ಮಾರುಕಟ್ಟೆಯಲ್ಲಿ ಟಿಸಿಎಸ್‌ ಷೇರು ಮೌಲ್ಯ ಏರಿಕೆ, ರಿಲಯನ್ಸ್‌ ನಂತರ ಲಾಭ ಪಡೆದ ಸಂಸ್ಥೆ

ಮುಂಬಯಿ: ಕೊರೊನಾದಿಂದಾಗಿ ಷೇರು ಮಾರುಕಟ್ಟೆಯಲ್ಲಿ ಬಹುತೇಕ ಎಲ್ಲ ಕಂಪನಿಗಳ ಗ್ರಾಫ್‌ ಇಳಿಮುಖವಾಗಿದ್ದರೆ, ರಿಲಯನ್ಸ್‌ ಮಾತ್ರ ಏರುಮುಖ ಕಂಡಿತ್ತು. ಈಗ ಈ ಸಾಲಿಗೆ ಟಾಟಾ ಕನ್ಸಲ್‌ಟೆನ್ಸಿ ಸರ್ವೀಸಸ್‌ (ಟಿಸಿಎಸ್‌) ಕೂಡ ಸೇರಿದೆ.

ಕಳೆದ ಕೆಲವು ದಿನಗಳಿಂದ ಒಂದೇ ರೀತಿಯಲ್ಲಿ ಸಾಗುತ್ತಿದ್ದ ಟಿಸಿಎಸ್‌ ಸೋಮವಾರದ ವಹಿವಾಟಿನಲ್ಲಿ ಪ್ರಗತಿ ಕಂಡಿದೆ.

ಈಗ ಟಿಸಿಎಸ್‌ ಷೇರು ಮೌಲ್ಯ ರೂ. 2442.80ಗೆ ಏರಿಕೆಯಾಗಿದೆ. ಇದರೊಂದಿಗೆ ಬಂಡವಾಳ ಹೂಡಿಕೆ 9 ಲಕ್ಷ ಕೋಟಿ ರೂ.ಗಳಿಗೆ ಏರಿಕೆಯಾಗಿದೆ. ರಿಲಯನ್ಸ್ ನಂತರ ಈ ಮೊತ್ತ ತಲುಪಿದ ಎರಡನೇ ಸಂಸ್ಥೆಯಾಗಿದೆ.

ಬೆಳಗಿನ ಆರಂಭಿಕ ವಹಿವಾಟಿನಲ್ಲಿ ಟಿಸಿಎಸ್‌ ಷೇರು ಶೇಕಡ 3ರಷ್ಟು ಏರಿಕೆ ಕಂಡಿತು. 2020 ಸಾಲಿನಲ್ಲಿ ಟಿಸಿಎಸ್‌ ಷೇರುಗಳು ಶೇಕಡ 10ರಷ್ಟು ಏರಿಕೆ ಕಂಡಿದೆ. ಆದರೆ ಕೊರೊನಾ ಆರಂಭವಾದ ಮಾರ್ಚ್‌ನಲ್ಲಿ ಸ್ವಲ್ಪ ಇಳಿಕೆ ಕಂಡಿತ್ತು. ಐಟಿ ಕ್ಷೇತ್ರದಲ್ಲಿ ಟಿಸಿಎಸ್‌ ಅತ್ಯಂತ ಲಾಭದಾಯಕ ಷೇರು ಎಂದೇ ಹೆಸರುಗಳಿಸಿದೆ.

ಈಗ ಕೊರೊನಾ ನಂತರ ವರ್ಕ್‌ ಫ್ರಮ್‌ ಹೋಮ್‌ ನಂತರವೂ ಈ ಕಂಪನಿಯ ವಹಿವಾಟು ಪ್ರಗತಿಯ ಹಾದಿಯಲ್ಲಿ ಮುಂದುವರಿದಿದೆ ಬಿಎನ್‌ಪಿ ಪರಿಬಾಸ್ ವರದಿಯಲ್ಲಿ ತಿಳಿಸಲಾಗಿದೆ.

ಟಿಸಿಎಸ್‌ ಈಗ ತನ್ನ ಒಟ್ಟು ಉದ್ಯೋಗಿಗಳ ಪೈಕಿ ಶೇಕಡ 75 ರಷ್ಟು ಸಿಬ್ಬಂದಿಗೆ ವರ್ಕ್‌ ಫ್ರಮ್‌ ಹೋಮ್‌ಗೆ ಅವಕಾಶ ಕಲ್ಪಿಸಲು ಮುಂದಾಗಿದೆ. ಇದರಿಂದ ಸಂಸ್ಥೆಗೆ ಸಾಕಷ್ಟು ಉಳಿತಾಯ ಆಗಲಿದೆ. ಸಿಬ್ಬಂದಿಗೆ ಸೌಲಭ್ಯ, ಸಾರಿಗೆ ವ್ಯವಸ್ಥೆ, ಬಾಡಿಗೆ ಎಲ್ಲವೂ ಉಳಿತಾಯವಾಗಲಿದೆ. ಈ ಹಿನ್ನೆಲೆಯಲ್ಲಿ ಸಂಸ್ಥೆಯ ಲಾಭಾಂಶ ಇನ್ನಷ್ಟು ಹೆಚ್ಚಳವಾಗಲಿದೆ ಎಂದು ವಿಶ್ಲೇಷಿಸಲಾಗಿದೆ.