2019ರಲ್ಲಿ ಉದ್ಯೋಗ ಬದಲಿಸುತ್ತೀರಾ? ಅಪಾರ ಅವಕಾಶಗಳಿವೆ

ಹೆಚ್ಚಿನ ಸಂಬಳ ಮತ್ತು ಉತ್ತಮ ಅವಕಾಶಗಳಿಗಾಗಿ ವೃತ್ತಿಯನ್ನು ಬದಲಿಸಬೇಕು ಎಂದು ಯೋಚಿಸುತ್ತಿರುವಿರಾ? ಹೊಸ ವರ್ಷ 2019ರಲ್ಲಿ ಉದ್ಯೋಗ ಬೇಟೆ ಆರಂಭಿಸುವ ಮುನ್ನ ಕೆಲವು ಉತ್ತಮ ಕೌಶಲಗಳು ನಿಮ್ಮಲ್ಲಿವೆಯೇ ಎಂದು ಒಂದು ಸಲ ಅವಲೋಕನ ಮಾಡಿ. ಉದ್ಯೋಗ ಮಾರುಕಟ್ಟೆ ಟ್ರೆಂಡ್‌ಗಳ ಅನುಸಾರ 2019ಕ್ಕೆ ಅನ್ವಯವಾಗುವಂಥ ಟಾಪ್‌ ಕರಿಯರ್‌ ಕೌಶಲಗಳು ಇಲ್ಲಿವೆ. ಈಗಾಗಲೇ ಈ ಕೌಶಲಗಳು ನಿಮ್ಮಲ್ಲಿದ್ದರೆ ಇನ್ನಷ್ಟು ವೃದ್ಧಿಸಿಕೊಳ್ಳಿ... ಇಲ್ಲದೇ ಹೋದರೆ, ರೂಢಿಸಿಕೊಳ್ಳಿ...

ಡಿಜಿಟಲ್‌, ಆಟೋಮೇಷನ್‌ ಬಾಗಿಲ ತಟ್ಟಿ...

ನೀವು ಹೊಸ ತಂತ್ರಜ್ಞಾನಗಳ ಬಗ್ಗೆ ಎಷ್ಟು ಅರಿವು ಅಥವಾ ನೈಪುಣ್ಯ ಹೊಂದಿರುವಿರಿ ಎನ್ನುವುದನ್ನೇ ಈಗಿನ ಬಾಸ್‌ ಅಥವಾ ನಿಮ್ಮ ಭವಿಷ್ಯದ ಬಾಸ್‌ ಹೆಚ್ಚು ಗಮನಿಸುತ್ತಾರೆ. 2019ರಲ್ಲಿ ಬಹುತೇಕ ಕಂಪನಿಗಳು ಕಂಪನಿಗಳು ಆಟೋಮೇಷನ್‌ ಮತ್ತು ಡಿಜಿಟಲ್‌ನತ್ತ ಸಾಗುತ್ತಿದ್ದು, ನೀವು ಕಂಪನಿಯ ಅಗತ್ಯ ತೀರಿಸುವಂಥ ಕೌಶಲಗಳನ್ನು ಹೊಂದಿರಬೇಕು. ಹೊಸ ತಂತ್ರಜ್ಞಾನಗಳಿಗೆ ತೆರೆದುಕೊಳ್ಳಬೇಕು.

ಮಾತು, ಬರಹ, ಪ್ರಸ್ತುತಿ

ಲಿಂಗ್ಡ್‌ಇನ್‌ ಸಂಸ್ಥೆಯ ಇತ್ತೀಚಿನ ವಾರ್ಷಿಕ ವರದಿ ಪ್ರಕಾರ, ಉದ್ಯೋಗ ಮಾರುಕಟ್ಟೆಯಲ್ಲಿ ಸಂವಹನದ ಕೊರತೆ ಇರುವುದು ಕಂಡು ಬಂದಿದೆ. ಇತರೆ ಟೀಮ್‌ನೊಂದಿಗೆ ಪರಿಣಾಮಕಾರಿಯಾಗಿ ಸಂವಹನ ನಡೆಸುವಂಥ/ ನಿಭಾಯಿಸುವಂಥ, ಚೆನ್ನಾಗಿ ಬರೆಯುವಂಥ ಮತ್ತು ಸಭೆಗಳಲ್ಲಿ ವಿಷಯಗಳನ್ನು ಪ್ರಸ್ತುತಿ ಪಡಿಸುವಂಥ ಉದ್ಯೋಗಿಗಳಿಗೆ ಹೆಚ್ಚಿನ ಆದ್ಯತೆಯನ್ನು ಮ್ಯಾನೇಜ್‌ಮೆಂಟ್‌ಗಳು ನೀಡುತ್ತವೆ. ಭಾಷಣ ಕಲೆಗೂ ಒತ್ತು ನೀಡಿ.

ಟೀಮ್‌ ನಿರ್ವಹಿಸಿ

2019ರಲ್ಲಿ ನಿಮ್ಮ ವೃತ್ತಿಯಲ್ಲಿ ತ್ವರಿತ ಪ್ರಗತಿ ಸಾಧಿಸಲು ಟೀಮ್‌ನಲ್ಲಿ ಹೇಗೆ ಕೆಲಸ ಮಾಡುವಿರಿ ಎನ್ನುವುದು ಬಹಳ ಮುಖ್ಯ. ಉತ್ತಮ ಸಂವಹನದ ಮೂಲಕ ನಿಮ್ಮ ಟೀಮ್‌ ಅನ್ನು ಗಟ್ಟಿಗೊಳಿಸಿ. ನೀವೇ ಸ್ವಯಂ ಪ್ರೇರಣೆಯಿಂದ ಕೆಲಸದಲ್ಲಿ ತೊಡಗಿಸಿಕೊಳ್ಳಿ, ಯಾರೋ ಕೆಲಸ ಹೇಳುವುದಕ್ಕೆ ಕಾಯ್ದು ಕೂರಬೇಡಿ. ನೀವು ಟೀಮ್‌ ಲೀಡರ್‌ ಆಗಿದ್ದ ಪಕ್ಷದಲ್ಲಿ ಹೆಚ್ಚಿನ ಜವಾಬ್ದಾರಿ ನಿಭಾಯಿಸುವ ಕೌಶಲವನ್ನು ಬೆಳೆಸಿಕೊಳ್ಳಿ. ಉದ್ಯಮದಲ್ಲಿ ಸಾಕಷ್ಟು ಬದಲಾವಣೆಗಳು ನಡೆಯುತ್ತಿದ್ದು, ಟೀಮ್‌ ಅಣಿಗೊಣಿಸುವ ಕೌಶಲ ಅಗತ್ಯ.

ಸೋಷಿಯಲ್‌ ಮೀಡಿಯಾ, ವೆಬ್‌ ನಿಪುಣರಾಗಿ...

ಪ್ರಸ್ತುತ ಇಂಟರ್‌ನೆಟ್‌ ಮತ್ತು ಸೋಷಿಯಲ್‌ ಮೀಡಿಯಾಗಳು ಉದ್ಯೋಗ ವಲಯದಲ್ಲಿ ಪ್ರಮುಖ ಪಾತ್ರವಹಿಸುತ್ತಿವೆ. ನೀವು ಮಾರಾಟ ವಿಭಾಗದಲ್ಲಿ ಇದ್ದರೆ, ಅಲ್ಲಿ ಬ್ಯುಸಿನೆಸ್‌ ವೃದ್ಧಿಗೆ ಸೋಷಿಯಲ್‌ ಮೀಡಿಯಾ ನೆರವಾಗುತ್ತದೆ. ಸಂಪನ್ಮೂಲ ಕ್ರೋಡೀಕರಣ ಮತ್ತು ಹೊಸ ಐಡಿಯಾಗಳಿಗೆ ಸೋಷಿಯಲ್‌ ಮೀಡಿಯಾ ಮತ್ತು ಅಂತರ್ಜಾಲವು ನೆಲೆಯಾಗಲಿದೆ.