ಮತ್ತಷ್ಟು ಬಲಗೊಳ್ಳಲಿದೆ ವಾಯುಪಡೆ! ನ.5ಕ್ಕೆ ಮತ್ತೆ 3 ರಫೇಲ್‌ ಜೆಟ್‌ ಆಗಮನ!

ಹೊಸದಿಲ್ಲಿ: ಪೂರ್ವ ಲಡಾಖ್‌ನಲ್ಲಿ ಚೀನಾ ಗಡೆ ಕ್ಯಾತೆ ಕುರಿತ ಸಂರ್ಘರ್ಷ ನಡೆಯುತ್ತಿರುವ ಸಂದರ್ಭ ಭಾರತೀಯ ಸೇನೆ ತನ್ನ ಸಾಮರ್ಥ್ಯ ಹೆಚ್ಚಿಸಿಕೊಳ್ಳವ ಎಲ್ಲ ಪ್ರಯತ್ನ ಮಾಡುತ್ತಿದೆ.

ಇತ್ತೀಚೆಗಷ್ಟೇ ಭಾರತೀಯ ವಾಯುಪಡೆಗೆ ಐದು ಅತ್ಯಾಧುನಿಕ ಡಸಾಲ್ಟ್‌ ರಫೇಲ್ ಯುದ್ಧವಿಮಾನ ಸೇರ್ಪಡೆಗೊಂಡಿವೆ. ಇದೀಗ ಮತ್ತೆ ಮೂರು ರಫೇಲ್ ಯುದ್ಧವಿಮಾನ ನವೆಂಬರ್ 5ಕ್ಕೆ ಸೇರ್ಪಡೆಯಾಗುವ ನಿರೀಕ್ಷೆ ಇದೆ. ಇದು ಭಾರತೀಯ ವಾಯುಪಡೆಗೆ ಮತ್ತಷ್ಟು ಬಲತುಂಬಲಿದೆ.

ಜುಲೈ 29ರಂದು ಫ್ರಾನ್ಸ್‌ನ 'ಡಸಾಲ್ಟ್‌ ಏವಿಯೇಷನ್‌' ಕಂಪನಿ ನಿರ್ಮಿಸಿದ ಐದು ರಫೇಲ್ ಯುದ್ಧ ವಿಮಾನಗಳು ಅಂಬಾಲಾ ವಾಯುನೆಲೆಗೆ ಬಂದಿಳಿದಿದ್ದವು. ಈ ಯುದ್ಧವಿಮಾನಗಳು ಈಗಾಗಲೇ ಭಾರತದ ವಾಯುಪಡೆಗೆ ಸೇರ್ಪಡೆಗೊಳ್ಳುವ ಮೂಲಕ ಲಡಾಖ್ ಗಡಿಯಲ್ಲಿ ಸೇವೆಗೆ ನಿಯೋಜನೆಗೊಂಡಿವೆ.

ರಫೇಲ್‌ ಜೆಟ್‌ಗೆ ಹೊಸ ತಂತ್ರಜ್ಞಾನ ಪೂರೈಸದ ಫ್ರೆಂಚ್‌ ಕಂಪನಿಗಳು: ಸಿಎಜಿ ಗರಂ

ನವೆಂಬರ್ 5ರಂದು ಮತ್ತೆ 3 ರಫೇಲ್ ಯುದ್ಧ ವಿಮಾನ ಅಂಬಾಲಾ ವಾಯುನೆಲೆಗೆ ಬರಲಿದೆ ಎಂದು ಸರ್ಕಾರದ ಮೂಲಗಳು ತಿಳಿಸಿರುವುದಾಗಿ ವರದಿ ಹೇಳಿದೆ. ಈಗಾಗಲೇ ಫ್ರಾನ್ಸ್ ನಲ್ಲಿ ಐಎಎಫ್ ನ ಏಳು ಮಂದಿ ಪೈಲಟ್ ಗೆ ರಫೇಲ್ ಯುದ್ಧ ವಿಮಾನ ಹಾರಾಟದ ತರಬೇತಿ ನೀಡಲಾಗಿದೆ.

ರಫೇಲ್ ಯುದ್ಧ ವಿಮಾನಗಳನ್ನು ಹಾರಾಟ ನಡೆಸಲಿರುವ ' ಗೋಲ್ಡನ್‌ ಆರೋಸ್‌ ಸ್ಕ್ವಾಡ್ರನ್‌' ಪಡೆಗೆ ಭಾರತೀಯ ವಾಯುದಳದ ಮಹಿಳಾ ಪೈಲಟ್‌ಗಳ ತಂಡವೂ ಈಗಾಗಲೇ ಸಜ್ಜಾಗಿದೆ.

ವಾಯುಸೇನೆಯ ರಫೇಲ್‌ ಯುದ್ಧವಿಮಾನಕ್ಕೆ ಸಾರಥಿಯಾಗಲಿದ್ದಾರೆ ಮಹಿಳಾ ಪೈಲಟ್‌!

ಮೊದಲ ಹಂತದ ಐದು ರಫೇಲ್ ಯುದ್ಧ ವಿಮಾನಗಳು ಸೆಪ್ಟೆಂಬರ್ 10ರಂದು ವಾಯುಪಡೆಗೆ ಸೇರ್ಪಡೆಯಾದವು. ಈ ಸಂದರ್ಭಕ್ಕೆ ಫ್ರಾನ್ಸ್ ರಕ್ಷಣಾ ಸಚಿವ ಫ್ಲೋರೆನ್ಸ್ ಮತ್ತು ಭಾರತದ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಸಾಕ್ಷಿಯಾಗಿದ್ದರು. 2016ರಲ್ಲಿ ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಕೇಂದ್ರ ಸರ್ಕಾರ ಫ್ರಾನ್ಸ್ ಜತೆ 36 ರಫೇಲ್ ಯುದ್ಧ ವಿಮಾನ ಖರೀದಿ ಕುರಿತ ಒಟ್ಟು 59 ಸಾವಿರ ಕೋಟಿ ರೂಪಾಯಿ ಮೊತ್ತದ ಒಪ್ಪಂದಕ್ಕೆ ಸಹಿ ಹಾಕಿತ್ತು.