ಹೊಸದಿಲ್ಲಿ: ದಶಕದ ಹಿಂದೆ ಸಣ್ಣ ಕಂಪನಿಯಾಗಿದ್ದ ಯೋಗ ಗುರು ಬಾಬಾ ರಾಮದೇವ್ ಅವರ ಪತಂಜಲಿ, ಈಗ ಎಫ್ಎಂಸಿಜಿ(ತ್ವರಿತ ಮಾರಾಟದ ಉತ್ಪನ್ನಗಳ ವಲಯ) ವಲಯದಲ್ಲಿ ದೈತ್ಯನಾಗಿ ಬೆಳೆದಿದೆ. ಪತಂಜಲಿಗೆ ಯಶಸ್ಸು ತಂದ ಐದು ಉತ್ಪನ್ನಗಳಲ್ಲಿ ಹಸುವಿನ ತುಪ್ಪಕ್ಕೆ ಅಗ್ರಸ್ಥಾನ. ಹಸುವಿನ ತುಪ್ಪದ ಮಾರಾಟದ ಮೂಲಕವೇ ಪತಂಜಲಿ 1,467 ಕೋಟಿ ರೂ. ಆದಾಯ ಗಳಿಸಿದೆ.
ಅಮುಲ್ಗೆ ನೇರ ಸ್ಪರ್ಧೆ ನೀಡಿರುವ ಪತಂಜಲಿ, ತುಪ್ಪದ ಒಟ್ಟು ಮಾರುಕಟ್ಟೆಯಲ್ಲಿ ಹೆಚ್ಚಿನ ಭಾಗವನ್ನು ತನ್ನದಾಗಿಸಿಕೊಂಡಿದೆ. ಅಮುಲ್, ಶ್ರೀಕೃಷ್ಣ, ಮಿಲ್ಮಾ, ನಂದಿನಿ, ಬಿಆರ್ಬಿ ನಂತರದ ಸ್ಥಾನವನ್ನು ಪತಂಜಲಿ ಹೊಂದಿದೆ. ಇನ್ನು ತನ್ನ ಹೆಚ್ಚಿನ ಮಾರಾಟದ ಉತ್ಪನ್ನಗಳಲ್ಲಿ ಎರಡನೇ ಸ್ಥಾನದಲ್ಲಿ ದಂತಕಾಂತಿ ಟೂಥ್ಪೇಸ್ಟ್ ಇದೆ. ಇದರಿಂದ ಕಂಪನಿಯು 940 ಕೋಟಿ ರೂ. ಆದಾಯ ಗಳಿಸಿದೆ. ಮಾರುಕಟ್ಟೆಯಲ್ಲಿ ದಂತಕಾಂತಿಯು ಶೇ.14ರ ಪಾಲನ್ನು ಹೊಂದಿದೆ. ಎದುರಾಳಿಗಳಾದ ಕೋಲ್ಗೇಟ್ ಪಾಮೋಲಿವ್, ಡಾಬರ್ ಇಂಡಿಯಾ ಷೇರುಗಳು ಶೇ.50ಕ್ಕೂ ಅಧಿಕ ಭಾಗ ಕುಸಿದಿವೆ.
ಪತಂಜಲಿಯ ಮೂರನೇ ಹೆಚ್ಚು ವಹಿವಾಟಿನ ಉತ್ಪನ್ನಗಳಲ್ಲಿ ಆಯುರ್ವೇದ ಔಷಧಗಳಿವೆ. ಇದರ ಮೂಲಕ 870 ಕೋಟಿ ರೂ. ಆದಾಯವನ್ನು ಪತಂಜಲಿ ಪಡೆದಿದೆ. ಪ್ರತಿಸ್ಪರ್ಧಿ ಡಾಬರ್ ಇಂಡಿಯಾಗಿಂತಲೂ ನಾಲ್ಕು ಪಟ್ಟು ಹೆಚ್ಚು.
ಕೇಶಕಾಂತಿ ಶಾಂಪೂ ಸಹ ಪತಂಜಲಿಗೆ ಹೆಚ್ಚಿನ ಆದಾಯ ತಂದಿದ್ದು, ನಾಲ್ಕನೇ ಸ್ಥಾನದಲ್ಲಿದೆ. ಇದರ ಮೂಲಕ ಸಂಸ್ಥೆಗೆ 825 ಕೋಟಿ ರೂ. ಆದಾಯ ಬಂದಿದೆ. ಹಿಂದೂಸ್ಥಾನ್ ಯುನಿಲಿವರ್ ಕಂಪನಿಯು ಶಾಂಪೂ ಮಾರುಕಟ್ಟೆಯ ನಾಯಕನಾಗಿದ್ದು, ಶೇ.45ರಷ್ಟು ಪಾಲನ್ನು ಹೊಂದಿದೆ. ಡವ್, ಸನ್ಸಿಲ್ಕ್, ಲಕ್ಸ್, ಫೇರ್ ಆ್ಯಂಡ್ ಲವ್ಲಿ, ಪಾಂಡ್ಸ್ ಕ್ರೀಮ್ ಮತ್ತಿತರ ಉತ್ಪನ್ನಗಳ ಮೂಲಕ ಹಿಂದೂಸ್ಥಾನ್ ಯುನಿಲೀವರ್ ಕಂಪನಿಯು 16,304 ಕೋಟಿ ರೂ. ಆದಾಯ ಗಳಿಸಿದೆ.
ಪತಂಜಲಿಯ ಟಾಪ್ 5 ಆದಾಯದ ಉತ್ಪನ್ನಗಳಲ್ಲಿ ಸೋಪುಗಳಿವೆ. ಆಯುರ್ವೇದದ ಸಾಬೂನ್ಗಳಿಂದ ಕಂಪನಿ 574 ಕೋಟಿ ರೂ. ಆದಾಯ ಗಳಿಸಿದೆ. ಲೈಫ್ಬಾಯ್ ಸೋಪಿನ ತಯಾರಕ ಎಚ್ಯುಎಲ್ ಸೋಪು ಮಾರುಕಟ್ಟೆಯ ನಾಯಕನಾಗಿದ್ದು, ನಿರ್ಮಾ, ಗೋಡ್ರೇಜ್ ಕನ್ಸೂಮರ್ ಪ್ರಾಡಕ್ಸ್ಟ್ ಮತ್ತು ಐಟಿಸಿ ಪ್ರತಿಸ್ಪರ್ಧಿ ಕಂಪನಿಗಳಾಗಿವೆ.
ಗ್ರಾಹಕ ಉತ್ಪನ್ನಗ ಮಾರಾಟದ ಬೃಹತ್ ಕಂಪನಿಯಾದ ಹಿಂದೂಸ್ಥಾನ್ ಯುನಿಲಿವರ್(ಎಚ್ಯುಎಲ್) ಅನ್ನು ಹಿಂದಿಕ್ಕುವ ಗುರಿಯನ್ನು ಪತಂಜಲಿ ಈಗ ಹೊಂದಿದೆ. ಹಣಕಾಸು ವರ್ಷ 2017ರಲ್ಲಿ 10,561 ಕೋಟಿ ರೂ. ಮಾರಾಟ ವಹಿವಾಟು ದಾಖಲಿಸಿರುವ ಪತಂಜಲಿ ಮುಂದೆ ಈಗ ಎಚ್ಯುಎಲ್ ಇದೆ. ಅದು 34,487 ಕೋಟಿ ರೂ. ಮಾರಾಟದ ವಹಿವಾಟು ನಡೆಸಿದೆ. ಈ ತನಕ ಗುರಿ ಸಾಧನೆಯಲ್ಲಿ ನಿರೀಕ್ಷೆಗೂ ಮೀರಿ ಯಶಸ್ಸು ಪಡೆದಿರುವ ಪತಂಜಲಿಯ ವೇಗ ಮಾರುಕಟ್ಟೆ ವಿಶ್ಲೇಷಕರ ಕುತೂಹಲ ಕೆರಳಿಸಿದೆ.