ಟಿಸಿಎಸ್ ಮಾರುಕಟ್ಟೆ ಮೌಲ್ಯ ಈಗ 10 ಲಕ್ಷ ಕೋಟಿ ರೂ.!

ಮುಂಬಯಿ: ಟಾಟಾ ಸನ್ಸ್‌ ಒಡೆತನದ ಟಾಟಾ ಕನ್ಸಲ್ಟೆನ್ಸಿ ಸರ್ವಿಸಸ್‌ನ (ಟಿಸಿಎಸ್‌) ಮಾರುಕಟ್ಟೆ ಮೌಲ್ಯ ಸೋಮವಾರ 10 ಲಕ್ಷ ಕೋಟಿ ರೂಪಾಯಿ ದಾಟಿದ್ದು, ಈ ಮೈಲುಗಲ್ಲು ತಲುಪಿದ ಭಾರತದ ಎರಡನೇ ಕಂಪನಿ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಈ ಹಿಂದೆ ರಿಲಯನ್ಸ್‌ ಈ ಗಡಿ ದಾಟಿತ್ತು.

ಈ ವಾರದಲ್ಲಿ ಟಿಸಿಎಸ್‌ ಆಡಳಿತ ಮಂಡಳಿ ಸಭೆ ನಡೆಯಲಿದ್ದು, ಈ ಸಭೆಯಲ್ಲಿ ಷೇರು ಮರು ಖರೀದಿ (ಬೈ ಬ್ಯಾಕ್‌) ನಿರ್ಧಾರ ಹೊರಬೀಳುವ ಸಾಧ್ಯತೆ ಇದೆ. ಈ ಹಿನ್ನೆಲೆಯಲ್ಲಿ ಸೋಮವಾರ ಟಿಸಿಎಸ್‌ ಷೇರುಗಳ ಮೌಲ್ಯ ಶೇ.7.55ರಷ್ಟು ಏರಿಕೆ ಕಂಡು 2,713.95 ರೂಪಾಯಿಗಳಿಗೆ ಏರಿಕೆಯಾಯಿತು. ಇದರೊಂದಿಗೆ ಟಿಸಿಎಸ್‌ ಮಾರುಕಟ್ಟೆ ಬಂಡವಾಳ 10.16 ಲಕ್ಷ ಕೋಟಿ ರೂಪಾಯಿ ಹೆಚ್ಚಿತು.

ಸದ್ಯ ಮಾರುಕಟ್ಟೆ ಬಂಡವಾಳವನ್ನು ಪರಿಗಣಿಸಿದರೆ ಟಿಸಿಎಸ್‌ ಭಾರತದ ಎರಡನೇ ಮೌಲ್ಯಯುತ ಕಂಪನಿಯಾಗಿದೆ. ಸದ್ಯ ರಿಲಯನ್ಸ್‌ ಇಂಡಸ್ಟ್ರೀಸ್‌ ಲಿ. ಟಿಸಿಎಸ್‌ಗಿಂತ ಮುಂದಿದ್ದು 14.58 ಲಕ್ಷ ಕೋಟಿ ರೂಪಾಯಿ ಮಾರುಕಟ್ಟೆ ಬಂಡವಾಳವನ್ನು ಹೊಂದಿದೆ.

ರಿಲಯನ್ಸ್‌ ಮಾರುಕಟ್ಟೆ ಮೌಲ್ಯ 16 ಲಕ್ಷ ಕೋಟಿ ರೂ.ಗೆ ಏರಿಕೆ, ಮಾರ್ಚ್‌ನಿಂದ ಈಚೆಗೆ 181% ಹೆಚ್ಚಳ!
ಭಾನುವಾರ ತನ್ನ ರೆಗ್ಯುಲೇಟರಿ ಫೈಲಿಂಗ್‌ನಲ್ಲಿ ಟಿಸಿಎಸ್‌, “ಅಕ್ಟೋಬರ್‌ 7 ರಂದು ನಡೆಯಲಿರುವ ಸಭೆಯಲ್ಲಿ ಕಂಪನಿಯ ನಿರ್ದೇಶಕರು ಈಕ್ವಿಟಿ ಷೇರುಗಳ ಬೈಬ್ಯಾಕ್‌ ಪ್ರಸ್ತಾವನೆಯ ಬಗ್ಗೆ ನಿರ್ಧಾರ ತೆಗೆದುಕೊಳ್ಳಲಿದ್ದಾರೆ,” ಎಂದು ಹೇಳಿತ್ತು. ಬೆನ್ನಿಗೆ ಷೇರು ಮೌಲ್ಯದಲ್ಲಿ ದಾಖಲೆಯ ಏರಿಕೆ ಕಂಡು ಬಂದಿದೆ.

ಇದೇ ಸಭೆಯಲ್ಲಿ ತನ್ನ ಸೆಪ್ಟೆಂಬರ್ ತ್ರೈಮಾಸಿಕದ ಫಲಿತಾಂಶಗಳನ್ನು ಆಧರಿಸಿ ಈಕ್ವಿಟಿ ಷೇರುದಾರರಿಗೆ ಎರಡನೇ ಮಧ್ಯಂತರ ಡಿವಿಡೆಂಡ್‌ ಘೋಷಿಸುವ ಸಾಧ್ಯತೆಯೂ ಇದೆ.

ಈ ಹಿಂದೆ 2018ರಲ್ಲಿ ಕಂಪನಿಯು 16,000 ಕೋಟಿ ರೂಪಾಯಿ ಮೊತ್ತದ ಷೇರುಗಳನ್ನು ಬೈಬ್ಯಾಕ್‌ ಮಾಡಿತ್ತು. 2017ರಲ್ಲಿ ಕೂಡ ಷೇರು ಬೈಬ್ಯಾಕ್‌ ನಡೆದಿತ್ತು. ಇದೀಗ ಮತ್ತೆ ಬೃಹತ್‌ ಬೈಬ್ಯಾಕ್‌ ನಡೆಸುವ ಸಾಧ್ಯತೆ ಇದೆ.

ಇದೊಂದು ಶುಭ ಸುದ್ದಿ ಎಂದು ಮಾರುಕಟ್ಟೆ ತಜ್ಞರು ಅಂದಾಜಿಸಿದ್ದಾರೆ. "ಹೆಚ್ಚಿನ ಐಟಿ ಕಂಪನಿಗಳ ಬಳಿ ಹೆಚ್ಚಿನ ಹೆಚ್ಚುವರಿ ಹಣವಿದ್ದು, ಇದನ್ನು ಷೇರುದಾರರಿಗೆ ಲಾಭಾಂಶ ಅಥವಾ ಮರುಖರೀದಿಯ ರೂಪದಲ್ಲಿ ನೀಡಲು ಬಳಸಬಹುದು," ಎನ್ನುತ್ತಾರೆ ಏಂಜೆಲ್‌ ಬ್ರೋಕಿಂಗ್‌ ಲಿ.ನ ಈಕ್ವಿಟಿ ಸ್ರಾಟೆಜಿಸ್ಟ್‌ ಜ್ಯೋತಿ ರಾಯ್‌.