ಐಟಿ ರಿಟರ್ನ್ಸ್‌, ರಿಫಂಡ್‌ನಲ್ಲಿ ಹೊಸ ದಾಖಲೆ

ಹೊಸದಿಲ್ಲಿ: ಆದಾಯ ತೆರಿಗೆ ಸಲ್ಲಿಕೆ ಹಾಗೂ ತೆರಿಗೆ ಫಂಡ್‌ ವಿಚಾರದಲ್ಲಿ 2018ನೇ ವರ್ಷ ಹೊಸ ದಾಖಲೆ ಸೃಷ್ಟಿಸಿದೆ. ದೇಶದ ಆರ್ಥಿಕ ಬೆಳವಣಿಗೆಯ ದೃಷ್ಟಿಯಿಂದ ಇದು ಸಕಾರಾತ್ಮಕ ಬೆಳವಣಿಗೆಯಾಗಿದೆ. ಡಿಸೆಂಬರ್‌ ತನಕ ಒಟ್ಟಾರೆಯಾಗಿ 8.74 ಲಕ್ಷ ಕೋಟಿ ರೂ. ನೇರ ತೆರಿಗೆ ಸಂಗ್ರಹವಾಗಿದ್ದು, ಶೇ.14.11 ವೃದ್ಧಿಸಿದೆ.

ಕಳೆದ ವರ್ಷ ಡಿಸೆಂಬರ್‌ 30ರ ವೇಳೆಗೆ 6.2 ಕೋಟಿ ಮಂದಿ ಆದಾಯ ತೆರಿಗೆ ವಿವರ (ಐಟಿಆರ್‌) ಸಲ್ಲಿಸಿದ್ದಾರೆ. ಅಂದರೆ ಶೇ.42.8 ಏರಿಕೆಯಾಗಿದೆ.

ದಾಖಲೆಯ ರಿಫಂಡ್‌:

ಆದಾಯ ತೆರಿಗೆ ಇಲಾಖೆಯು 2.4 ಕೋಟಿ ತೆರಿಗೆದಾರರಿಗೆ ಒಟ್ಟು 1.31 ಲಕ್ಷ ಕೋಟಿ ರೂ. ತೆರಿಗೆ ರಿಫಂಡ್‌ ಮಾಡಿದೆ.

ಅಂದರೆ, ಶೇ.17ರಷ್ಟು ವೃದ್ಧಿಸಿದೆ. ತೆರಿಗೆ ರಿಫಂಡ್‌ ಹೆಚ್ಚಳವಾಗಿರುವುದು ಸರಕಾರದ ವಿತ್ತೀಯ ಪರಿಸ್ಥಿತಿ ಸುಧಾರಿಸಿರುವುದನ್ನು ಬಿಂಬಿಸುತ್ತದೆ. ಈ ಹಿಂದೆ ವಿತ್ತೀಯ ಕೊರತೆಯ ಪರಿಣಾಮ ರಿಫಂಡ್‌ನಲ್ಲಿ ವಿಳಂಬವಾಗಿದ್ದ ನಿದರ್ಶನವಿದೆ.

ಆದಾಯ ತೆರಿಗೆ ರಿಟರ್ನ್ಸ್‌ ಸಲ್ಲಿಕೆಯ ಪ್ರಕ್ರಿಯೆ ಆನ್‌ಲೈನ್‌ ಮೂಲಕ ನಡೆಯುತ್ತಿರುವುದು ರಿಫಂಡ್‌ ಅನ್ನು ತ್ವರಿತಗೊಳಿಸಲು ಸಹಕಾರಿಯಾಗಿದೆ.