ಎಚ್‌ಡಿಎಫ್‌ಸಿ ಮೊಬೈಲ್‌ ಬ್ಯಾಂಕಿಂಗ್‌ ಸೇವೆ ಸ್ಥಗಿತ: ಗ್ರಾಹಕರ ಪರದಾಟ

ಮುಂಬಯಿ: ಬ್ಯಾಂಕಿಂಗ್‌ ಕ್ಷೇತ್ರದಲ್ಲಿ ಮುಂಚೂಣಿಯಲ್ಲಿರುವ ಎಚ್‌ಡಿಎಫ್‌ಸಿ ಬ್ಯಾಂಕ್ ಮೊಬೈಲ್‌ ಸೇವೆ ಮಂಗಳವಾರ ಅಸ್ತವ್ಯಸ್ತಗೊಂಡಿದ್ದರಿಂದ ಸಾವಿರಾರು ಗ್ರಾಹಕರು ತೀವ್ರ ತೊಂದರೆಗೆ ಒಳಗಾದರು.

ಮೊಬೈಲ್‌ ಮೂಲಕವೇ ತಮ್ಮ ವಹಿವಾಟು ನಡೆಸಲು ಮುಂದಾಗಿದ್ದ ಗ್ರಾಹಕರಿಗೆ ಬ್ಯಾಂಕ್‌ನ ಮೊಬೈಲ್‌ ಆ್ಯಪ್‌ನಲ್ಲಿ ಕಾಣಿಸಿಕೊಂಡ ತಾಂತ್ರಿಕ ತೊಂದರೆ ಸಾಕಷ್ಟು ಕಿರಿಕಿರಿ ಉಂಟು ಮಾಡಿತು.

ಸೋಮವಾರ ಅಂದರೆ ಡಿಸೆಂಬರ್‌ 2ರ ರಾತ್ರಿಯಿಂದಲೇ ಎಚ್‌ಡಿಎಫ್‌ಸಿ ಮೊಬೈಲ್‌ ಬ್ಯಾಂಕ್‌ ಆ್ಯಪ್‌ ಕೈಕೊಟ್ಟಿತು. ಸಾಮಾಜಿಕ ಜಾಲತಾಣದಲ್ಲಿಯೂ ಈ ಬಗ್ಗೆ ಭಾರಿ ಚರ್ಚೆಗಳು ನಡೆದಿವೆ.


ಮೊಬೈಲ್‌ ಆ್ಯಪ್‌ ಕಾರ್ಯನಿರತವಾಗಿದೆ. ದಯವಿಟ್ಟು ಸ್ವಲ್ಪ ಸಮಯದ ನಂತರ ಪ್ರಯತ್ನಿಸಿ ಎಂಬ ಸಂದೇಶ ನಿರಂತರವಾಗಿ ಬರುತ್ತಿತ್ತು. ಇದರಿಂದ ಗ್ರಾಹಕರು ತೀವ್ರ ತೊಂದರೆಗೊಳಗಾದರು.

ತಿಂಗಳ ಆರಂಭದಲ್ಲಿ ಹಲವಾರು ಬಿಲ್‌ಗಳನ್ನು ನಾವು ಕಟ್ಟಬೇಕಾಗಿತ್ತು. ಎಲ್ಲವನ್ನೂ ಮೊಬೈಲ್‌ ಬ್ಯಾಂಕಿಂಗ್‌ ಮೂಲಕವೇ ಮಾಡುತ್ತಿದ್ದೆವು. ಈಗ ಇದು ಕೈ ಕೊಟ್ಟರೆ ಹೇಗೆ ಎಂದು ಗ್ರಾಹಕರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ನೆಟ್‌ ಬ್ಯಾಂಕಿಂಗ್‌, ಮೊಬೈಲ್‌ ಬ್ಯಾಂಕಿಂಗ್‌ ಹಾಗೂ ಇತರೆ ಸೇವೆಗಳು ಲಭ್ಯವಾಗುತ್ತಿಲ್ಲ ಎಂದು ಟ್ವಿಟರ್‌ ಮೂಲಕವೇ ಗ್ರಾಹಕರು ಎಚ್‌ಡಿಎಫ್‌ಸಿ ಬ್ಯಾಂಕ್‌ಗೆ ನೇರವಾಗಿ ಬಾಣಗಳನ್ನು ಬಿಟ್ಟರು.



ಕೂಡಲೇ ಎಚ್‌ಡಿಎಫ್‌ಸಿ ಬ್ಯಾಂಕ್‌ ಟ್ವಿಟರ್‌ ಮೂಲಕ ಸ್ಪಷ್ಟನೆ ನೀಡಿದೆ.

ಗ್ರಾಹಕರಿಗೆ ಆದ ತೊಂದರೆಗೆ ತೀವ್ರ ವಿಷಾದಿಸುತ್ತೆವೆ. ಈ ಈ ತಾಂತ್ರಿಕ ದೋಷವನ್ನು ಕೂಡಲೇ ಸರಿಪಡಿಸುತ್ತೇವೆ ಎಂದು ಎಚ್‌ಡಿಎಫ್‌ಸಿ ಬ್ಯಾಂಕ್‌ ಸ್ಪಷ್ಟನೆ ನೀಡಿದೆ.