ಹಿಂದೂಜಾ ಬ್ರದರ್ಸ್‌ ತೆಕ್ಕೆ ಸೇರಲಿದೆಯೇ ಜೆಟ್‌ ಏರ್‌ವೇಸ್‌?

ಮುಂಬಯಿ : ಜೆಟ್‌ ಏರ್‌ವೇಸ್‌ಗೆ ಹೊಸ ಹೂಡಿಕೆದಾರರನ್ನು ಹುಡುಕಲಾಗುತ್ತಿದ್ದು, ಬ್ರಿಟನ್‌ನಲ್ಲಿರುವ ಭಾರತೀಯ ಮೂಲದ ಹಿಂದೂಜಾ ಸಹೋದರರ ತೆಕ್ಕೆಗೆ ಇದು ಸೇರಲಿದೆಯೇ ಎನ್ನುವ ಚರ್ಚೆಗಳು ಉದ್ಯಮ ವಲಯದಲ್ಲಿ ಆರಂಭವಾಗಿವೆ.

ಜೆಟ್‌ ಏರ್‌ವೇಸ್‌ಗೆ ಸಾಲ ನೀಡಿರುವ ಬ್ಯಾಂಕ್‌ಗಳು ಮತ್ತು ಜೆಟ್‌ ಏರ್‌ವೇಸ್‌ನಲ್ಲಿನ 2ನೇ ದೊಡ್ಡ ಷೇರುದಾರ ಕಂಪನಿಯಾದ ಎತಿಹಾದ್‌ ಏರ್‌ವೇಸ್‌ ಈಗ ಹೊಸ ಹೂಡಿಕೆದಾರರನ್ನು ಹುಡುಕುತ್ತಿವೆ. ಜೆಟ್‌ ಏರ್‌ವೇಸ್‌ನಲ್ಲಿ ಹೆಚ್ಚಿನ ಬಂಡವಾಳ ಹೂಡುವಂತೆ ಹಿಂದೂಜಾ ಗ್ರೂಪ್‌ ಅನ್ನು ಕೇಳಲಾಗಿದ್ದು, ಈ ಸಂಬಂಧ ಮಾತುಕತೆಗಳು ನಡೆಯುತ್ತಿವೆ.

ಜೆಟ್‌ ಏರ್‌ವೇಸ್‌ನಲ್ಲಿ ಹೂಡಿಕೆ ಮಾಡುವ ಕುರಿತಾಗಿ ಹಿಂದೂಜಾ ಗ್ರೂಪ್‌ ಸ್ಪಷ್ಟ ತೀರ್ಮಾನ ಪ್ರಕಟಿಸಿಲ್ಲ. ಆದರೆ, ಹಿಂದೂಜಾ ಗ್ರೂಪ್‌ನ ಮುಖ್ಯಸ್ಥ ಮತ್ತು ಹಿರಿಯ ಸಹೋದರ ಜಿ.ಪಿ ಹಿಂದೂಜಾ ಅವರನ್ನು ಎತಿಹಾದ್‌ ಪ್ರತಿನಿಧಿಗಳು ಸಂಪರ್ಕಿಸಿದ್ದು, ಸಕಾರಾತ್ಮಕ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಖುದ್ದು ಭೇಟಿಯಾಗುವ ಅವಕಾಶವಿದ್ದು, ದಿನಾಂಕ ಇನ್ನೂ ನಿಗದಿಯಾಗಿಲ್ಲ ಎಂದು ಮೂಲಗಳು ತಿಳಿಸಿವೆ.

''ಹಿಂದೂಜಾ ಗ್ರೂಪ್‌ ಯಾವುದೇ ಭರವಸೆ ನೀಡಿಲ್ಲ. ಆದರೆ, ಆಯ್ಕೆ ಮುಕ್ತವಾಗಿರುವುದನ್ನು ಹೇಳಿದೆ,'' ಎಂದು ಹಿರಿಯ ಅಧಿಕಾರಿಯೊಬ್ಬರು ಹೇಳಿದ್ದಾರೆ.

===

2001ರಲ್ಲಿ ಏರ್‌ ಇಂಡಿಯಾ ಮತ್ತು ಇಂಡಿಯನ್‌ ಏರ್‌ಲೈನ್ಸ್‌ ಖರೀದಿಸಲು ಹಿಂದೂಜಾ ಗ್ರೂಪ್‌ ಬಿಡ್‌ನಲ್ಲಿ ಭಾಗವಹಿಸಿತ್ತು.

ಸರಕು ಸಾಗಣೆ ಸಂಬಂಧ ಲುಫ್ತಾನಾ ಜೊತೆ ಹಿಂದೂಜಾ ಒಪ್ಪಂದ ಮಾಡಿಕೊಂಡಿತ್ತು.

ಆಟೋಮೊಬೈಲ್ಸ್‌, ಇಂಧನ, ಕೆಮಿಕಲ್ಸ್‌, ಮೀಡಿಯಾ, ಐಟಿ, ವಿದ್ಯುತ್‌, ಆರೋಗ್ಯರಕ್ಷೆ, ರಿಯಲ್‌ ಎಸ್ಟೇಟ್‌ ಸೇರಿದಂತೆ ನಾನಾ ವಲಯಗಳಲ್ಲಿ ವ್ಯವಹಾರ ನಡೆಸುತ್ತಿದೆ. ಟ್ರಕ್‌ಗಳ ಉತ್ಪಾದನೆಯಲ್ಲಿ ಭಾರತದ ಎರಡನೇ ದೊಡ್ಡ ಕಂಪನಿಯಾದ ಅಶೋಕ್‌ ಲೈಲ್ಯಾಂಡ್‌ ಹಿಂದೂಜಾ ಬ್ರದರ್ಸ್‌ನ ಒಡೆತನದಲ್ಲಿದೆ.

===

ಜೆಟ್‌ನಲ್ಲಿ ಶೇ.51ರಷ್ಟು ಷೇರುಗಳು ನರೇಶ್‌ ಗೋಯಲ್‌ ಬಳಿ ಇವೆ. ಎತಿಹಾದ್‌ ಶೇ.24ರಷ್ಟು, ಉಳಿದ ಷೇರುಗಳು ಸಾರ್ವಜನಿಕರ ಬಳಿ ಇವೆ. ಏ.17ರಿಂದ ವಿಮಾನ ಸೇವೆಯನ್ನು ಜೆಟ್‌ ಏರ್‌ವೇಸ್‌ ಸ್ಥಗಿತಗೊಳಿಸಿದೆ.