿನಿ ಮಾರುಕಟ್ಟೆಯಿಂದ ನಿರ್ಗಮಿಸಿದ್ದರೂ ಫೋರ್ಡ್‌ ಮುಸ್ತಾಂಗ್ ಮತ್ತು ಮ್ಯಾಕ್-ಇ 2023 ರಲ್ಲಿ ಭಾರತೀಯ ರಸ್ತೆಗಳಲ್ಲಿ ಓಡಾಟ ನಡೆಸುವ ಸಾಧ್ಯತೆಯಿದೆ.

ಫೋರ್ಡ್‌ ಭಾರತದಲ್ಲಿ ಒಟ್ಟು ಸುಮಾರು 2 ಬಿಲಿಯನ್ ಡಾಲರ್‌ (15,000 ಕೋಟಿ ರೂ.) ನಷ್ಟ ಅನುಭವಿಸಿದ್ದು, ಕಾರುಗಳ ಮಾರಾಟ ಕುಸಿಯುತ್ತಿದ್ದ ಹಿನ್ನೆಲೆಯಲ್ಲಿ ಸ್ಥಳೀಯ ತನ್ನ ಕಾರ್ಯಾಚರಣೆ ಸ್ಥಗಿತಗೊಳಿಸಲು ನಿರ್ಧರಿಸಿತ್ತು. ಈ ನಿರ್ಧಾರದಿಂದ ಫ್ಯಾಕ್ಟರಿ, ಕಚೇರಿಗಳಲ್ಲಿದ್ದ 4,000ಕ್ಕೂ ಹೆಚ್ಚು ಉದ್ಯೋಗಿಗಳು ತೊಂದರೆ ಅನುಭವಿಸುತ್ತಿದ್ದಾರೆ.
ತೀಕ್ಷ್ಣ ಒಳನೋಟ ಹಾಗೂ 20ಕ್ಕೂ ಹೆಚ್ಚು ವಲಯಗಳ ವಿಸ್ತೃತ ಮಾಹಿತಿ ಒಳಗೊಂಡ 'ಎಕನಾಮಿಕ್ ಟೈಮ್ಸ್' ವಿಶೇಷ ಲೇಖನಗಳಿಗಾಗಿ ಈಗಲೇ ಸಬ್‌ಸ್ಕ್ರೈಬ್ ಆಗಿ.