ಪುಲ್ವಾಮ ದಾಳಿ :ಪಾಕ್‌ನಲ್ಲಿ ಟೊಮೆಟೊ ದರ ಕೆಜಿಗೆ 180 ರೂ.!

ಹೊಸದಿಲ್ಲಿ: ಕಾಶ್ಮೀರದ ಪುಲ್ವಾಮಾದಲ್ಲಿ ನಡೆದ ಉಗ್ರರ ದಾಳಿಗೆ ಪ್ರತೀಕಾರವಾಗಿ ಮಧ್ಯಪ್ರದೇಶದ ರೈತರು ಪಾಕಿಸ್ತಾನಕ್ಕೆ ಟೊಮೆಟೊ ರಫ್ತನ್ನೇ ನಿಲ್ಲಿಸಿದ್ದಾರೆ. ಹೀಗಾಗಿ ಪಾಕಿಸ್ತಾನದಲ್ಲಿ ಟೊಮೆಟೊ ದರ ಈಗ ಕೆ.ಜಿಗೆ 180 ರೂ.ಗಳ ಗಡಿ ದಾಟಿದೆ ಎಂದು ವರದಿಯಾಗಿದೆ. ಯಾವುದೇ ಸಾವು-ನೋವು ಇಲ್ಲದೆ ಭಾರತೀಯ ರೈತರು ಪಾಕಿಸ್ತಾನಕ್ಕೆ ತಕ್ಕ ಶಾಸ್ತಿ ಮಾಡುತ್ತಿದ್ದಾರೆ.

ಭಾರತ ಕೂಡ ಪಾಕಿಸ್ತಾನದ ಜತೆಗೆ ವಾಣಿಜ್ಯ ಸಂಬಂಧ ಕಡಿದುಕೊಂಡಿದ್ದು, ಇದರ ಬಿಸಿ ಈಗಾಗಲೇ ಪಾಕಿಸ್ತಾನಕ್ಕೆ ತಟ್ಟಲು ಆರಂಭಿಸಿದೆ. ಪಾಕಿಸ್ತಾನದಲ್ಲಿ ಹಲವು ದಿನ ಬಳಕೆಯ ವಸ್ತುಗಳ ದರ ಏರತೊಡಗಿದೆ.

ಮಧ್ಯಪ್ರದೇಶ ಮೂಲದ ಟೊಮೆಟೊಗೆ ಪಾಕ್‌ನಲ್ಲಿ ಭಾರಿ ಬೇಡಿಕೆ ಇತ್ತು. ಆದರೆ ಪುಲ್ವಾಮಾದಲ್ಲಿ ಭಯೋತ್ಪಾದಕರ ಅಟ್ಟಹಾಸದ ನಂತರ ಮಧ್ಯಪ್ರದೇಶದ ರೈತರು ಪಾಕಿಸ್ತಾನಕ್ಕೆ ತಮ್ಮದೇ ವಿಧಾನದಲ್ಲಿ ಪ್ರತೀಕಾರ ತೀರಿಸಿಕೊಳ್ಳುತ್ತಿದ್ದಾರೆ. ಮಧ್ಯಪ್ರದೇಶ ಮುಖ್ಯಮಂತ್ರಿ ಕಮಲ್‌ ನಾಥ್‌ ರೈತರನ್ನು ಬೆಂಬಲಿಸಿದ್ದಾರೆ.

ಮಧ್ಯಪ್ರದೇಶದ ರೈತರ ದಿಟ್ಟ ನಿರ್ಧಾರ!
ಮಧ್ಯಪ್ರದೇಶದ ಜಾಬುವಾ ಜಿಲ್ಲೆಯ ರೈತರು ಪಾಕಿಸ್ತಾನಕ್ಕೆ ಟೊಮೆಟೊ ರಫ್ತು ನಿಲ್ಲಿಸಿದ್ದಾರೆ. ಉರಿಯಲ್ಲಿ ಉಗ್ರರ ದಾಳಿಯಾದ ಸಂದರ್ಭದಲ್ಲೂ ಇಲ್ಲಿನ ರೈತರು ಇದೇ ರೀತಿ ಟೊಮೆಟೊ ಪೂರೈಕೆ ಸ್ಥಗಿತಗೊಳಿಸಿದ್ದರು. ಆದರೆ ಆಗ ಅದು ದೊಡ್ಡ ಸುದ್ದಿಯಾಗಿರಲಿಲ್ಲ. ಈಗ ಬೆಳಕಿಗೆ ಬಂದಿದೆ. ಪಾಕಿಸ್ತಾನ ಇದುವರೆಗೆ ಭಾರತದಿಂದ ಅತಿ ಹೆಚ್ಚಿನ ಪ್ರಮಾಣದಲ್ಲಿ ಟೊಮೆಟೊ ಆಮದು ಮಾಡುತ್ತಿತ್ತು. ಇದೀಗ ಪೂರೈಕೆ ಸ್ಥಗಿತವಾಗಿ ದರ ಗಗನಕ್ಕೇರಿದೆ.

ಸಿಮೆಂಟ್‌ ಆಮದು ಬಂದ್‌:
ಭಾರತೀಯ ವರ್ತಕರು ಪಾಕಿಸ್ತಾನದಿಂದ ಸಿಮೆಂಟ್‌ ಆಮದನ್ನೂ ಸ್ಥಗಿತಗೊಳಿಸಿದ್ದಾರೆ. ಪಾಕಿಸ್ತಾನ ದಿನಕ್ಕೆ 600-800 ಕಂಟೈನರ್‌ಗಳಷ್ಟು ಸಿಮೆಂಟ್‌ ಅನ್ನು ರಫ್ತು ಮಾಡುತ್ತಿತ್ತು. ಈಗ ಕರಾಚಿ ಬಂದರಿನಲ್ಲಿ ನಿಂತಿವೆ.